Read Nyishi HOSIYA 14 Bible Online

HOSIYA 14 - Nyishi bible

HOSIYA 14

¹Israela, nulug Pwnbo At Swg dookub hookurto, hoggab nulug nyixaq gab nulv dwqtup paku.

²Gomcwram nulug lvgab naato hoo At Swg dookub hookur to; mwam beto, “Mwlwg nyixaqkam naapaq tuku; hoggv aldvn loorwqto, hoo ngulv ngulug nvbcwrv dingrwl hvvb tulungam pwr jitayin.

³Assiriyangv ngulam ywwlin nyoram; ngulv svpur tulug aoho wkram; hoo ngulug alaq mvnam mam ngulug Pwnbov hvl ngulv bekram. Noqg ho hopinv aya mwwpanam mam kaapa dvn.”

⁴Ngo bulug gaqxar kunam mam mvdar tayin; ngo bulam danyib aby tayin, hoggab ngoqg haaxaqnamv bulug hoqgv wkur pakun.

⁵Ngo Israel gab gums hvb nyitayin; mwv lili opu hvb puutayin; mwv Lebanonwg svvn tulu rwb hvb guugab tayin;

⁶mwwg nviyin jurlin tayin; mwwg kangamnamv olib hvb nyitayin, hoo mwwg sungamnamv Lebanon hvb nyitayin.

⁷Bulv hookurl hoo ngoqg doonyium niikum ho dootayin; bulv am hvb swwtayin; bulv roo opu puunam hvb puutayin; bulam yuunamv Lebanonwg roo ala hvb nyitayin.

⁸Iprayima, murty tulu lvgab ngo hoggv nyin tan? Soq si ngo su birwqdvn hoo nulam kvvyw-tada dvn. Ngo nywywngam jeel doonbo Saipres hvb nyidwn; ngoqg soqgv nulug aaxiv haadwn.

⁹Hiyv xeq mwwlaqdvn, mwam soq pagoq tulu sam cengmto; hiyv xeq hingkib mwwdwn, mwam soq tulu sam cengmto; hoggab At Swg lamtangv kvtaqdvn, hoo jvqtw bov hoqb wdwn, hvbmabde nyimurbo tulungv hoqham caajab dvn.