Read Nyishi HOSIYA 2 Bible Online

HOSIYA 2 - Nyishi bible

HOSIYA 2

¹Nulug vbw-bor tulungam no beto, “Nul ngoqg nyiingv,” hvl hoo nulug any-bwrm tulungam no beto, “Nulv aya mwwpanam mam svgagvrwqnum.”

²Bibwqto nulug annwg lvgab, bibwqto- hoggab mwn ngoqg nywxw ma, hoo ngo mwnwg nyol ma- ho mwnwg bwwxinamv mwnwg nyuqm hoqgv mwnwn apaq mvto; hoo mwnwg bwwxinam mam mwnwg kuru-haabo hoqgv apaq mvto;

³hvbmab nyiloqkam ngo mwnwg talo dvb twqbin tan hoo mwnwn ko bwwd aalho mwn talo namhvb, hoo mwnwn deexa-rara ak hvb mvtan, hoo mwnwn goqc-goqyi bo ked hvb mvtan, hoo mwnwn hvngwr ngwrl sim tan.

⁴Mwnwg ko tulu ao hookam ngo aya mwwpa ram, hoggab hoq ko tuluhv yogaq kongv.

⁵Hoggab bulug annv nyimw mwwgaql yvpa ku; mwn bulam hvnyw-moolw dvb ko gvpa kun. Hoqgab mwn benum, ‘Ngoqg tumanam kokwb wmin gvtayin, hiyv ngoqg dvs-twwsam; ngoqg tacaq tanam ho jiqnbo takinam, ngoqg kutiam hoo ngo twwsam ngam jidwn.’

⁶Hoqgab ngo mwnwg lamtangam taa lvgab mvtur tayin, hoo mwnwn mvtur dvb ngo bvly lo ak nwqtum tayin, ho mwn mwnwg lamtangam kaapa kuram.

⁷Mwn mwnwg tumanam mam ruqmin gvstan hvbmabde bulam wtin kuram, hoo mwn bulam meegaq tayin hvbmabde bulam kaapa kuram. Ho mwn betayin, ‘Ngo wkur deekun ngoqg otuq nyol dookub, hoggab sija sam otuqg akv ngoqgab alyanum.’

⁸Hoo mwn cengmanum ngo mwnwn ammam, roo alangam, hoo kutiam jinum hvl, hoo mwnwn naleqgo rupam la hunam yvqjnum, hoqham bulv Baal gab nyid gvdo.

⁹Hoqgab ngo vly nvvdam ngoqg ammam nookur taikun, hoo moodam roo alangam nookur taikun, hoo ngo noqg tacaq tanam la ngoqg jiqnbo takinam nookur taikun, hoq tuluhv mwnwg talonam mam tomlup tan.

¹⁰Sija ngo mwnwg kaacnam mam mwnwg tumanam tulug kaagaho mvkol tayin, hoo mwnwn ngoqg alaq soqgv akam ywwlin bo dooram.

¹¹Hoo ngo mwnwg hemp mwlwngam, mwnwg durum dvnam-twwnam mam, mwnwg nit poolam, mwnwg doonu aalam, hoo mwnwg durum dvd-twwdwb xuqlin apnam mwlwngam twrtayin.

¹²Hoo ngo mwnwg roo boolungam la taoq svvn tulungam osuq mvtayin, hogloq ham mwn benum, ‘Soq tulu si ngoqg bon nyijongv, hoqham ngoqg tumanam tulungv ngam jipa kun.’ Ngo soq tulu sam nyoro akub mvtayin, hoo nyoro svdin tulungv bulam dvmin-twwmin tayin.

¹³Hoo Baalwg aal gab durum dvikam ngo mwnwn laqm-baqm tayin hwdlo mwn bulam boyuqnam akiam jiyikam hoo mwn atam lvqcam la guj lvgab paqsyin, hoo mwnwg tumanam tulug kokwb wmin gvi yikho hoo ngam mwwpa kuma, At Sw bibwqdo.

¹⁴“Hoqgab, kaato, ngo mwnwn jinyioq tayin, hoo mwnwn deexa-rara ho boatayin, hoo mwnwn tangam dvb gootayin.

¹⁵Hoo ngo tolo mwnwg roo boolungam mwnwn jitayin hoo Akorg lywpangam hingwg viyap akwb mvtayin. Hoo tolo mwnwg nyijwr aal hoq goonam hvb mwn goorwq tayin, hwdlo Ijipt gvda hoqgv mwn lengd moodho goonam hvb.

¹⁶“Hoo hoq aalho, At Sw bibwqnam, no ngam “Ngoqg nyolv hvl goqtayin,’ hoo no ngam lokam ‘Ngoqg Baal hvl goqkram.’

¹⁷‍Hoggab ngo Baalwg eminam mwnwg agam hoqgv mvpaq tayin, hoo bulam hoq eminam mam lokam mwwpa mvkram.

¹⁸‍Hoo ngo bul gab hoq aalam nyorog svdin tulu lvgab, doa pvta tulu lvgab, hoo deelag gwn-xarnbo tulu lvgab pvvb ak mvtayin. Hoo gvda soqg illy-uppuqkam, lyoqr orioqkam, hoo nyob panam mam mvpaq tayin, hoo ngo nulam cumciq nyook ho doom dvb mvtayin.

¹⁹‍Hoo ngo nwrba gob nulam begaql aptayin. Ngo nulam ngoqgab dvrwq bvla jvqtw, tumab aby hoo aya mwwpanam uraho begaql aptayin.

²⁰‍Ngo nulam ngoqgab dengky dvb begaql aptayin. Hoo nulv At Swn cengtayin.

²¹“Hoo hoq aalam ngo birwqtayin, At Sw bibwqdo, ngo doangam birwqtayin, hoo bulv swcwngam birwqtayin,

²²hoo swcwngv ammam, roo alangam hoo kutiam birwqtayin, hoo bulv Jejreelnvn birwqtayin,

²³hoo ngo atv ngoqgab mwnwn gvdaho liitayin. Hoo ngo Aya maanam mam aya mwwpa tayin, hoo ngo betayin Ngoqg nyi maanam mam ‘Nulv ngoqg nyiingv hvl’; hoo mwv betayin, ‘No ngoqg Pwnbov.’”