Read Nyishi HOSIYA 7 Bible Online

HOSIYA 7 - Nyishi bible

HOSIYA 7

¹Hwdlo ngo Israelam mwp yukam, Iprayim nyixaqnam mam, hoo Samariyag almab bon nyinam tulungam; ho bulv xaalyol bonam nyinam; dvcobov haanam mam, hoo naalil naareq bov lvvglo humreqnam mam bepornum.

²Hvbmabde bulv mwwpa maadwn ngo bulug hog mwlw almab nyinam mam mwwgab dvn hvl. Sija bulug bon nyinam tulungv bulam hwwiyum paku; hoq tuluhv ngoqg kaaga si doodo.

³Bulug alman lvgab bulv lvpw atam, hoo bulug nyepin pingnamv lvpw atwg nyega kongam hemp mvmto.

⁴Bul mwlwngv bwwxinbov; bulv ogbo loora hvb nyido, hoqham wtw kabnbov wm mam hwwr dvb mwlwq kuma, wtwngv hwdlo gooburl nuuma deedib.

⁵Ngulug lvpw atwg aalam, lvpw atwg nyega ko tulungv opo twwxuml vcnum; nyij-nyiparbo lvgab mwwg alaqkv yvmjin-yamtal soobanum.

⁶Hoggab loora hvb hangv nyitwl bulug kvsil bon nyidwb mwwnam mam bulv yiqtaka dvn; bulug haaxaqnamv ai yupwngam wm hvb bioqdwn; ar komcam wm moily bioqnam hvb bioqpur lengdwn.

⁷Bul mwlwngv loora hvb ogdvn, hoo bulug pvvb doogbo tulungam bulv dvmeq dvn. Bulug lvpw at mwlwngv yoql paku, hoo bulug hoqgv hiyvkam ngam goqkma.

⁸Iprayim mwv at nyiilu lvgab yvbamnam; Iprayim si wtw xongkub maanam hvb nyinam.

⁹Nyi asaqkv mwwg atoram naareq paku, hoo mwv ham cengma; mwwg dumv dumpu puuiyum supa ku, hoo mwv ham cengma.

¹⁰Israelwg larnamv mwwg nyuqm mam kaatam dvn; hvbsujaqkam bulug Pwnbo At Swg dookub bulv hookur maadwn, ho soq mwlw gab, mwam meekar maadwn.

¹¹Iprayim si yobur hvb nyidwn, ringaq tvl hoo hog mwwpa ma, Ijiptam goqdu do, Assiriyab wdu do.

¹²Bulv hvb wikam, ngo bulug aoho ngoqg wswqkam tumlup tayin; bulam doag pvta hvb ngo akob naal tayin; bulug dookub dookum ajinv bepa kunum hvbjaq ngo bulam gwrtayin.

¹³Bulam mwwdwq mvto, hoqgab bulv ngoqg soqgv gaqxar paku! Twrnamv bulam haanka, hoggab bulv ngam ceekol tvjw maab nyinum! Ngo bulam ywwlin yinsnum, hvbmabde bulv ngam ceekol vm mvvl goonam.

¹⁴Hvvjw hoqgv bulv ngam xama, hvbmabde bulug yubk ho bulv sigin gindo; hoggab dvnam-twwnam ho bulv atv un mvgnam; bulv ngam ceekol tvjw maanam.

¹⁵Ngo bulug alaqkam laqtordvb hony suknam, hvbsujaqkam bulv ngam ceekol almab nyirwqnam.

¹⁶Bulv hookurnam, hvbmabde odumb caamanam, bulv al looda maanbo illy hvb nyinam; lyoqr niqtuq ho bulug lvpw atwg nyega ko tulungv yoqlwq tayin hoggab bulug modu maab lyol gab. Ijipt gv gvda lo soq si bulug haqpaqnam gob nyitayin.