Read Nyishi HOSIYA 8 Bible Online

HOSIYA 8 - Nyishi bible

HOSIYA 8

¹Nulug nvbcwr ho tuuliam tvgabto! Dook puul pvta hvb nyita bo ak At Swg nam aoho doodo, hoggab ngoqg birwl apnam mam bulv mvpia paku hoo ngoqg pvvbam ceekol tvjw maanum.

²Ngam bulv xabnam, “Ngoqg Pwnbo, ngulv Israelv-nam cengdwn.”

³Israel hoqgv albongv jurlin paku; ceebiongv mwam ruqmin gvtayin.

⁴Bulv lvpw at tulungam mvnum, hvbmabde ngoqg goloq kvma. Bulv lvpw atwg nyega ko tulungam xuqrabnum, hvbmabde ham ngo cengmanum. Bulug rup-hun lvgab bulam atam twrk dvb murty tulungam mvnam.

⁵Samariya nga, nulug svv kongam ngo bwwlinv mvpa kun. Ngoqg haaxaqnamv bulam gux dvn. Hog hwdgo bulv laanyi maab nyiisam nyiib nyitayukun?

⁶Hoggab soq si Israel hoqgv; jem mvnbo akv sam mvnum; soq si Pwnbo ma. Samariyag svv kongam vmwq vmwqb twqtayin.

⁷Hoggab bulv dooiyam vly liidwn, hoo bulv cwkeq-lemeq dooiyam vly naatayin. Daqdu bo amv vmlyw dookma; hoqhv wtw lengram; hoqhv vmlyw nyiloqkam, nyi asaqkv ham dwtwr tayin.

⁸Israelam dvmeq paku; bulv nyob asaq nyi tulug pengko ho haqpaqnam dupum-dvrab ak hvb dookho lopa kun.

⁹Hoggab bulv Assiriyab caan kuba, nyoro svdam akv vp-cwkwb nyogaq goqdu do; Iprayimv aby bo tulungam ree goqlwq paku.

¹⁰Nyob nyi asaq hoqgv bulv ree goqs jaqkam, ngo bulam nyebia jaqb goqkum tayin. Hoo lvpw atv la lvpw atwg nyega ko tulungam nyebia jaqb hiqswr tayin modu-mabab ko-gab.

¹¹Hoggab Iprayimv nyic nyigam gab naleqgo yugwngv mvl ap paku, yugw tuluhv mwam nyic nyigw yab nyim paku.

¹²Ngo lwyw camg mwwg gab pvvbam xeqtkun, bulv hoq tulu ham cengka kaaka maanam pvvb gob kaaknum.

¹³Ngoqg gab pwr aky jinam hvb, bulv vdinam pwr jil hoo ham dvnam, hvbmabde hoq tulu ham At Sw loorwq maanam. Sija bulug nyixaqnam mam mwv mwwpa tayin hoo bulug nyicam laqm-baqm tayin; bulv Ijipt wkur tayin.

¹⁴Hoggab Israelv mwwg Pwnboam mwwpa kumanam hvbmabde lvpw namlongam ywrnum, hoo Judangv gurum nwqtumnam bopamv naleq go mvp paku; hoqgab mwwg bopam tuluho ngo wm mam rwlwq tayin, hoo hoqhv mwwg ator cwwgwnanam gutwr mvtayin.