Read Nyishi HOSIYA 9 Bible Online

HOSIYA 9 - Nyishi bible

HOSIYA 9

¹Hemp-hwnyir maabv, Israela! Nyiilug hwrcwnam hvb hwrcw maabv; hoggab nulug Pwnboam haqpaq peel nulv nyimw boam soomin gvknum. Jurpy daqk mwlwho nulv yocu-yabio bo nyijongam aby bopa ku.

²Jurpy lwqnam mvla opo pwcwngam bulam dvm-twwm kunam, hoo bulam nit bo opongam twwpa kuram.

³At Swg gvdaho bulv doodu kuram, hvbmabde Iprayimv Ijipt wkur tayin, hoo bulv Assiriya lo dvrwq maan bo dvsam dvtayin.

⁴Bulv At Swn twwnam aky toolin jinyi kuram, hoo bulug pwr jinam tulungv mwam hemp dvb mvram. Hoq hv bulam nyix-riinbo tulug wtw hvb nyitayin; sam dvnbo mwlwngv kac tayin; hoqgab bulug wtwngv bulug kano gab aro; hoqhv At Swg namho haanyiram.

⁵Soomin dvmin dvb xuqlinum aalam nulv, hoo At Swg durum dwd aalam hoqgv nyitayin?

⁶Hoggab kaato, bulv twrtanam hoqgv aadob wleq liqdu do; hvbmabde Ijiptv bulam noocum tayin; Mempisv bulam svma liitayin. Bulug xinam rup tulungam Nettels tulungv otub bwwtayin; bulug doogwngv taa-hvvdwb nyitayin.

⁷Laqm-baqdynam ak haapa ku; nyijongam kwlib jid aalv haapa ku; sam Israelv cengtayin. Nyiqry kaanbo akv dama bov; ui-nyia nyi akv rugaq bov, hoggab noqg vcjaqb nyixaqnam la vcjaqb oyumnam gab.

⁸Ngoqg Pwnbo lvgab nyiqry kaanbov Iprayimg rvkybo nyi akwb nyido; hvbsujaqkam mwwg lamta mwlwho pwd-potongv doodo, hoo mwwg Pwnbog nombungam oyumnum.

⁹Gibeag aal hog nyinam hvb bulv atv atam vc-looda urab nyiwq-nyitol nyipa ku: bulug nyixaqkam mwv mwwgab tayin; bulug nyicam mwv laqm-baqm tayin.

¹⁰Nyorog ura lo roo aaxy tulu hvb, Israelam ngo kaapanum. Xeeco bo taoq svvn aaxiam kaapa namhvb, ngo nulug ab tulungam kaanum. Hvbmabde bulv Baal-peor haanum hoo hvnyw-har pagoqho bulv atv atam jipaq sunum, hoo bulug abynum dupum-dvrab pam kacnam hvb nyiknum.

¹¹Iprayim mam yuunamv pvta jarxanam hvb jarxatayin- ko bwwram, ko gvram, ko ywrab ram!

¹²Ko tulungam bulv sorab sujaqkam, akkam doomab sileq mvtayin. Bulam mwwdwq mvto hwdlo ngo bulug hoqgv wleqyin!

¹³Iprayim mam, miipap talap nyook ho pvng svvn appa bo ak liinam hvb, ngo kaapa paku; hvbmabde Iprayimv hoggub nyijaqkam mwwg ko tulungam mengm dvb lvvgwb lengtayin.

¹⁴At Swa, bulam jito- hoggv no jitayin? Bulam ko jaqpaqnam mam la oc lengma nammam jito.

¹⁵Gilgal ura lo bulug almab luuxy nyinamv doodo; hoqgv ngo bulam oyum yumrab kunum. Hoggab bulug nyic-nyiya bon nyigam gab ngoqg nam soqgv bulam ngo ruqlin tayin. Ngo bulam lokta aby bokram; bulug lvpw atwg nyega ko mwlwngv tvjw maanbov.

¹⁶Iprayim jwwtab pakun; bulug rwbam sengm pakun; bulv aaxy xeekram. Bulv ko bwws jaqkam bulug tumanam ko tulungam ngo sim tayin.

¹⁷Ngoqg Pwnbov bulam haqpaq tayin hoggab bulv mwam tvjw kuma pan; bulv nyob nyi asaqg pengko ho gvqmw bo nyiib nyitayin.