Read Nyishi JOYEL 2 Bible Online

JOYEL 2 - Nyishi bible

JOYEL 2

¹Jaiyon ho tuuly ak miqto; ngoqg dvrwqbo puutu ao lo tacin dvb yal dulin mvto! Gvdag doonbo nyi mwlwngam tvmdwr hwqm to, hoggab At Swg aalv hoodu do; hoqhv ogumto,

²doomwq-dooiyam bvla kan twdwq aal loog, doomwq-pulupnam la kan twdwq pulupnam aal loog! Koi bvla atorbo nyiilungv kaiya poogub puutu tulug aoho hwwlupnam; bulug hvb nyinbo otuqho nywywngam nyika maapwn, ho haata bo mwlwg ko hosiqg vnyw tuluho bulam nyinam hvb lokta nyikram.

³Bulug otuqb wmv gudwn, hoo bulug langk ho wm moiliv bioqdwn. Bulug agaho gvdangv Iden boolu hvb nyidwn, hvbmabde bulug langk ho haqpaqnam deexa-rara ak doodwn, hoo bulv hogloqkam keleqko dooma dvn.

⁴Bulug nyuqtuq-moorv svpur tulug nyuqtuq-moor hvb nyido, hoo nyob panan svpur tulu hvb bulv xardo.

⁵Ceriot tulug dunam-xaanam hvb, bulv puutu tulug aob juqca dvn, tolum-lumtaqkam wm guikam bumnam hvb, vcjaqb atorbo sipaiyv nyob patab soolinam hvb nyidwn.

⁶bulug agaho nyiilungv vcjaqb mwwdwq dvn; nyuqm mwlwngv mooma-sasa dvn.

⁷Nyob panbo hvb bulv mvdwn; sipai tulu hvb bulv bvliam yamka dvn. Bulv at-atwg lamtab wdwn; bulug lamta tulu hoqgv bulv wxaq maadvn.

⁸Bulv akwn-akwn tumin suma dvn; vx-cerv atwg lamtab wdwn; bulv nwwxo-svtam hoqgv mvpial lengdwn hoo mvturl ap maadkun.

⁹Bulv bopam aob juqca dvn, bulv bvly aob xardwn, bulv geecal nam urab giilwq dvn, bulv pupum hoqgv dvcobov haanam hvb haadwn.

¹⁰Swcwngv bulug agaho hwqdin dvn; doangv tvmdwr dvn. Doonyi la poolv kan twdwq dvn, hoo takar tulungv huto huuk maadwn.

¹¹At Sw mwwg yalam mwwg sipai agaho dulin mvdwn, hoggab mwwg svmcwngv vcjaqb koidvn; hiyv mwwg gomcwram nyidwn hv ator jaqdvn. Hoggab At Swg aalv koi bvla swrdorxeq dvn; hiyv ham cwqnyi dvn?

¹²“Sijakam,” At Sw bibwqdo, “dery reel, xabjo ywl, hoo nyix-riinam lvgab; nulug hang bumpwngv ngoqg dookub hookurto;

¹³hoo nulug hangam mvko to hoo nulug vjam puceqnam hama.” Noqg Pwnbo, At Swg dookub hookurto, hoggab mwv anya bvla aya mwwpa dvn, hang lengla maadwn, hoo naleq jaqb tumab aby dvn; hoo ciqcaq-bviyaqb mwv jipaq dvn.

¹⁴Hiyv cengdwn mwv hookur layil hoo jipaq maab nyikam sunv yv, hoo dvnam twwnam lvqc akiam mwam apaq jimab nyikam yinpv noqg Pwnbo At Sw gab?

¹⁵Jaiyon ura lo tuuly miqto; dvma twwmab vrnam mam darxaqto; piwr jwr-jwr dvb dookum mam goqto;

¹⁶nyiilungam goqkumto. Nyi tulungam darxaqto; axa tulungam hookum mvmto; ko tulungam la, gwwi twwxiqbo tulungam goqkumto. Paadangv mwwg wrw dookam apaqto, hoo tvmwngv mwnwg pwqlwngam apaqto.

¹⁷Nam baag gvla yugw pengko ho nyub tulungv, hiyv At Sw gab bon nyinbov, xabg dvl hoo beto, At Swa, noqg nyiilungam cwqg dvl apaq tvbv, hoo noqg gumn otungam nyob asaqg pengko lo benyi-beya bem mvmabv. Hoggab bulv nyi tulug pengko lo benyi tayin, “Bulug Pwnbov hoglo?’”

¹⁸Ho At Sw mwwg nyook gab kaaneqnum hoo mwwg nyi tulu aoho aya mwwpanum.

¹⁹At Sw birwqnv mwwg nyiilungam benum, “Kaato, ngo nulam dvsam, twwsam, hoo kutiam kanam nomdu gvdwn; hoo nulv hang xumta yukun; hoo nyob asaq pengko lo ngo nulam benyi beya bem kuram.

²⁰“Ngo nyoodum daiya nyiilungam nul galoqkv aado jaqb mvpaqtayin, hoo mwam cwwgoq-deegoq goqk hoola deexa-rara nyook ho ruqpaq tayin, mwam ceetorbo tulungam dou-cagag sa-svlob ruqpaq tayin, hoo mwam ceebio boam dou-haagag sa-svlob ruqpaq tayin; mwwg hoqgv nvkiq-nviyiq kvla naiyangv vigo suurab tayin, hoggab mwv koijaq pagoqkam nyipa kun.

²¹“Gvda nga, bos maabv; mwwngamto hoo hwnyir-hvmarto, hoggab At Sw koijaq pagoqkam nyipa kun!

²²Moorog svdin tulu, nulv bos maabv, hoggab nyorog nwmwngv jeedku; svvnv aaxy xeedku; taoq svvnv la roo boolungv biqbiq jaqb aaxy xeedo.

²³Mwwngamto, Jaiyonwg ko tulunga, hoo noqg Pwnbo At Sw ho hwnyir-hvmarto, hoggab mwv nam ywwlin dvb nyebia jaqb nyodongam hom jipan; nyodo hoco boam la honyiu boam, mwv noq gab naleqgo nyodongam hol mwjpan.

²⁴Jurpy mvkho amv naleq tayin; roo ala twwsv la kutiv uppum ho topoq-toloq tayin.

²⁵Twwiyap yabkarbo takam, poqkar yvnbo takam, hoo cel dwtwrbo takam mam, ngo nulug pengko lo ngoqg sipai mvqlw jaqb kanam nvmlwqtvl, nulug rongongam dvpaq mvnam vnyw ham, ngo laabo yaab swwm dukub nulam jikur tayin.

²⁶“Nulv naleqgo dvtayin hoo xumt tayin, hoo noqg Pwnbo At Swn paqtayin, hiyv nulam swrdorxeq jaqb nyij pakun. Hoo nywywngam lokta ngoqg nyiilungam hvnyw-harho vlwq kuram.

²⁷Ngo Israel pengko lo doodwn hvl nulv cengtayin, hoo ngo nulug Pwnbo At Swv hoo asaq dooma dvn. Hoo nywywngam lokta ngoqg nyiilungam hvnyw-harho vlwq kuram.

²⁸“Hoo kokwngam hoq moodv wl haatayin, ho ngo nyia ko mwlwg aoho ngoqg Yalam jilwq tayin; nulug nyega ko tulungv hoo nulug nyem ko tulungv nyiqry kaatayin, nulug nyekam-xox tulungv yuma maatayin, nulug nyijwr yaapa tulungv nyiqry kaanam hvb kaol kaatayin.

²⁹Hoq aalam nyera-paqn tulug ao hookam ngo ngoqg Yalam jilwqtayin.

³⁰“Hoo doa ao tolo la swcw nvg aoso hijum swtw bvla wmmwb hoo wm mwk tiqbu hvb swrdorxeqkam kaakin tayin.

³¹‍At Swg koi bvla swrdorxeq aalv haama taab, doonyiv kan twdwq tayin, hoo poolv ui hilum hvb nyitayin.

³²‍Hoo hiyv xeq At Swg eminam goqdwn ham vx-ceram ywwtayin. Hoggab Jaiyon puutu hoola Jerusalemho kelinbo nyi tuluhv dootayin, At Sw beknam hvb, hoo bulug pengko ho swwl doonbo tuluhv At Swg goqlinamv.