Read Nyishi JOYEL 3 Bible Online

JOYEL 3 - Nyishi bible

JOYEL 3

¹Hoggab kaato, hoq aalam la moodam, hwdlo ngo Judangam la Jerusalem mam nvtaqnam mam jikurtayin.

²‍Ngo nyob tulungam bookam tayin hoo Jehosapat lywpa ho bulam boal bookum tan. Hoo ngo alo bulam pw hwwtab haatayin, ngoqg otu nvvsiqbo Israel gvla ngoqg nyi tulug kwlib, hoggab bulv nyob asaqg pengko ho bulam cwrsaq-bvraq twqb mvpa kun hoo ngoqg gvdangam mvpin-mvra pakun,

³‍hoo ngoqg nyi gab tak kaapa ku, hoo nyega ko ak yocu-yabio nyim dvb kwm-kor mvpa kun, hoo nyem ko akam opo gob puql twwpa kun.

⁴“Nulv ngoqgab hoqgv, Taiyar la Sidon na, hoo Palistiyag durbu-buupwnga? Nulv ngam hog ak jikur tad nvi yv? Nulv ngam jikur kuba nyiloqkam, ngo nulug jinam mam nulug atwg dumpo aoho nyebia jaqb hookur mvtayin.

⁵‍Hoggab nulv ngoqg rupam hoo ngoqg hunam naag nukun, hoo ngoqg gumn nyet nulug xumk nam urab baqg nukun.

⁶‍Juda gvla Jerusalem nyiilungam bulug atwg door-doopw hoqgv bulam aadob mvpaq dvb Gwrik nyiilungam nulv puqpa kun.

⁷‍Kaato, ngo bulam nwqur tayin nulv bulam hog loq nyook hoqgv puqpa kun, hoo ngo nulug jinam mam nulug atwg dumpo aoho hookur mvtayin.

⁸‍Ngo nulug nyem-nyega ko tulungam Juda nyi tulug alaqho puqlwq tayin, hoo bulv bulam nyob aado bo Sabiyan nyookub puqtayin, hoggab At Sw goopa kun.

⁹Soq sam nyob tulug pengko ho pui dugaqto: nyob panam gab darxaqto; atorbo nyiilungam biur to. Nyob panbo nyiilungam nyob pakwb ogum hvvnwq mvto; bulam daqrab mvto.

¹⁰Nulug hal-tuqn nanam lyoqr orioq hvb jwwjab to, hoo nulug oxaqnan loodab pam nwwxob mvto, laanyi maanboam bemto, “Ngo nyob paky bo akv.”

¹¹Hwwiyiq doonbo nyob tulungv, nulv nyebia jaqb haato, hoo tolo nulv atv hookum to. Noqg nyob paky bo tulungam bookuml boato, At Swa.

¹²Nyob tulungam bulam atam nwqur mvm suto hoo Jehosapat lywpa ho haamto; hoggab tolo dootwl hwwiyuml doonbo nyob tulungam pw-hwwtayin.

¹³Pee-ngam gvbwqto, hoggab vliv ningyum paku. Wto, kwm-kor mvto, hoggab twwsv bwwr paku. Pwcw cwro lo toopoq-tooloq paku, hoggab bulug almanv koijaq paku.

¹⁴Pvvb mvk lywpa ho, mvqlw jaqpa, mvqlw jaqpa! Hoggab pvvb mvk lywpa ho At Swg aalv ogum hvvnwq paku.

¹⁵Doonyi la poolv kan twdwq paku, hoo takar tulungv huto huuk maadwn.

¹⁶Jaiyon hoqgv At Sw dugum gumdo, hoo Jerusalem hoqgv mwwg yalam dulin mvdo, hoo doa ngvla swcwngv hwqdin do. Hvbmabde mwwg nyiilu gab At Sw cwwgwnan akv, Israelwg nyiilu gab ceetornan akv.

¹⁷Nulug Pwnbo At Swv hvl nulv ngam cengtayin, ngoqg dvrwqbo puutu, Jaiyon lo ngo doon bov. Hoo Jerusalemv dvrwq tayin, hoo nyoodo nyiilungv nywywngam hoqb wpeq kuram.

¹⁸“Hoo hoq aalam puutu tulu hoqgv tiiswrbo twwsv dilintayin, hoo yorn tulungv gwwi tolin tayin, hoo Judag kucw-korongv issiv tomin tayin; hoo At Swg nombu hoqgv issiv buqlin lengtayin hoo Sittim lywpangam issiv tooyaq tayin.

¹⁹“Ijiptv haqpaqnam gob nyitayin hoo Idomv haqpaqnam deexa-rara akgob nyitayin, hoqgab Juda nyiilungam yolu-swcin dugam gab, hoggab bulv danyi nyiam bulug gvda lo ywlw-swtw twwpa ku.

²⁰Hvbmabde nwrba gob Judaho, hoo Jerusalemho nulug ko hotam mwlw nyiv dootayin.

²¹Ngo bulug hijum kwliam daqtayin, hog loq hijum mam ngo kwliam daqma taapwn, hoggab At Sw Jaiyon ho doodwn.”