Read Nyishi AMOS 2 Bible Online

AMOS 2 - Nyishi bible

AMOS 2

¹Soq sib At Sw bedo: “Moabg luum go nyixaqnam gab, hoo lwpy deenam gab, laqm-baqm deenam mam ngo nookur kuram, hoggab Idomg lvpw atwg alo tulungam mwv mui hvb gumnum.

²Hoqgab ngo Moab ao lo wmlo ak rwlwq tayin, hoo hoqhv Keriotwg cwwgwnanam guiyum tayin, hoo hur-matab ko pengko ho, kiir-magoqko pengko ho hoo tuuly yal dukho Moabv sitayin;

³Ngo pvvb bwwl doog boam hoq pengko hoqgv mvpaqtayin, hoo hoq lvpw atwg nyega mwlwngam mwwg lvgab mengtayin,” At Sw bedo.

⁴‍Soq sib At Sw bedo: “Judag luum go nyixaqnam gab, hoo lwpy deenam ham, laqm-baqm deenam mam ngo nookur kuram, hoggab bulv At Swg pvvbam haqpaq paku, hoo mwwg pvvb tulungam pvvl ap kuma, hvbmabde bulug vm mvvnamv bulam nyogaq gaqxar mvpa ku, hog loqb bulug ab tulungv wknum hoqb bulv wmin gvnum.

⁵Hoqgab Judangam ngo wm ak rwlwq tayin, hoo hoqhv Jerusalemwg cwwgwnanam guiyum tayin.

⁶‍Soq sib At Sw bedo: “Israelwg luum go nyixaqnam gab, hoo lwpy deenam laqm-baqm deenam mam ngo nookur kuram, hoggab bulv jvqtwngam rup gab puqnum, hoo pwma-cima bo tulungam samtaq ak gob puqnum—

⁷hiyv jwwgwg dumpongam diimwr urab cvvlynam hoo duqtwr duqn bo lamtangam daqyeqnam; nyi akv la mwwg abv nyijwr akin dookub wdwn, hoqgab ngoqg dvrwqbo eminam kacdvb mvpa kun;

⁸bulv yugw gwwxig bviywr lo dingrwl naaknum vj aoho bulv atv gel kargaq dvn, hoo hiyv galoqkv xoolin kunam opongam bulv bulug Pwnbo nam uraho twwdwn.

⁹“Hvbsujaqkam ngo su Amor nyiilungam bulug agaho twryum mvnum, hiyv aongv sidar svvn tulug hvbkalam aonam, hoo hiyv ok svvn tulug vdwnum hvbkalam vdw dvn; ngo mwwg aoho aaxiam la hoo mwwg niikum urag rwb tulungam twryum mvnum.

¹⁰Hoqhv ngo su hvraqb nulam Ijipt gv nyook hoqgv lvvgwb boolinl wgnum hoo vnyw campy go deexa-rara lo bool wgnum, Amor nyi tulug nyookam naam dvb.

¹¹Hoo ngo nulug ko tuup tulu gon nyiqry benbo tulungam swwrab mvnum, hoo nulug yaapa swwca bo tuugin dvrwqb swwm dvb mvnam. Soq sib nyima namyv, Israelwg nyi tulunga?” At Sw bibwqdo.

¹²“Hvbmabde dvrwqb swwm dvb xuqnam akkam nulv opo twwmnam, hoo nyiqry benbo tulungam gaml jil, ho begamv, ‘Nulv nyiqry bema bv.’

¹³“Kaato, igin ho vliam swwteq-swwteql swwlwqnam hvb, ngo nulam nulug nyook uraho swwlwq tayin.

¹⁴Kenbov nyebia jaqb kek hoqgv yuupaq tayin, hoo atorbov mwwg atoram turkur kuram, ho atorbov mwwg swwgam ywwlin nyoram;

¹⁵hiyv illiam bwwdwn hv daqnyi kuram, hoo hiyvg lvpiangv nyebia jaqb xardwn hv mwv atam ywwlin nyoram, ho hiyv svpur ho xardwn hvvkam mwwg swwgam ywwlin nyoram;

¹⁶hoo atorbo pengko ho hiyv hang haakam dvn hoq aalam talo tvl ketayin,” At Sw bibwqdo.