Read Nyishi AMOS 3 Bible Online

AMOS 3 - Nyishi bible

AMOS 3

¹Ijipt nyook hoqgv ngoqg boolinum imiq dvpar, Israelwg nyi tulunga, soq gomcwr sam tato, At Sw nulam ceekol agam goopa kun:

²“Swcw soqg imiq dvpar mwlw hoqgv nulam aro ngo cengtwq dvn; hoqgab nulug nyixaq mwlw gab ngo nulam laqm-baqm tayin.

³“Hwdlo bulv loomin suma bvnyiloqkam, nyi vnyiv lvkin gob wbam dvn yv?

⁴Hwdlo sony nyotv ces sam kaapa maaikam, mwv mooro lo dugum gumd nvi yv? Hwdlo sony nyot nyopa kov hog ak nootu majaqb, mwv lwwpwq hoqgv sogoq dvn yv?

⁵Hwdlo swcw aoso vd-gurw doomab, pvtangam hoqtu dvn yv? Hwdlo vd-gurwngv hog hoqma jaqb, beqsam dvn yv?

⁶Hwdlo bopamho tuuly miqyikam, hoo nyiilungv bos maad nvi yv? Hwdlo At Sw ham nyima bvnyiloq, ciqcaq-bviyaqkv bopamho haasam dvn yv?

⁷“Hoggab mwwg nyiqry benbo nyera tulungam mwwg mwwsnam mam bepor maad deedy dib Pwnbo At Sw hog nyima dvn.

⁸Sony nyot dugum gum yikam; hiyv bos maatayin? Pwnbo At Sw agam goop kunam mam; ham hiyv nyiqry belin nyomab pvvnyi dvn?”

⁹Asdod ho cwwgwnan tulungam hoo Ijipt gvdag cwwgwnan tulungam pui bekinto, hoo, “Samariyag puutu tuluho nulv atv hookum to hvl beto, hoo mwnwg ura vcjaqb hur-matab-nyinam mam, hoo mwnwg pengko ho nyijab-nyiyiqnam mam kaaka to.”

¹⁰At Sw bibwqdo, “hiyv yolu-swcinam la naalil naareqnam mam bulug cwwgwnanho poocuml apbov” “lootwngam hoggub nyiyin dvn ham bulv cengma.”

¹¹‍Hoqgab soq sib Pwnbo At Sw bedo: “Hoo nyookam ceebiongv hwwiyum tayin hoo nulug cwwgwnanam nulug hoqgv mvgeq tayin, hoo nulug cwwgwnam tulungam mviyaq-mvcaq dvb nyitayin.”

¹²‍Soq sib At Sw bedo: “Sviya rvky bov hoggub sony nyotwg agam hoqgv lvpia lwnyiam maalo nyuru ruugwn ywwlinam hvb, hiyv Samariya ho doonbo Israelwg nyiilungam, dootamnan cuurwngam la kartaqnan gojaqkam ywwlin tayin.

¹³“Tato, hoo Jakubg dvparam ceekol pui baqto,” mwlwg Pwnbo akv, Pwnbo At Sw bibwqdo,

¹⁴“hoq aalam Israelam mwwg nyimurnam tulu gab ngo laqm-baqm dvn, Betwl yugw tulungam ngo mvpia tayin, hoo yugwg vrrw tulungam papaq tayin hoo kedho yoqp tayin.

¹⁵Tapam poolwg la dug poolwg nam tulungam ngo mvpia tayin, hoo kwlwq-kvlaq dvb nam mvnam tulungv yuupaq tayin, hoo nam namtbo tulungv nyiita yukun,” At Sw bibwqdo.