Read Nyishi AMOS 4 Bible Online

AMOS 4 - Nyishi bible

AMOS 4

¹“Basanwg svv hvvn tulu, soq gomcwr sam tato, hiyv Samariyag puutu aoho doon bov, hiyv jwwgw boam nyijab-nyiyiqbov, hiyv pwma-cima boam mvnyi-mviya bov, hiyv nulug nyol tulungam, bedwn, ‘Bwato, ngulv twwtayin!’

²Pwnbo At Sw mwwg dvrwq hoqgv dingr pakun ho, kaato, nulug aoho moodv hoodu do, hwdlo bulv nulam vkarv lvgab aadob seel wtayin, nulug vtwr-anya akkam kam ngui vkar lvgab hoqtu tayin.

³Hoo nulv taqbo ung tulu hoqgv lvvgwb, vx-cerv dinda jaqb wtayin; hoo nulam Harmon urab joolwq tayin,” At Sw bibwqdo.

⁴“Betelwb haal, hoo nyimur dvn; Gilgal ho, hoo naleqgo nyimur dvn; ar roxiam nulug pwr jinam mam, loum deen aal looxiam nulug jibwqnam akiam bwa jito;

⁵nuunbo wtwngam paqyalinco hvl aky pwrwb jito, hoo hang mwab aky jinam tulungam pui bekarto, hoggab nulv ham nyidwb aby dvn, Israelwg nyi tulunga!” Pwnbo At Sw bibwqdo.

⁶“Nulug bopam mwlwho ngo nulug exiam dvrwq dvb doom tukun, hoo nulug nyook mwlwho dvs dooma dvn, hvbsujaqkam nulv ngoqg dookub hookur maanum.” At Sw bibwqdo.

⁷“Hwdlo vly naasv pool borum gob dooxiq yikho ngo nyodongam kam nulgab hom kumanum; ngo bopam akwn ho nyodongam hom dvn, hoo bopam akwn ho nyodongam hom mvma dvn; rongo rwqgwn ho nyodongam hom dvn, hoo nyodo hoiyaq maanam rongongv sengknam;

⁸hoqgab bopam vnyi-oum gon asaq bopam ho iss twws gab gaqkarl yvnum, hoo bulv xumt maadwn; hvbsujaqkam nulv ngoqg dookub hookur maanum,” At Sw bibwqdo.

⁹“Nulam dooi-palam hoo dwr-pee lvgab ngo jwwnum, nulug boolu mwlwngam la roo boolungam, nulug tao svvnam la olib svvn tulungam komar takamv dwtwrnum, hvbsujaqkam nulv ngoqg dookub hookur maanum,” At Sw bibwqdo.

¹⁰“Ijipt ho kanamnam hvb ngo nulug pengko ho dwr-peengam kanamnum; ngo nulug swwca bo nyiilungam lyoqr orioq lvgab mengnum, hoo nulug svpur tulungam aadob boopaqnum, hoo ngo nulug nyupumho nulug svmcwg naaiyangam suupa mvdwb mvnum; hvbsujaqkam nulv ngoqg dookub hookur maanum,” At Sw bibwqdo.

¹¹“Pwnbo hoggub Sodom mam la Gomorrangam mengpaqnum hvb, ngo nulug nyi tuugin mengpaqnum, hoo nulv wm gudunam mutungam wm hoqgv seqlinam mutu hvb nyinum; hvbsujaqkam nulv ngoqg dookub hookur maanum,” At Sw bibwqdo.

¹²“Hoqgab Israela, nulam ngo hog ak nyitayin; hoggab soq sam nulam ngo nyitayin, Israela, nulam Pwnbon kvvrwq dvb mwx-mvaqto!”

¹³Hoggab kaato, mwv su puutu tulungam hoo dooiyam bvl pwlin bov, hoo mwwg mwwnam mam nyia koam bibwqnam, hiyv ar komcam kan dvb mvdwn, hoo swcw nvg aoso wgaq dvn- mwlwg Pwnbo, At Sw, hv mwwg eminv!