Read Nyishi AMOS 5 Bible Online

AMOS 5 - Nyishi bible

AMOS 5

¹Israelwg dvpara, nulgab ngoqg nyix-riirabnam gomcwr sam tato:

²“Israelwg mvvngamv, yoql paku, lokam gorab kuram; mwnwg nyookam haqpaq paku, akjijaqkam mwnwn purabo dookma.”

³Hoggab soq sib Pwnbo At Sw bedo: “Israel dvparwg bopam hoqgv lwwyw go lvvgwb lengsnum hvbmabde lwwkin go dootayin, hoo lwwg lvvgwb lengnum hvbmabde camg dootayin.”

⁴Hoggab soq sib At Sw Israelwg dvparam bedo: “Ngam meegaqto hoo swwto;

⁵hvbmabde Betelam meegaq maabv, hoo Gilgal urab haamabv ho Birsebab korbo maabv; hoggab Gilgalv hoggub nyijaqkam nyumwb wtayin, hoo Betelv hog akkam dookram.”

⁶At Swn meegaq to hoo swwto, hvbmab nyiloqkam mwv Josapg namho wm gulinam hvb gulin tayin, hoo hoqhv Betelam guiyum tayin, ho ham mwmiqbo akkam dooram,

⁷Oa nulv jvqtwngam tvcw svvpo gob mvnbov hoo jvqtwngam ked lo joopaq bov!

⁸Hiyv Peliyades samla Oriyon-ngam mvnum, hoo kan twdwqkam arkomc gob mvnbov, hoo aalam lvpangam aikan gob mvnbov, hiyv sa-svlog iss gab goqdwn hoo ham swcw nvg aoso toolin mvdwn, mwwg eminv At Sw;

⁹atorboam ceekol oyu-aca bioqlin mvdwn, hoqgab gurum aoho oyu-acanamv haadwn.

¹⁰‍Hiyv toggoqho yolu ruqdwn bulv mwam hang baqdwn, hoo hiyv jvqtwngam goodwn bulv mwam haqpaq dvn.

¹¹Hoqgab nulv jwwgw boam caajab dvn hoo nulv mwwg galoqkv ammam naabin-naalinl naareq dvn, nulv wlw taqnam lvgab nam tulungam mvpa ku, hvbmabde nulv hoq nam tuluho dooparam; nulv dengky bo roo boolungam liip paku, hvbmabde nulv bulug alangam twwpa ram.

¹²Hoggab nulv nyimurv hog hwd pakun ham ngo cengdwn hoo nulug nyicv hog hwdgo koi dvn-nulv lootw boam duqtwr duqm dvn, hiyv kam naadwn, hoo dwc-twwpw maanboam toggoqho mvtur dvn.

¹³Hoqgab hiyv mwwlaq dvn hoq moodam cooikab dootayin, hoggab soq svk mood si alman moodv.

¹⁴Alboam meegaqto, hoo alman boam meegaq yo, ho nulv swwl dookam yinpv; hoo nulv beknam hvbkalam, mwlwg Pwnbo, At Sw, nulug lvgab dootayin.

¹⁵Alman boam oyum to, hoo alboam aby to, hoo toggoqho jvqtwngam doomto; hoqhv lokam mwlwg Pwnbo, At Sw, Josapg dvpar hoqg boumnam mam anya mwwpa tayin.

¹⁶Hoqgab soq sib nyiit Pwnbo, At Sw bedo: “Mwlw cuukiq-bvvrw ho mwwdwql xabnamv dootayin, hoo bulv koxio-rorwl lyobu buuxy ho bei nvpv!’ Rongo mvnbo tulungam bulv nyix-riin gob hoo hiyv nyix-riinamho pwbw dvn, ham mwwdwql xobdul doonbo gob goqtayin,

¹⁷hoo roo boolu mwlwho mwwdwql xabnamv dootayin, hoggab ngo nulug pengko ho wpeq tayin,” At Sw bedo.

¹⁸Nulv mwwdwq nvka hiyv At Swg aalam mwwby dvn! Hoggab nulv At Sw aalam kaapa nwwdwn? Hoqhv kan twdwq dvn, hoo huto maadwn,

¹⁹nyi akv sony nyot ak hoqgv kenum, hoo sutum ak mwam wrwqnum, ho nam urab haanum hoo mwwg alaqkv bvly ho nwwdaqnum, hoo tvb soog mwam cennum.

²⁰At Swg aalv kan twdwq maad nvi yv, hoo huto maadwn, hoo doomwq-dooiyaml hoqhv huto malo maadwn?

²¹“Nulug soominl dvnam twwnam tulungam, ngo oyum dvn, hoo nulug piwr jwr-jwr dvb dookum nam tulungam ngo hemp mwwpa maadwn.

²²Nulug boyuqnam akiam la am akiam nulv ngam jisjaqkam, ngo hoq tulu ham loorwqram; hoo nulug jwwtw bo svdin tulungam swrso akib jisjaqkam, ngo hoq tulu ham kaagab ram.

²³Nulug ruuj-pumj dvb bemin benam mam ngoqg galoqkv naapaq to, nulug tangam dvb rwwxw-gungga mvnam mam ngo taram.

²⁴Hvbmabde jvqtwngam iss tol wnam hvb haamto, hoo lootwngam tol dooky bo pobu hvb tomto.

²⁵“Israelwg dvpara, deexa-raraho vnyw campy moodho nulv ngam pwram la akiam bwa jin mvi yv?

²⁶‍Sikkutnvn nulug lvpw atwb, hoo Kiyyunnvn nulug takar ui gob nulv naarab tayin—atam kvvyw-tada dvb nulv atwg guss sam mvsnum,

²⁷‍hoo Damaskaswg lvvg alo ngo nulam nyumwb boomtayin,” At Sw bedo, hiyvg eminv mwlwg Pwnbov.