Read Nyishi AMOS 8 Bible Online

AMOS 8 - Nyishi bible

AMOS 8

¹Soq siilaq Pwnbo At Sw ngam kaakinum: kaato, og moodwg aaxy huc cig.

²‍Hoo mwv benum, “Amos, hoggv no kaapa do?” Hoo ngo benum, “Og moodwg aaxy huc cig.” Ho At Sw ngam benum, “Ngoqg Israel nyi tulug nyem-nyol cidy moodv haapa ku; ngo nywywngam bulam lokta korbol wram.

³Dvrwqbo namlog beminv hoq aalam sigin ginam gob nyitayin,” Pwnbo At Sw bibwqdo. “Svma naleqdo!” “Nyootaq mwlwho bulam joopaq-jooiyaq pa!” “Jimy-jema kunum!”

⁴Sam tagabto, nulv hiyv dwc-twwpw maan boam caajabbov hoo jwwgwbo gvdangam twryum mvnbov,

⁵begamv, “Hwdlo yu nitib pool karlin bov sita yukun, ho ngulv am sam puqd kub? Hoo hwdlo yu Doonu de aalv, ho ngulv wtw ammam puqm dukub jitayin, ho ngulv korsam anyongam koi dvb hoo koiyam anyo dvb mvdwb hoo surjaqb xiqw-xitol xinnan lvgab xidwb,

⁶ho ngulv jwwgw boam rup hoqgv rvdwb hoo dwc-twwpw maan boam samtaqnan ak hoqgv rvdwb hoo wtw am ampam puqd kub?”

⁷Jakubg larnam mam At Sw dingr pakun; “Hoggub nyijaqkam ngo bulug bon nyinam tulungam nywywngam mwwpaq laram.

⁸Gvdangv soq pagoq gab tvmdwr ramyv, hoo hoqho doonbo nyiicwr-cwrxiv nyix-riiram yv, hoo hog mwlwngv Nail pobu hvb torab ramyv, hoo nuukub-nuuxeqnum hoo lokta xoa ramyv, Ijipt gv Nail pobu hvb?”

⁹“Hoo hoq aalam, “Pwnbo At Sw bibwqdo, “Ngo aal-lvpangam doonyiam haam dvb mvtayin hoo aal lvpa hutongam swcw so kan dvb mvtayin.

¹⁰Ngo nulug dvmin-twwminl soonam mam nyix-riinam gob mvtayin hoo nulug bemin mwlwngam nyix-riinam gob nyitayin; ngo nyi vxig hwwpo ho tuila vjam hwwlwq mvtayin hoo vxig dumpongam dungxo lool dvb mvtayin; ko tuup akin gab nyix-riinam hvb hoqham ngo mvtayin hoo kacaq-bviyaqbo aal hvb hoqham nyitwr-nyinya mvtayin.

¹¹“Kaato, moodv hoodu do,” Pwnbo At Sw bibwqdo, “hwdlo ngo gvda so dwr-ak kanam tayin- hv dvs-twws gab dwr ma; hvbmabde At Swg gomcwram tapa maanam dwrv.

¹²Bulv sa-svlog gon hoqgv sa-svlog gonwb gaql yvtayin, hoo nyoodum hoqgv dou-caga nagub; At Swg gomcwram meegaql, bulv yordum-yorkob xargaq tayin, hvbmabde bulv sam kaapa ram.

¹³“Hoq aalam kangam bo mvvngam mvla yaapa swwca bo nyiv hvngwrl swnyiq-svnyiaq tayin.

¹⁴Hiyv Samariyag nyixaqkam dingrbov, hvl bedo, ‘Dananga, nulug pwnbo swwnam hvb; hoo Bersebag swwl doonam hvb; bulv yuupaq tayin, hoo nywywngam lokta gorab ram.”