Read Nyishi AMOS 9 Bible Online

AMOS 9 - Nyishi bible

AMOS 9

¹Ngo At Swn yugw bviywr ho daqdwb kaapanum, hoo mwv benum: “Jurpy lwqk sojangv hwqdin maady deedib, dumtup purlwqnam tulungam jwwdin to, hoo hoq tulu ham nyiilu mwlwg dumpo aoho yaqjab mvto; hoo hiyv doonyu tayin ham ngo lyoqr orioq hoqgv meng tayin; bulv akjijaqkam aadob keleqram; bulv akjijaqkam keleqram.

²“Bulv Sux-ywlwb ung dulwql sujaqkam, ngoqg alaqkv bulam boloqkv naalin tayin; bulv doa tol geeca sujaqkam, toloqkv ngoqg bulam boopoq tayin.

³Bulv Karmelwg puutu aoho kvs jaqkam, toloqkv ngo bulam meelin layil hoo bulam bootayin; hoo ngoqg kaaga soqgv sa-svlo niikum bol kvs jaqkam, bolo ngo tvbam gaml jilin tayin hoo hoqhv bulam cetayin.

⁴Hoo bulug ceebio tulungv bulam nyuum nootul boobaloqkam, ho ngo lyoqr orioqkam gaml jilin tayin; hoo hoqhv bulam meng tayin; hoo bulug aoho ngoqg vnyiqkv rogab tayin almanbo gab hoo albo gab ma.”

⁵Mwlwg Pwnbo At Sw, mwv swcwngam idaqdvn hoo hv jiqdwn, hoo hoqho doonbo mwlwngv nyix-riinum, hoo hog mwlwngv Nail pobu hvb torabnam, hoo lokta Ijipt gv Nail pobu hvb xoa dvn;

⁶hiyv doangam mwwg odum pwqlwb mvdwn hoo swcw aoso mwwg atorbo pwqlwb mvdwn; hiyv sa-svlo issam goqdwn hoo swcw nvg aoso bulam toopoq jidwn- mwwg eminv At Sw.

⁷“Nulv ngoqgab Kus nyi tulu hvb nyima yv, Israelwg nyi tulunga?” At Sw bibwqdo, “Ngo Israelam Ijipt gvda hoqgv, hoo Palistan nyiilungam Kaptor hoqgv hoo Siriya nyiilungam Kir hoqgv boolin maan mvi yv?

⁸Kaato, Pwnbo At Swg vnyiqkv nyicbo lvpw hatig aoho kaado, hoo ngo nyook aosoqgv hoqham twrtayin, hvbmabde ngo Jakubg dvparam twryum ram,” At Sw bibwqdo.

⁹“Hoqgab kaato, ngo gaml jitayin, hoo nyob asaq pengko ho Israel dvparam hiixub tayin nyi akv pee lvgab hiixub namhvb, hvbmabde swcw ho hwr cigkam yoqp ram.

¹⁰Ngoqg nyi tulu nyic nyinbo mwlwngv lyoqr orioq lvgab sitayin, hiyv bedwn, ‘Ngulam ciqcaq-bviyaqkv ruqtin ram ho ngulam wrwqram.’

¹¹Hoq aalam ngo Debidg nomcum tabto boam tuurab tayin hoo hog yaqpia boam mvdar tayin, hoo hog yaqpia — yaqya bo tulungam daqrab mvtayin hoo hoqham otuq hvb mvdar tayin,

¹²ho ngoqg eminam goqnbo nyob mwlwngv, bulv Idomg boumnam mam otub nvvsiq yinpv,” At Sw bibwqdo hiyv soq sam nyidwn.

¹³“Kaato, moodv hoodu do,” At Sw bibwqdo, “hwdlo rongo tuqnbo nyiv vly naan boam tuqreq tayin hoo roo liinbov mwv roo aaxiam kwm-kor mvtayin; puutungv tiiswrbo twwsam dilin tayin hoo yorn mwlwho hoqhv tol tayin.

¹⁴Ngoqg Israel nyi tulug nvtaqnam mam ngo jikur tayin, hoo bulv yuupaqbo bopam tulungam mvdar tayin hoo bulv ho dootayin; bulv roo boolungam liitayin hoo hoqg alangam bulv twwtayin, hoo bulv boolu mvtayin hoo bulug aaxiam dvtayin.

¹⁵Ngo bulam bulug ked ho swwm tayin, hoo ngo bulam jiknum gvda hoqgv bulam nywywngam lokta buusuq kuram,” nulug Pwnbo At Sw bedo.