Read Nyishi JONA 1 Bible Online

JONA 1 - Nyishi bible

JONA 1

¹Amittai gv ko tuup Jonanvn At Swg gomcwrv haanum, hoo benum,

²“Gorabto, Nenibib wno, hoq bopam hv koijaq dvn hoo ham sigv hvl sogoq goqpa ta, hoggab bulug almab nyinamv ngoqg aga si cvvc paku.”

³‍Hvbmabde Jona gorab layil At Swg aga hoqgv Tarsis yaab keleqnam. Mwv Joppa yaab innv hoo Tarsisib wdy bo iss Jaaj ak kaapanum. Ho mwv wjongam hiqpel hoo jaaj aob caanum, bulug lvgab Tarsisib At Swg aga hoqgv wleq dvb wnam.

⁴‍Hvbmabde At Sw koi albo doogum-dooi ak sa-svlo aoho ywmnam, hoo sa-svlo aoho ator loodab doogum-dooiyv yinum, hoqgab jaajv duptanum.

⁵‍Ho mvbeqbo tulungv bosnum, hoo vxiv mwwg pwnbon sogoql xabnum. Hoo iss jaajam hvrab mvdwb (bulgab hvrab mvdwn) bulv iss jaaj hoq dupum-dvrab baqnam mam sa-svlo urab joopaqnam. Hvbmabde Jona iss jaaj niikum ura jaqb haanv vcjaqb yubngaql yubdunum.

⁶‍Ho keptenv haanv mwam benum, “No hog mvl so yubl doodwn? Gorabto, noqg pwnboam goqto! Hvbkam nyikam suiyv Pwnbo ngulam pagoq ak kaakin tvl, ho ngulv simab nyikam yinpv.”

⁷‍Hoo bulv akwn-akwn bemin sunum, “Haato, kuj ngulv tak kaalin kaatuj, hiyv pagoq gab soq alman si ngulug aoso haapan.” Ho bulv tak kaanam, hoo Jonag eminam tak kaalin kunum.

⁸‍Hoq kokwb bulv mwam benum, “Ngulam betam to hog pagoq gab soq alman si ngulug aoso haapan. No hog nvkv nyidwn? Hoo no hogloqkv haai yin? No hogloq gvda gv? Hoo no hogloq nyi hoolu gv?

⁹‍Hoo mwv bulam benum, “Ngo Hibru nyiv, hoo ngo ao lvpwg Pwnbo At Swn bos bov, hiyv sa-svlongam la kedam bvl pwnboam.”

¹⁰‍Hoq kokwb nyiilungv vc-loodab bosnv hoo mwam benum, “No hoggv nyijtvl soq si nyipa kun!” Ho mwv At Swg aga hoqgv kidul doodwn hvl, mwv bulam betamnum hoqgv nyiilungv cengknum.

¹¹‍Hoq kokwb bulv mwam benum, “Nam ngulv hoggub mvbnyiloqkam, ngul gab sa-svlo si hwqngin yindo?” Hoggab sa-svlongv vc-vc yaiyab hwqrabnum.

¹²‍Mwv bulam benum, “Ngam joorab gvdwl sa-svlo urab hurlwqto, hoq kokwb sa-svlongv nulgab hwqngin tayin, hoggab ngo cengdo soq koijaqb doogum-dooi nulug aoso haanam si hvbnyiloqkam ngoqg nyixaq ko-gab.”

¹³‍Hvbsujaqkam, nyiilungv haator jaqb ked pwtwb jaajam wkur dvb aljaqb piokanum, hvbmabde bulv nyila kumanam, hoggab sa-svlongv koi-koi yaab bulam ceekol hwqrab kunum.

¹⁴‍Hoqgab bulv At Swn goqnum, “At Swa, soq nyi sam sim gamgab ngulam yuupaq mvmabv, hoo mwwg hijum gab ngulam gorgy tolwq maabv, noqg gab, At Swa, noqg mwwlwqkob sam nyin tuku.”

¹⁵‍Ho bulv Jonanvn joorabnum hoo mwam sa-svlo urab joolwqnum, hoo sa-svlongv hwqnam hoqgv hwqngin kunum.

¹⁶‍Hoq kokwb nyiilungv vc-loodab At Swn bosnum, hoo bulv At Swn pwr aky jinv dingrnum.

¹⁷‍Hoo At Sw ngui cwrt rara bo ak Jonanvn dvmeq mvdwb xuqlin apnum. Hoo Jona ngui aiyeq uraho aal loum gola ai yubum go doonum.