Read Nyishi XINAM 1 Bible Online

XINAM 1 - Nyishi bible

XINAM 1

¹Ijipt gvda hoqgv bulug lengknamv vnyw nywnyi gola pool bvrnyig otuq aal yikho, kvvrwq minsko tombu ho, At Sw Mojesnvn Sinaig deexa-raraho agam goonv begamv,

²“Israel nyiilug dvpar mwlwngam xika to, nyob tulungam, ab vxig imiq dvparam, tuup nyiimin vxiam, hoo dumpo pwxiam xika to.

³‍Israel ho nyob palaq deenbo nyi mwlwngam vnyw camnyi akambo hoqgv naarab layil hoq odum mam no la Aaron bulam dvpar pam-pamwb xikal xikum to.

⁴‍Hoo imiq dvpar pvrx hoqgv peelo bo akv, nulug lvgab nyob vx-cwr hoqgv nyi ak-akwb yvmin gvtayin.

⁵‍Hoo soq nyi tulu si nulam svka ming tayin. Reuben hoqgv Sedeurg ko tuup Elijur;

⁶‍Simeon hoqgv Jurisaddai gv ko tuup Selumiyel;

⁷‍Juda hoqgv Amminadabg ko tuup Nahson;

⁸‍Issakar hoqgv Juar gv ko tuup Netanel;

⁹‍Jebulun hoqgv Helonwg ko tuup Eliyab;

¹⁰‍Josap gv ko tuup tulu hoqgv, Iprayim hoqgv Ammihud gv ko tuup Elisama, hoo Manasse hoqgv Pedajur gv ko tuup Gamaliel;

¹¹‍Benjamin hoqgv Gideoni gv ko tuup Abidan;

¹²‍Dan hoqgv Ammisaddai gv ko tuup Ahiejer;

¹³‍Aser hoqgv Okran gv ko tuup Pagiel;

¹⁴‍Gad hoqgv Deuel gv ko tuup Eliyasap;

¹⁵‍Naptali hoqgv Enan gv ko tuup Ahira.”

¹⁶‍Soq tulu sam Israelwg nyob dvparam bon nyig mvdwb, bulug ab tulug imiq hoqgv peelo gob xuqlin kunum.

¹⁷‍Mojes la Aaron soq emin mingnum nyi tulu sam naanum,

¹⁸‍hoo pool bvrnyig otuq aalho dvpar mwlwngam goqkum tvl hookum mvnum, ho vnyw camnyi akam bo hoqgv naarab layil hoq odum mwlwngam bulv atv nyiip-nyiipam bulug ab imiq dvpar hoqg nyobam emin xiqlwqnum,

¹⁹‍At Sw Mojesnvn gaml bekjaqb mwv Sinai deexa-raraho bulam emin xeqnum.

²⁰‍Israelwg ko tuup vbw cociq Reubenwg nyiilungam, bulug hotam tulungam, bulug nyob tulungam, bulug ab imiq dvparam nyiip-nyiipam ho dumpo pwxiam nyega ko hiyv nyob palaq deenboam vnyw camnyi hoqgv naarab layil hoq odum mam emin xiqtunum:

²¹‍Reubenwg nyob hoqgv emin xiqlwq kunamv 46,500 kunum.

²²‍Simeonwg nyiilungam, bulug hotam tulungam, bulug nyob tulungam, bulug ab imiq dvparam nyiip-nyiipam ho dumpo pwxiam nyega ko hiyv nyob palaq deenboam vnyw camnyi hoqgv naarab layil hoq odum mam emin xiqtunum:

²³‍Simeonwg nyob hoqgv emin xiqlwq kunamv 59,300 kunum.

²⁴‍Gadwg nyiilungam, bulug hotam tulungam, bulug nyob tulungam, bulug ab imiq dvparam nyiip-nyiipam ho dumpo pwxiam nyega ko hiyv nyob palaq deenboam vnyw camnyi hoqgv naarab layil hoq odum mam emin xiqtunum:

²⁵‍Gadwg nyob hoqgv emin xiqlwq kunamv 45,650 kunum.

²⁶‍Judag nyiilungam, bulug hotam tulungam, bulug nyob tulungam, bulug ab imiq dvparam nyiip-nyiipam ho dumpo pwxiam nyega ko hiyv nyob palaq deenboam vnyw camnyi hoqgv naarab layil hoq odum mam emin xiqtunum:

²⁷‍Judag nyob hoqgv emin xiqlwq kunamv 74,600 kunum.

²⁸‍Issakarwg nyiilungam, bulug hotam tulungam, bulug nyob tulungam, bulug ab imiq dvparam nyiip-nyiipam ho dumpo pwxiam nyega ko hiyv nyob palaq deenboam vnyw camnyi hoqgv naarab layil hoq odum mam emin xiqtunum:

²⁹‍Issakarwg nyob hoqgv emin xiqlwq kunamv 54,400 kunum.

³⁰‍Jebulunwg nyiilungam, bulug hotam tulungam, bulug nyob tulungam, bulug ab imiq dvparam nyiip-nyiipam ho dumpo pwxiam nyega ko hiyv nyob palaq deenboam vnyw camnyi hoqgv naarab layil hoq odum mam emin xiqtunum:

³¹‍Jebulunwg nyob hoqgv emin xiqlwq kunamv 57,400 kunum.

³²‍Josap gv ko tuup tulu hoqgv, Iprayimg nyiilungam, bulug hotam tulungam, bulug nyob tulungam, bulug ab imiq dvparam nyiip-nyiipam ho dumpo pwxiam nyega ko hiyv nyob palaq deenboam vnyw camnyi hoqgv naarab layil hoq odum mam emin xiqtunum:

³³‍Iprayimg nyob hoqgv emin xiqlwq kunamv 40,500 kunum.

³⁴‍Manasseg nyiilungam, bulug hotam tulungam, bulug nyob tulungam, bulug ab imiq dvparam nyiip-nyiipam ho dumpo pwxiam nyega ko hiyv nyob palaq deenboam vnyw camnyi hoqgv naarab layil hoq odum mam emin xiqtunum:

³⁵‍Manasseg nyob hoqgv emin xiqlwq kunamv 32,200 kunum.

³⁶‍Benjaminwg nyiilungam, bulug hotam tulungam, bulug nyob tulungam, bulug ab imiq dvparam nyiip-nyiipam ho dumpo pwxiam nyega ko hiyv nyob palaq deenboam vnyw camnyi hoqgv naarab layil hoq odum mam emin xiqtunum:

³⁷‍Benjaminwg nyob hoqgv emin xiqlwq kunamv 35,400 kunum.

³⁸‍Danwg nyiilungam, bulug hotam tulungam, bulug nyob tulungam, bulug ab imiq dvparam nyiip-nyiipam ho dumpo pwxiam nyega ko hiyv nyob palaq deenboam vnyw camnyi hoqgv naarab layil hoq odum mam emin xiqtunum:

³⁹‍Danwg nyob hoqgv emin xiqlwq kunamv 62,700 kunum.

⁴⁰‍Aserwg nyiilungam, bulug hotam tulungam, bulug nyob tulungam, bulug ab imiq dvparam nyiip-nyiipam ho dumpo pwxiam nyega ko hiyv nyob palaq deenboam vnyw camnyi hoqgv naarab layil hoq odum mam emin xiqtunum:

⁴¹‍Aserwg nyob hoqgv emin xiqlwq kunamv 41,500 kunum.

⁴²‍Naptalig nyiilungam, bulug hotam tulungam, bulug nyob tulungam, bulug ab imiq dvparam nyiip-nyiipam ho dumpo pwxiam nyega ko hiyv nyob palaq deenboam vnyw camnyi hoqgv naarab layil hoq odum mam emin xiqtunum:

⁴³‍Naptalig nyob hoqgv emin xiqlwq kunamv 53,400 kunum.

⁴⁴‍Soq emin xikal xiqlwqnam tulu sam Israelwg camleq vnyi dvpar hoqgv xuqlinam nyi camleq vnyi hv Mojes la Aaronnvn svka nv bulug ab tulug imiq dvparam emin xiqlwq mvnum.

⁴⁵‍Hoqgab Israel nyiilug dvpar mwlwngam emin xiqlwq kunum, bulug ab vxig imiq dvparam, nyob palaq deenbo vnyw camnyi akambo hoqgv naarab layil hoq odum mam xikum kunamv—

⁴⁶‍mwlwngam xikumnamv 603,550 kunum.

⁴⁷‍Hvbmabde Lebi nyi tulungam bulam bulug ab tulug imiq dvpar nyob emin xeqk ho xiqlwq maanum.

⁴⁸‍Hoggab At Sw Mojesnvn agam goonv begamv,

⁴⁹“Lebi nyob tulu arongam no emin xeqk ho xeqtaq maabv, hoo no Israel nyiilug pengko ho emin xeqyikam bulam xeqtaq maabv.

⁵⁰‍Hvbmabde Lebi nyi tulungam xumk pirrwg pvvb uddum mam kaam dvb jito, hoo xumk pirr hoqg nyiyi-nyicangam hoo hoqho dupum-dvrab nyinan mwlw ham kvvyw-tada mvdwb jito. Bulv xumk pirram jootayin hoo hoqg hog mwlwngam koocum-tapil, hoo bulv ham kaal doog tayin, hoo gaml xumk pirram hwwiyuml doog tayin.

⁵¹‍Hwdlo xumk pirram svmcw hoqgv girab tayin Lebi nyi tulungv ham saiyaq dvb nyitayin, hoo hwdlo xumk pirram diirab tayin, ham Lebi nyi tulungv diirab tayin. Hoo asaq nyiv hoqho ogumb hvvnwq baloqkam, mwam mengtayin.

⁵²‍Israel nyiilungv bulug dvparwg tombungam diirab tayin, nyiicwr-cwrxiv mwwg svmcw ho tombungam mvtayin hoo nyiicwr-cwrxiv mwwg at-atwg mwwlwq koob mvl dootayin.

⁵³‍Hvbmabde Lebi nyi tulungv xumk pirrwg pvvb uddum bviywrho svmcw mvl dooiyiq tayin, ho hvb nyib nyiloqkam Israel nyiilug dvpar pengko ho hang lingtwrnamv dooram. Hoo Lebi nyi tulungv xumk pirrwg pvvb uddum mam rvkil kaal doog tayin.”

⁵⁴‍Soq sib Israel nyiilungv nyiknum; At Sw Mojesnvn gaml benam mwlwngam bulv nyiknum.