Read Nyishi XINAM 10 Bible Online

XINAM 10 - Nyishi bible

XINAM 10

¹At Sw Mojesnvn agam goonv begamv,

²“Rup tuuly loq vnyi go mvto. Kvnyi lvgab hoq tulu ham no mvto, hoo ham nyi dvparam goqkum nad bvla svmcwngam sapia yin miqn to.

³‍Hoo hwdlo vnyi-vnyiam miqyikam, nyi dvparam kvvrwq minsko tombu haagaho bulam atam noqg dookho hookum mvtayin.

⁴‍Hvbmabde akin gon miqyikam, Israelwg nyob tulug peelo bo tulungv atv noqg dookho hookum sutayin

⁵‍Hwdlo nulv tacin dvb miqyikam, dou-cagag svmcwngv wrab tayin.

⁶‍Hoo hwdlo nulv tacin dvb lwnyi dvb miqyikam, nyooko daiyag svmcwngv wrab tayin. Hwdlo jaqkam tuuliv tacin dvb miqyikam bulv wrab tayin.

⁷‍Hvbmabde hwdlo mwlwngam lvkin gob hookum mvdwb mwwikam, nulv tuuliam miqso koiyol miqto, hvbmabde nulv tacin dvb dumabv.

⁸‍Hoo nyub Aaron gv ko tuup tulungv tuuliam miqtayin. Tuuly miqnam sam gaml gob nulug hotam-hotam xaqb nyitayin.

⁹‍Hoo hwdlo nulv nulug gvdaho nulam nyijab-nyiyiq boam nyob paikam, nulv tuuly lvgab tacin dvb miqtayin, ho nulam nulug Pwnbo At Sw agaho mwwpa dvb nyiyi nvpv, hoo nulug ceebio tulu hoqgv nulam ywwtayin.

¹⁰‍Nulug hwnyir-hvmar aalam kam, hoo nit pool karlin yukam nulug sookuml soomin dvb xuqlinl apkunam aalam, nulug boyuqnam akiam la swrso pwr akiam jiyikam nulv tuuliam miqtayin. Hoq tuluhv nulug Pwnbo agaho nulam mwwpa tayin: ngo nulug Pwnbo At Swv.”

¹¹‍Vnyw nywnyig, pool bvrnyig, aal camnyi yukho, doomwqkv xumk pirr aog pvvb uddum pvvk hoqgv hwrab kunum,

¹²‍hoo Israel nyiilungv pam-pamwb Sinai deexa-rara hoqgv wrab kunum. Hoo doomwqkv Paran deexa-raraho hwrnunum.

¹³‍At Sw Mojesnvn gaml jikwb bulv wt-wlul wrab kunum.

¹⁴‍Otuqcob Judag svmcw hoqg nyiilungv bulv dvpar gob nyitwl wrab coonum, hoo Amminadab gv ko tuup Nahson bulug dvparam peelo gob nyil wgnum.

¹⁵‍Hoo Issakarwg nyob dvpar nyiilungam Juar gv ko tuup Netanel peelo gob nyil wgnum.

¹⁶‍Hoo Jebulunwg nyob dvpar nyiilungam Helon gv ko tuup Eliyab peelo gob nyil wgnum.

¹⁷‍Hoo hwdlo xumk pirram sageq yukho, Gersonwg ko tuup tulungv la Merarig ko tuup tulungv xumk pirram jool wrab gvknum.

¹⁸‍Hoo Reubenwg svmcw hoqg nyiilungv bulv dvpar gob nyitwl wrab kunum, hoo Sedeurg ko tuup Elijur bulug dvparam peelo gob nyil wgnum.

¹⁹‍Hoo Simeonwg nyob dvpar nyiilungam Jurisaddai gv ko tuup Selumiyel peelo gob nyil wgnum.

²⁰‍Hoo Gadwg nyob dvpar nyiilungam Deuelg ko tuup Eliyasap peelo gob nyil wgnum.

²¹‍Ho Kohat nyiilungv dvrwqbo dupum-dvrab tulungam baql wrab gvknum, hoo bulug hvvc maatab xumk pirram mvl apkunum.

²²‍Hoo Iprayimg svmcw hoqg nyiilungv bulv dvpar gob nyitwl wrab kunum, hoo Ammihudg ko tuup Elisama bulug dvparam peelo gob nyil wgnum.

²³‍Hoo Manasseg nyob dvpar nyiilungam Pedajur gv ko tuup Gamaliel peelo gob nyil wgnum.

²⁴‍Hoo Benjaminwg nyob dvpar nyiilungam Gideoni gv ko tuup Abidan peelo gob nyil wgnum.

²⁵‍Ho Dan nyiilungv svmcwngam raol rvkybo gob nyinum, bulv dvpar gob nyitwl wrab kunum hoo Ammisaddai gv ko tuup Ahiejer bulug dvparam peelo gob nyil wgnum.

²⁶‍Hoo Aserwg nyob dvpar nyiilungam Okranwg ko tuup Pagiel peelo gob nyil wgnum.

²⁷‍Hoo Naptalig nyob dvpar nyiilungam Enanwg ko tuup Ahira peelo gob nyil wgnum.

²⁸‍Soq sib Israel nyiilungv bulv wrab yukam bulv dvpar-dvpar gob daayob sool wnum.

²⁹‍Hoo Mojes mwwg at akwg Midian hoqg Reuelwg ko tuup Hobabnvn benum, “At Sw benum, ‘Ngo nulam ham jitayin hvnam nyookub ngulv wrab yin.’ Ngulug lvgab wto ngulv nam anyab doog tayin, hoggab At Sw Israelam alboam dingr pakun.”

³⁰‍Hvbmabde mwv mwam benum, “Ngo wram. Ngo ngoqg at gvda bvla ngoqg vbw-bor dookub wde kun.”

³¹‍Hoo mwv benum, “Ngulam wleq maabv, hoggab no cengdo deexa-rara alo hogloq ho svmcw mvl dootayin, hoo no ngulam lamta kaakin tvbv.

³²‍Hoo hvb ngulug lvgab nyij baloqkam, hoggv At Sw ngul gab alboam nyij dvn, hoq luukin ham nam kam nyij tayin.”

³³‍Ho At Swg puutu hoqgv aal loum go wda namgub bulv wrab kunum. Hoo bul gab doonu ko nyookam meelin dvb hvl, At Swg pvvb uddumv bulug otuqb aal loum go nyiody wnam gob wco kunum.

³⁴‍Hoo hwdlo jaqkam bulv svmcw hoqgv wrab yukun, At Swg doomwqkv bulug aoho aalam doomin gvnum.

³⁵‍Hoo hwdlo jaqkam gaml uddum wrwngam joorab yin, Mojes benum, “At Sw, gorabto, hoo noqg ceebio tulungam cwrsaq-bvraq mvto, hoo hiyv nam oyum bo tulungam noqg agaho hoqgv kepaq mvto.”

³⁶‍Hoo hwdlo hoqham joonul joop yukun, mwv benum, “At Swa, no lwwyw-lwwyw Israelwg dookub Hookur tuku.”