Read Nyishi XINAM 11 Bible Online

XINAM 11 - Nyishi bible

XINAM 11

¹Hoo nyiilungv bulug vs-axaqkam At Swn sornum, hoo hwdlo At Sw ham tapa yukho mwv hang lengnum, hoo bulug svmcw meegin At Swg wmv gunum.

²‍Ho nyiilungv Mojesnvn xabl-riil sogoqnum, ho Mojes At Swn swgwnum, hoo wmv miqknum.

³‍Ho hoq nyook hoqg eminam Tabera hvl apnum, hoggab At Swg wmv bulug pengko ho gunum.

⁴‍Nyi dwmtwq-miilyw ko pengko ho bulv vcjaqb vdin dwnwnum. Hoo Israel nyiilungv lokta xabnv benum, “Oa vdin loq ngulv dvka kunyi loqkam alpa!

⁵‍Ijipt gvdaho ngulv kor rvma jaqb ngui, moku, pvvmiq-miqbia, talap, lvbw, hoo diit dvminam mam mwwpa do.

⁶‍Hvbmabde sija ngulug atorv wiyum paku, hoo soq manna lvvg soqgv hog asaq akkam kaas dooma.”

⁷‍Manna hv taiyaq yaqxy hvb nyinum, hoo hoqg tojv puulu caqngin hvb nyinum.

⁸‍Nyiilungv wgaqnv ham dorkumnum hoo ham xujab maalo tubjab tvl pwcwho humtwl hoo wtwb cwwcwnum. Hoo hoqg ngamnamv kuty lvgab wtw cwwnam hvb nyinum.

⁹‍Hwdlo gumsiv aiyam svmcw ho hol yin, manna ngvkam hoqg lvgab hol mingnum.

¹⁰‍Nyiilungv bulug doogw haagag viyap yabg ho nyob vxig xabnam mam Mojes tapanum. Hoo At Sw vc loodab hang lengnum, hoo Mojes hemp kumanum.

¹¹‍Mojes At Swn benum, “Hoggub noqg nyerangam no al maadwb nyig yukun? Hoo hoggub ngam no mwwswl kaalwq kuma dvn, ho soq nyiilu gorgy vgw mwlwngam ngam tulwq gvi kun?

¹²‍Soq nyiilu mwlw sam ngo pwnbo ngvi yv? Ngo bul mwlwngam ko bwwn bongv yv, hoqgab no ngam bedwn, ‘Bulam noqg haabo ho baqto, ko nwbwngv kongam baqnam hvb,’ bulug ab tulungam noqg gvda ngam jidwb dingrnam?

¹³‍Hogloqkv ngo soq nyiilu mwlw gab vdin naal jitayin? Hoggab bulv ngoqg agaho xabl bedo, ‘Ngulam vdin jitbv, ho ngulv dvdwb.’

¹⁴‍Ngo aro soq nyi mwlw sam nyila-wla gvkma; ngoqgab vc loodab vgw paku.

¹⁵‍Ngo noqg kaagaho kvvlwq paloqkam, no ngam soq sib nyim mamlin sam, ngam lvkin ciqnyi ho mengpaq tvb, hoggab soq ngoqg hentwr henam sam ngo hinw kuma.”

¹⁶‍Ho At Sw Mojesnvn benum, “Hiyam no nyi tulungam nyigbo gob hoo bulug saab gob mwwnam Israel nyiilu hoqgv nyi axa loq camkvn go ngoqgab bookum to, hoo bulam kvvrwq minsko tombu boolwqto, hoo bulam noqg lvgab daqmin gvmto.

¹⁷‍Hoo alo ngo ipoql noqg lvgab agam gootayin. Hoo noqg lvgab yal meegwn ngo naalayil bulug aoho vlwq jitayin, hoo bulv noqg lvgab nyiilug vgwngam baqba tayin, ho no aro vpwb vgwngam baqk ram.

¹⁸‍Hoo nyiilungam beto, ‘Atv atam aaram gab garxaqsuto, hoo nulv vdin dvtayin, hoggab nulv At Swg tagaho xabnv begamv, “Hiyv yu ngulam vdin dvdwb jitayin? Ngulv Ijipt ho doonamv alyat ba.” Hoqgab At Sw nulam vdin jitayin hoo nulv dvtayin.

¹⁹‍Nulv aal lookin go, ho loonyi go, hoo loong go, ho looyw go, ho camnyi go, dwtwqram,

²⁰‍hvbmabde pool bvrpwngam dvtayin, hoqhv nulug nyupum hoqgv lengnam xaqb hoo nulv ham kvvnw maada dvb jitayin, hoggab hiyv nulug pengko ho doomin gvnboam At Swn nulv haqpaq paku hoo mwwg agaho xabnv, begamv, “Hoggub ngulv Ijipt hoqgv lengyi kun yu?’ ”

²¹‍Hvbmabde Mojes benum, “Ngo lvpiab bool wgnam nyiilungv 6,00,000 gob nyido, hoo no begamv, ‘Ngo bulam vdin jitayin, ho bulv pool bvrpwngam dvtayin hvdo!’

²²‍Bulam jot dvb dvm dvb sviya pvtwngam hoo svv hvvtwngam patab dvb nyitayin i? Ho bul gab sa-svlog nguiyam lvkin gob nookuml jot dvb jitayin i?”

²³‍Hoo At Sw Mojesnvn benum, “At Swg alaqkv otu dvn yv? Ngoqg gomcwr goonamv noqg gab jvqtw lengyi bwdwq ma lengma yiba dwq, no kaal dooiya to.”

²⁴‍Ho Mojes wknv nyiilungam At Swg gomcwram betamnum. Hoo mwv nyiilu hoqgv nyi axa camkvn go bookumnum hoo bulam doogwg tombu taqg-loosaqho daqmnum.

²⁵‍Ho At Sw doomwqb ipoqnum hoo mwam agam goonum, hoo mwwg hoqgv yal meegwn naalayil ham axa bo nyi cam kvnwg aoho jilwqnum. Hoo bulug aoho yalv haaxy kalam, bulv nyiqry benum. Hvbmabde bulv ham oyu go nyidul doomanum.

²⁶‍Xuqlinum cam kvn axa bo nyi hoqgv vnyi gon svmcw uraho doonum, akwn hoqgv eminv Eldad, hoo asaq ak hoqg eminv Medad, hoo yalv bulug aoho haanum. Bulv hoqg xuqlinl xeqnam nyi gob nyinum, hvbmabde bulv tombu ura hoqgv lvvgwb lengmanum, hoo bulv svmcw uraho nyiqry benum.

²⁷‍Hoo yaapa ak Mojes dookub xarbnv betamnum, “Eldad la Medad svmcw ura vv nyiqry kaal agam goodu do.”

²⁸‍Hoo Nunwg ko tuup Josua, Mojesnvn svka bo yaapa akv benum, “Ngoqg at Mojes, bulam mvtur to.”

²⁹‍Hvbmabde Mojes mwam benum, “No ngoqg pagoqgab kaaneq dvn yv? At Sw nyiilu mwlwngv nyiqry benbo gob nyin mviyv, ho At Sw mwwg yalam bul mwlwngam vlwq jitayin yv!”

³⁰‍Hoo Mojes la Israel nyi axa tulungv svmcwb wkur kunum.

³¹‍Ho At Sw dooiyam ywrab mvnum, hoo hoqhv pvta Tooxu ngam sa-svlo hoqgv bvqlwqnum hoo hoq tulu ham svmcw hoqgv aal loog wnam gob svmcwg taqg-loosaqho ked hoqgv kiubit vnyi gob caadwb yaqp jinum.

³²‍Hoo nyiilungv gorabl aal-aiywb ho aal loogwn hookam wnv pvta Tooxu ngam dorkumnum. Ho mwlwngam anyo yaadwb dorkumnamv wyw homarnum. Hoo bulv hoq tulu ham svmcw bviywrho pwtw mvdwb yvqs-yaqtwrl apnum.

³³‍Bulug agamho vdin nyianyiv boqdu dvb At Sw nyiilungam ceekol vc loodab hang lengnum, hoo At Sw swlin-momin lvgab nyiilungam naleqgo sipaq mvnum.

³⁴‍Hoqgab hoqg nyookam Kibrot-hattaaba hvl emin goqnum, hoggab bulv hoqho mwwbil dwnw bo nyiilungam svma liinum.

³⁵‍Kibrot-hattaaba hoqgv nyiilungv Hajerotwb nyiody booknum, hoo bulv Hajerot ho svmcw mvl dooknum.