Read Nyishi XINAM 12 Bible Online

XINAM 12 - Nyishi bible

XINAM 12

¹Mojes Kus nyi nyem ak naagam gab Miriyam la Aaron mwam ceeko nv agam goonum, hoggab mwv Kus nyem ak naanum.

²‍Hoo bulv benum, “At Sw Mojes aron agam goon mviyv? Mwv ngulug lvgab kam agam goomanam yv?” Hoo At Sw ham tapanum.

³‍Mojes swcw nvg aoso nyiilu mwlwngam yan yaanbo nyi akub nyinum.

⁴‍Hoo At Sw haqma paqb Mojes nvla Aaron hoo Miriyamnvn benum, “Nul oumv kvvrwq minsko tombub lengto.” Hoo bul oumv lvvgwb lengnum.

⁵‍Hoo At Sw doomwq piuarb ipoq banv tombu haagaho daqtwl Aaron nvla Miriyam bunyiam goqnum, hoo bunyiv ogumb hvvnwqnum.

⁶‍Hoo mwv benum, “Ngoqg gomcwr sam tagabto: Nulug pengko ho nyiqry benbo ak dood nyiloqkam, ngo At Sw atv atam mwam nyiqry kaanbo ak hoqgv ceng dvb jipa kun; ngo mwam yuma lvgab agam goodwn.

⁷‍Hvbmabde ngoqg nyera Mojes lvgab hvb ngo agam goomanum. Ngoqg nombu mwlw gab mwv hingky jaqdvn.

⁸‍Mwam ngo tvbw cwkw dvb agam lvgab agam goodwn, mwam ngo dooiyw-doocil ho nwwtam bvlam agam mam goomanum, hoo mwv At Swg gv apongam kaadwn. Hog nyitwl nulv ngoqg nyera Mojesnvn ceekol agam goodwb bos maadwn?”

⁹‍Hoo At Swg haaxaqnamv bulug aoho haanum, hoo mwv wleq kunum.

¹⁰‍Hwdlo doomwqkv tombu hoqgv hwrxo kalam, kaato, Miriyamnvn tapam hvb tviyiqkv nyiknum. Hoo Aaron Miriyam daiyab tobkurnum, hoo kaanamv mwn tviyiq nyiknum.

¹¹‍Hoo Aaron Mojesnvn benum, “Oa, ngoqg bir ata, ngulam laqm-baqm mvmabv hoggab ngulv pacab nyiknv hoo nyic nyipa kun.

¹²‍Mwnwn sinbo ak hvb nyim mvmabv, hiyvg gv vdinam dvngo pan hvb annwg kepo hoqgv ko bwwlinam hvb nyim mvmabv.”

¹³‍Hoo Mojes At Swn xabnv benum, “Pwnboa, anya mwwpa gvdwl mwnwn mwp tvbv—anya mwwpa tvb.”

¹⁴‍Hvbmabde At Sw Mojesnvn benum, “Mwnwg abv mwnwg nyuqm ho tacor curyaq baloqkam, mwn aal kvn gob hvnyw nywl dooiyin maad nvi yv? Mwnwn svmcw lvvgho aal kvn gob mutuml tvl doom to, hoo hoq kokwngam mwnwn lokta bookur tuku.”

¹⁵‍Ho Miriyamnvn svmcw lvvgho aal kvn gob mutuml tvl doomnum, hoo Miriyamnvn lokta bookur maady deedib nyiilungv lvvgwb lengmanum.

¹⁶‍Hoq kokwb nyiilungv Hajerot hoqgv wrab kunum, hoo Paran deexa-raraho svmcw mvl dooknum.