Read Nyishi XINAM 13 Bible Online

XINAM 13 - Nyishi bible

XINAM 13

¹At Sw Mojesnvn agam goonv begamv,

²“Ngo Israel nyiilungam jitanam Kanaan gvdangam mvqky-maqlam mvm dvb nyi loq kanamto. Bulug ab hoolug nyob dvpar pengko hoqgv peelo boloq ak-akwb kanamto.”

³‍At Swg gaml bekjaqb, Israelwg nyiilu hoqgv peelo boam, Mojes bulam Paran deexa-rara hoqgv kanam kunum.

⁴‍Hoo soq tulu si bulug eminv: Reubenwg nyob hoqgv Jakkur gv ko tuup Sammua;

⁵‍Simeonwg nyob hoqgv Horig ko tuup Sapat;

⁶‍Judag nyob hoqgv Jepunneg ko tuup Kaleb;

⁷‍Issakarwg nyob hoqgv Josap gv ko tuup Igal;

⁸‍Iprayimg nyob hoqgv Nunwg ko tuup Hosea;

⁹‍Benjaminwg nyob hoqgv Rapug ko tuup Palti;

¹⁰‍Jebulunwg nyob hoqgv Sodig ko tuup Gaddiel;

¹¹‍Josapg nyob hoqgv (hoqhv Manasseg nyob hoqgv) Susig ko tuup Gaddi;

¹²‍Danwg nyob hoqgv Gemallig ko tuup Ammiel;

¹³‍Aserwg nyob hoqgv Maikel gv ko tuup Setur;

¹⁴‍Naptalig nyob hoqgv Bopsig ko tuup Nabi;

¹⁵‍Gadwg nyob hoqgv Makig ko tuup Geuel;

¹⁶‍Soq eminam nyi tulu sam Mojes gvdangam mvqky-maqlam mvm dvb kanamnum. Hoo Mojes Nunwg Josuag ko tuup Hoseanvn goqnum.

¹⁷‍Mojes bulam Kanaan gvdangam mvqky-maqlam mvm dvb kanaml bulam benum, “Negeb caagdvl hoo diisw gvda urab caan,

¹⁸‍hoo gvdangv hoggub nyidwn, hoo tolo doonbo nyiilungv ator dviyv ma laanyi maad yv, ho bulv nyiv anyo dviyv ma mvqlw dviyv ham kaaka ta,

¹⁹‍hoo bulug gvda dookv al-koram dvn yv, hoo bulug bopam doogw ko tulungv gurum nwqnam goi yv ma nwqma namgo,

²⁰‍hoo gvdangv diibuq boogyv ma diibuq maan go, hoo svvnv daqd yv ma daqma yv. Vcjaq haakam to hoo gvda hoqgv aaxy loq meeg baqa ta.” Hoq mood hv roo aaxy ningco bo tulug ningd moodwb nyinum.

²¹‍Ho bulv gvdangam mvqky-maqlam mvtab Lebo-hamat ogumb Jin hoqgv Rehob deexa-rara namgub mvqky-maqlam mvnum.

²²‍Bulv Negeb namgub caaknum hoo Hebronwb haaknum. Ahiman, Sesai, hoo Talmai, Anak hosiq tulungv hoqho doonum. (Hebron ham Ijipt urag Joan ham mvma taab vnyw kvn otuqho mvknum.)

²³‍Hoo bulv Eskolwg lywpa ho haaknum hoo bulv hoqg lvpa hoqgv roo haqb opium piumg pageqnum, hoo ham nyi vnyi go lyvxar rublwq tvl jool wgnum; bulv annar rvla taoq aaxiv kam meeg baqa kunum.

²⁴‍Hoqg nyookam Eskol lywpangv hvl emin goqnum, hoggab Israel nyiilungv hoq hoqgv roo opium mam pageql jool wgnum.

²⁵‍Aal campiv wnya kokw so bulv gvdangam mvqky-maqlam mvpe kul wkur kunum.

²⁶‍Hoo bulv Paran deexa-rarag, Kadesho, Mojes gvla Aaron hoo Israelwg nyiilu mwlwg dvpar dookumko ho haaknum. Bulv bulam la nyi tulug dvparam agam betam kunv, hoo bulam gvda hoqg aaxiam kaatamnum.

²⁷‍Hoo bulv mwam betamnum, “Ngulv noqg kanam ko gvdangam haaknv kaapenum. Gvda tv wtw lyuminko la ngola biqminko gvdab nyide, hoo soq aaxy si gvda toloqkv baqa yin.

²⁸‍Hvbsujaqkam, gvda tol doonbo nyiilungv ator jaqde, hoo bopam tulungam gurumv koijaqb nwqtuml ap pe. Hoo hoq lvvgho ngulv Anak hosiqkam tolo kaapen.

²⁹‍Amalek nyi tulungv Negeb gvda lo doode. Hittait nyi tulungv, Jebus nyi tulungv, hoo Amor nyi tulungv diisw nyookam doog gvde. Hoo Kanaan nyi tulungv sa-svlongam la Jordon soiyoq kam doog gvde.”

³⁰‍Hvbmabde Kaleb nyiilungam Mojesg agaho cooikab doom dvb mvtwl hoo mwv benum, “Kuj ngulv sija da lvkin gob caag dvl gvdangam naata ju, hoggab ngulv bulam nyob paiya dvb atorv doodo.”

³¹‍Ho mwwg lvgab wmin gvnbo nyi tulungv benum, “Ngulv nyi tulungam ceekol nyob paiya nyodyma, hoggab bulv ngulam ator yaade.”

³²‍Ho bulug mvqky-maqlam mvl gvda kaanam mam bulv Israel nyiilug pengko ho almanbo puiyam baqtamnv, begamv, “Ngulug mvqky-maqlam mvl kaanum gvdangv, hoqg doonbo nyiilu gab jot dvb vly-aaxeq swwma de, hoo ngulv kaanam nyiilu hv ao tvl dort jaqde.

³³‍Hoo ngulv tolo Nepilim (Anakwg ko tuup tulungam, hiyv Nepilim hoqgv haan boam) kaapa peekun, hoo ngulv atv-atam takam hwiyw gob mwwnum, hoo bulv kam ngulam hvb kaade.”