Read Nyishi XINAM 14 Bible Online

XINAM 14 - Nyishi bible

XINAM 14

¹Ho nyi tulu dvparv vcjaqb sogoq goqnum, hoo ai ho nyiilungv xabnum.

²‍Hoo Israelwg nyiilu mwlwngv Mojes nvla Aaronnvn ceekol vcjaqb haqnum. Nyi dvpar mwlwngv bunyiam benum, “Ngulv Ijipt gvdaho sinamv alyat ba! Ho soq deexa-rara so ngulv sim mamlin sam!

³‍Hoggab At Sw ngulam soq gvda so lyoqr orioq niqtuqb sim dvb boa pakun? Ngulug nywxw tulungam la ngulug ko tulungam mengnam puqnam gob nyid ku. Ngulv Ijipt gvdab wkurnamv al yak maai yv?”

⁴‍Hoo bulv akwn-akwn bemin sunum, “Kuj ngulam nyig bolo daalin gvdwl hoo Ijipt gvdab wkur nukuj.”

⁵‍Ho Mojes la Aaron Israelwg nyiilug hookumko dvparwg agaho bunyug nyuqm mam kedho pvxwnum.

⁶‍Hoo Nunwg ko tuup Josua la Jepunneg ko tuup Kaleb, hiyv gvdangam mvqky-maqlam mvtab wmin gvnbov, bunyug vjam swrc-swryil mvnum

⁷‍hoo Israelwg nyiilug dvpar mwlwngam benum, “Ngulug mvqky-maqlam mvl wpe ko gvdangv vc loodab albo gvdab nyide.

⁸‍At Sw ngulam mwwlwq baloqkam, mwv ngulam hoq gvda tol boolwq tayin hoo wtw lyuminko hoo ngola biqminko gvda ham ngulam jitayin.

⁹‍At Swn ceekol bidu-bel tamab nyimab nyitwqto. Hoo gvdag nyiilungam bos maabv, hoggab bulv ngulug dvs gob nyitayin. Bulug ceetornan tulu ham bul galoqkv mvpaq tayin, hoo At Sw ngulug lvgab doodwn; bulam bos maabv.”

¹⁰‍Ho dvpar mwlwngv bulam wlw lvgab wlw hurx tvk hvl benum. Hvbmabde At Swg yuunamv Israel nyiilungam kvvrwq minsko tombu ho kaakinum.

¹¹‍Hoo At Sw Mojesnvn benum, “Hog hwdgo soq nyiilu si ngam haqpaq taikun? Hoo ngo bulug pengko ho naleqgo swrdorxeqkam nyiknum, hvbsujaqkam hog hwdgo bulv ngam mwwjw maab nyita yukun?

¹²‍Ngo bulam iicw-tobum dooi lvgab mwlwngam mingtwr tayin, hoo bulam koi dvbla ator yaadwb ngo nulam nyob akub mvtayin.”

¹³‍Hvbmabde Mojes At Swn benum, “Ho Ijipt nyi tulungv ham tapa tayin, hoggab soq nyiilu sam noqg ator hoqgv bulug pengko hoqgv boolinum,

¹⁴‍hoo bulv soq gvda so doonbo nyi tulungam betam tayin. At Swa, bulv noqg soq nyiilug pengko so doomin gvnam ham tapa pakun. Hoggab At Swa, nam bulv atwg vnyiq lvgab kaatv sunum, hwdlo noqg doomwqkv bulug aoho doonam mam hoo no bulug otuqb doomwq piuar tiqbub aalam hoo wm swwrw gob aiyam wgnam mam kaapa kunum.

¹⁵‍No sija soq nyiilu sam nyi akin gon mengnam hvb mengb nyiloqkam, noqg yuunam mam tapa bo nyob tuluhv hvl betayin,

¹⁶‘At Sw soq nyiilu sam mwwg gvda jita nvk hvl dingrnam ho boolwq nyoma ko-gab mwv bulam deexa-raraho mengpaqnum.’

¹⁷‍Hoo At Swa, sija noqg ator huqlwngam noqg dingrko jaqb nyimto, begamv,

¹⁸‘At Sw hang lengla maadwn hoo tumanam abiv naleqdvn, nyixiaqkam la nyicam apaq jidwn, hvbmabde mwv nyimur boam laqm-baqmab apaq maadwn, ab tulug nyimurnam mam hotam oum vpy namgub mwv laqm-baqm dvn.’

¹⁹‍Anya mwwpa gvdwl soq nyiilug nyixiaqkam apaq jitbv, Ijipt hoqgv sija godab noqg koijaqb tumab abynam hoqgv no soq nyiilug nyixiaqkam apaq jinum hvb apaq jitkub.”

²⁰‍Ho At Sw benum, “Noqg gomcwr gookjaqb, ngo apaq jigyin.

²¹‍Hvbmabde jvqtw jaqb, ngo swwl doody deedib swcw so At Swg yuunamv bwwr tvl dooky tayin,

²²‍Ijipt hoola deexa-raraho ngoqg yuunam mam la swrdorxeq nyinam mam kaanbo nyiv akkam ngoqg benam mam tvjw ma, hvbmabde ngam lwyw taqt gob pooka-yirka paku,

²³‍bulug ab tulungam ngoqg jidwb dingrnum gvdangam bulv kaapa ram. Hoo ngam haqpaq bov akkam gvdangam kaapa kuram.

²⁴‍Hvbmabde ngoqg nyera Kaleb, mwv luusaq yalam baqtwl ngoqg hog mwlwngam tal nyil wnum, ngo mwam mwwg gvda wknum ho boatayin, hoo mwwg hosiqkv ham gumn bwwtayin.

²⁵‍Amalek nyi tulu ngvla Kanaan nyiv lywpa ho doodo, hoqgab aaram mam deexa-rarab wgdvl Swlw Sa-svlo lamtab wto.”

²⁶‍Hoo At Sw Mojes nvla Aaronnvn agam goonv, begamv,

²⁷“Hog hwdgo soq nyic-nyia bo dvpar si ngam ceekol haql-pal dootayin? Israel nyiilungv ngam ceekol haql-pal benam mam ngo tapa paku.

²⁸‍Bulam beto, ‘Ngo swwl doody deedib, At Sw bibwqdo, hoggv nulv ngam tapa dvb bepa kun ngo nulam nyitayin:

²⁹‍vnyw camnyi hoqgv akam yaakbo ham emin xitaq kunamv, hiyv xeq ngam ceekol haql doonbo, nulug svmangv soq deexa-rara so yaapaq tayin,

³⁰‍Jepunneg ko tuup Kaleb gvla Nunwg ko tuup Josuag lvvg hoqgv nyi akkam ngoqg nulam doom dvb dingrnum gvdaho haanyi kuram.

³¹‍Hvbmabde hiyam nulv benum, ngulug ko tulungam mengta-puqta yi hvl, nulug ko anyobo tulu ham, ngo hoqho boolwq tayin, hoo nulug haqpaq kunam gvdangam bulv cengtayin.

³²‍Hvbmabde nulgab nyiloqkam, nulug svmangv soq deexa-rara so yaapaq tayin.

³³‍Hoo nulug svmangv deexa-raraho yaapaq poqyum maad deedib nulug ko tulungv deexa-raraho vnyw campy gob gaql yvtayin hoo nulug mwwjw maanamv nulam hentwr hem tayin.

³⁴‍Nulv gvdangam aal campy go mvqky-maqlam mvl kaanum, hoqg aal lookinam vnyw nywgwb deexa-raraho gaql nulv vnyw campy go nulug nyixiaq gab nulv gaql yvtayin, hoo nulv ngoqg hemp maanam mam cengtayin.’

³⁵‍Ngo, At Sw, agam goopa kun. Jvqtw jaqb soq nyic-nyia bo dvparv ngam ceekol lvkin gob dookum bo mwlw sam ngoqg bekjaqb nyitayin: soq deexa-rara so bulv twryum taikun, hoo bulv sitwr taikun.”

³⁶‍Hoo Mojes gvdangam mvqky-maqlam mvm dvb kanamnum nyiilungv hiyv hookur layil almanbo puiyam baqtam tvl nyi dvpar mwlwngv mwam haql-pal ceekonum—

³⁷‍gvdangam almak hvl pui baqtam bo nyi mwlwngv—At Sw agaho nyoqsiqbo vc-ai lvgab siknum.

³⁸‍Gvdangam mvqky-maqlam mvtab wnbo nyi tulu hoqgv Nunwg ko tuup Josua la Jepunneg ko tuup Kaleb aro swwl dootwq kunum.

³⁹‍Hwdlo Mojes Israel nyiilu mwlwngam soq gomcwr tulu sam betayin, nyiilungv vcjaqb nyix-riinum.

⁴⁰‍Hoo bulv ar komc gorab layil diisw gvda aob caanv hoo begamv, “Ngulv si doodwn. At Swg dingr kunam nyook ho ngulv caatayin, hoggab ngulv nyic nyipa ku.”

⁴¹‍Hvbmabde Mojes benum, “Hoggab nulv sija At Swg gamlam tvjw maab nyidwn, nulv ham niqtuq lengram?

⁴²‍Odumb caama bv, hoggab At Sw nulug pengko ho dooma, nulv caab nyiloqkam nulug ceebio agaho nulam patab tayin.

⁴³‍Hoggab Amalek nyiilungv la Kanaan nyi tulungv nulam dvqrwl nyob patayi, hoo nulv bulug lyoqr orioq niqtuqho haatayin. Hoggab nulv At Sw dook hoqgv wkur paku, At Sw nulug lvgab dooba ram.”

⁴⁴‍Hvbmabde At Swg pvvb uddum mvla hoo Mojes svmcw hoqgv wlin maab doonum, hvbsujaqkam bulv diisw gvdab caadwb mwx-mvaq kunum.

⁴⁵‍Ho diisw gvdaho doonbo Amalek nyi tulungv la Kanaan nyi tulungv lengb nv bulam nyob paiyanum hoo bulam Horma namgub ruqmin gvnum.