Read Nyishi XINAM 15 Bible Online

XINAM 15 - Nyishi bible

XINAM 15

¹At Sw Mojesnvn agam goonv begamv,

²“Israel nyiilungam agam goog dvl hoo bulam beto, ngoqg nulam jitanam gvdaho hwdlo nulv haaikun ham nulv otub nvvsiq tayin,

³‍hoo nulv At Swn svv hvvtw hoqgv ho sviya pvtw hoqgv dvs aky gob ho boyuqnam aky gob ho pwr jinam aky gob nulug mwwbwql aky jidwb mwwnam ham nulug xuqlinam durum aal tuluho At Swn sungam bo dvs aky gob jitayin,

⁴‍ho wtw albo ipa wyw hoqgv ak kuty lvgab mviyo tvl hoo hin ak hoqgv oum go kutiam la twws akiam At Swn dvs aky gob mwv bwa jidwn;

⁵‍hoo no sviya dorxy cwram boyuqnam maalo pwr aky gob jiyikam no roo ala twws akiam hin ak hoqgv oum go jitaq tayin.

⁶‍Ho yaap tvmwram no aky jiyikam ipa wyw hoqgv wtw albo vnyi go la kutiam hin ak hoqgv oum go dvs aky gob jitayin.

⁷‍Hoo no roo ala yooxaq xvqpy go twws akiam At Swn sungam bo twws aky gob jitayin.

⁸‍Hoo hwdlo no hvvbam boyuqnam maalo pwr aky gob noqg dingrnam mam niqtuq nyilin dvb ho swrso aky gob At Swn jitayin,

⁹‍ho hvvb aky lvgab wtw alboam ipa wyw hoqgv oum go kuty lvgab mviyonam hin ak hoqgv papo go dvs aky gob jitayin.

¹⁰‍Hoo no roo ala hin ak hoqgv papo go At Swn sungam bo dvs aky gob jitayin.

¹¹“Hoqgab hvvbam maalo yaap tvmwram, ho sviya kongam ho sibin bindo dorxiam aky jiyikam, soq tulu sam lwxiam jitaq dvb nyitayin.

¹²‍Nulv hog hwdgo sibin-svvngam aky jitayin hwd kalam go hoqg lvgab soq tulu sam jitaq dvb nyitayin.

¹³‍At Swn sungam bo dvs aky gob aky jiyikam, Israel nyi nyiidu mwlwngv soqg nyinam pagoq sam nyidwb nyitayin.

¹⁴‍Hoo nulug lvgab doomin gvnbo nyoodo nyiilungv At Swn sungam bo dvs akiam mwv jidwb mwwb nyiloqkam, nulug nyinam hvbkalam bulam nyimto.

¹⁵‍Hoggab dookum bo mwlw gab, nulgab la nulug lvgab dooba bo nyoodo nyiilu gab pvvbv akin tayin, ho nwrba xaqb nulug hotam-hotamv pvvb akin sam nyil wtayin. Nulv la nyoodo nyiilungv At Swg agaho homyin tayin.

¹⁶‍Nul gab la nulug lvgab wba bo nyoodo nyiilu gab pvvbv la gaml jinamv akin tayin.”

¹⁷‍At Sw Mojesnvn agam goonv begamv,

¹⁸“Israel nyiilungam agam goog dvl hoo bulam beto, nulam ngoqg boolwq tanam gvdaho hwdlo nulv haaikam

¹⁹‍hoo hwdlo nulv gvda hoqgv dvsam dvikam, nulv At Swn xinam lvqcam jikum tayin.

²⁰‍Hwdlo nulv nit wtwngam cwwl dvikam nulv otuqcob wtw cwwnam ham aky jitayin; ho jurpy mvnam hoqgv jinam hvbkam nulv akiam soq sib jidwb nyitayin.

²¹‍Nulug hotam-hotam xaqb nulug otuqcob wtw cwwnam ham nulv At Swn xinam aky gob jitayin.

²²“Hvbmabde nulv nyip-nyilupl nyic nyib nyiloqkam, At Sw Mojesnvn gaml jil agam goonam tulu ham nyima balo,

²³‍At Sw Mojes lvgab nulam gaml jinam mwlw ham, At Swg gaml jid aal hoqgv nulug hotam-hotam xaqb nyil dootayin,

²⁴‍ho hiyv akgon dvparam cengm maab nyip-nyilupl nyic nyip nyiloqkam, dvpar mwlwngv svv hvvtw hoqgv hvvb dorg boyuqnam akiam At Swn sungam bo aky gob jitayin, hoqg lvgab dvs akiam la twws akiam pvvb bekjaqb jitayin, hoo bimp dorg nyic aky gab jitayin.

²⁵‍Hoo nyubv Israelwg nyiilu dvpar mwlw gab nyic kwly gab pwram jitayin, hoo bulug nyicam apaq jitayin, hoggab hoqhv cengmab nyimurnam go, hoo bulug dvs akiam At Swn bulv baqa jidwn, hoo bulug nyic akiam At Swg agaho bulug nyimur ko-gab baqa jidwn.

²⁶‍Hoo Israelwg nyiilu dvparam la bulug lvgab dooba bo nyoodo nyi tulungam bulug nyimuram apaq jidwn, hoggab mwlwngv hoq nyimur nyikho nyimin gvnum.

²⁷“Nyi akgon nyip-nyilupl nyic nyip nyiloqkam, mwv sibin vnyw nywgwb akam boam nyic aky gab jitayin.

²⁸‍Hoo nyi akwg nyimur gab nyubv At Swg agaho nyic kwly gab pwram jitayin. Hwdlo mwv nyip-nyilupl nyic nyigam gab mwwg nyic kwly gab pwram jitayin, hoo mwwg nyimuram apaq jitayin.

²⁹‍Israel nyiilungv nyiidu nyi gab la bulug lvgab dooba bo nyoodo nyi gab nyip-nyilupl nyic nyinam pvvbv akin tayin.

³⁰‍Hvbmabde hiyv hog ak At Swn bidu-bel tamab nyidum lalal nyib nyiloqkam, mwv nyiidu nyi jaqkam hoo nyoodo nyi jaqkam, mwwg nyiilu hoqgv mwam mvpaq tayin.

³¹‍Hoggab mwv At Swg gomcwram haqpaq paku hoo mwwg gamlam mvpia paku, hoq nyi ham mvpaql twryum tayin; ho mwwg nyixiaq nyijongv mwwg aoho haatayin.”

³²‍Hwdlo Israel nyiilungv deexa-raraho dooyikho, Doonu Aalho nyi ak wsw dorkum dvb bulv kaapanum.

³³‍Hoo wsw nookumbo nyi ak ham Mojes gvla Aaron hoo dvpar tulu dookub boanum.

³⁴‍Bulv mwam pvtwqho tuml apnum, hoggab mwam hoggv mviyin dvn ham bulv mwbwq maatanum.

³⁵‍Hoo At Sw Mojesnvn benum, “Nyi ak ham sim to; nyi dvparam mwlwngam mwam svmcw lvvgho wlw lvgab hurx mvto.”

³⁶‍Hoo At Sw Mojesnvn gaml jik jaqb nyi dvparv mwam svmcw lvvgho boolin layil wlw lvgab sidwb hurx kunum.

³⁷‍At Sw Mojesnvn benum,

³⁸“Israel nyiilungam beto, hoo bulug hotam-hotam xaqb bulug vj jebar niqtuqho jemiam hiqlwq mvdwb bulam betamto, hoo vj cuukiqho tan nvj loq jemib hiqlwq mvto.

³⁹‍Hoo hoq jemiam nulv kaapa yin At Swg gaml tulu mwlwngam mwwpa tayin, ho nulug at hang mwwlwqb hoo nulug atwg vnyiq kvvlwq koob nulv yocu-yabio nyinam mam nyima dvb.

⁴⁰‍Ho ngoqg gaml jinam hog mwlwngam nulv mwwpa tayin, hoo nulug Pwnbo gab dvrwq tvl dooto.

⁴¹‍Ngo nulug Pwnbo At Swv, hiyv nulam Ijipt gvda hoqgv nulug Pwnbob swwdwb nulam boolin kunum: ngo nulug Pwnbo At Swv.”