Read Nyishi XINAM 16 Bible Online

XINAM 16 - Nyishi bible

XINAM 16

¹Hoqkv Lebig ko tuup, Kohat ko tuup, Ijar gv ko tuup Kora, hoo Eliyabg ko tuup tulungv Datan hoo Abiram, hoo Reubenwg ko tuup hoqgv Peletwg ko tuup On nyi ata go naanum.

²‍Hoo Israelwg nyiilug dvpar hoqgv peelo bo 250 gob bulug dookum hoqgv nyi yuunam tulungam xuqlin layil, bulv Mojes agaho haanum.

³‍Bulv lvkin gob hookumnv Mojes nvla Aaronnvn ceeko nv bulam benum, “Nulv aado jaqb wxar paku! Hoggab dvpar nyi mwlwngv vxiv dvrwqdo, hoo At Sw bulug pengko ho doodo. Hoggab nulv At Swg dookumko ho nulv atv atam koi gob mvca sudwn?”

⁴‍Hwdlo Mojes ham tapa yin, mwwg nyuqm mam mwv mompium sunum,

⁵‍hoo mwv Kora nvla mwwg ajin dvparam benum, “Aaram aram At Sw hiyv Mwwg gv ho hiyv dvrwqdvn ham kaakin tayin, hoo mwam mwwg ogumho boatayin. Hiyv nyi akam mwv xuqpa kun mwam mwwg ogumho boatayin.

⁶‍Sam nyito: Kora la mwwg ajin dvparam wm parnan loora loq naamto;

⁷‍wm loq hoq tuluho vlwqto hoo sulum loq hoqho vlwq tvl aaram mam At Swg agaho pvvl apto, hoo hiyv nyiam At Sw xuqlin tayin hv dvrwq tayin. Lebi ko tuup tulu nulv aado jaqb wxar paku!”

⁸‍Hoo Mojes Koranvn benum, “Lebig ko tuup tulu, nulv sija tagabto:

⁹‍Israelwg Pwnbov nulam mwwg ogumho hvvnwq mvdvb, At Swg xumk pirho bon nyim dvb hoo nyi tulug dvpar agaho bul gab bon nyim dvb, nulam Israelwg dvpar hoqgv vpwb xuqbwqnam mam anyo gob mwwd nvi yv,

¹⁰‍hoo mwv nam mwwg ogumho, hoo noqg vbw-boram Lebig ko tuup tulungam noqg lvgab boa pak nvi yv? Hoo sija no nyub bvkam swwdwb meegaq dvn yv?

¹¹‍Hoqgab no la noqg ajin dvpar tulug lvkin gob hookumnam si At Swn ceekol nyinam go. Aaron hoggv, nulv haql-pal mwam ceeko gvdwn?”

¹²‍Hoo Mojes Eliyabg ko tuup tulu Datan nvla Abiramnvn nyi roolwq tvl goqmnum, hoo bulv benum, “Ngulv haaram.

¹³‍No ngulug wtw lyuminko hoo ngola biqminko gvda hoqgv boolin layil soq deexa-rara so mengta namsi anyo gob mwwdo i, ho no atv atam ngulug aoso lvpw at gob mvl swwg tadwn i?

¹⁴‍Hoq aoho, no ngulam gvda wtw lyuminko hoo ngola biqminko gvdaho ngulam rongo tulungam la roo boolungam otu nvvsiq mvdvb boa kuma. No soq nyi tulug vnyiq sam naapaq bvi yv? Ngulv haaram.”

¹⁵‍Hoo Mojes vc loodab hang lengnum hoo At Swn benum, “Bulug akiam ximabv. Ngo bul galoqkv svdam dorkin gokam naama, hoo ngo bulam akin gokam hentwr dvb mvmanum.”

¹⁶‍Hoo Mojes Koranvn benum, “Aaram mam no la noqg ajin dvparv, hoo Aaron la nulv At Swg agaho haato.

¹⁷‍Hoo nulv nyiicwr-cwrxiv mwwg wm parnan loora ho vx-cwrv sulum mam vlwqto, hoo nulug 250 gob wm parnan loora ham, nulv nyiicwr-cwrxiv At Swg agaho bwato; Aaron, no kam, noqg wm parnan loorangam bwato.”

¹⁸‍Ho nyiicwr-cwrxiv mwwg loora ho wm mam vlwqtvl hoo sulum mam hoq tuluho vlwqnum hoo Mojes la Aaron lvgab kvvrwq minsko tombu haagaho daqnum.

¹⁹‍Ho Kora nyi mwlw dvparam kvvrwq minsko tombu haagag bulug taqcgon ho hookum mvnum. Hoo At Sw yuunamv dvpar mwlwho haanum.

²⁰‍Hoo At Sw Mojes nvla Aaronnvn agam goonv begamv,

²¹“Nulv atv atam soq nyi tulug pengko soqgv dvqbwqto, ho ngo bulam nyiqyab-nyiqbio maatab dvmeq tayin.”

²²‍Hoo bulug nyuqm mam bulv kedho pvxw nv benum, “Pwnboa, mwlwg swwgwg soodin yalam jinbov Pwnbov, nyi akin nyic nyigo gab, no mwlw dvparam hang lengd nvi yv?”

²³‍Hoo At Sw Mojesnvn agam goonv begamv,

²⁴“Nyi dvparam beto, Kora, Datan, hoo Abiramwg doogw ko hoqgv wleqto.”

²⁵‍Ho Mojes gorab banv Datan la Abiram dookub wnum hoo Israelwg nyi axa tulungv mwam wmin gvnum.

²⁶‍Hoo mwv nyi dvparam agam goonv begamv, “Soq nyic bo nyi tulug tombu soqgv wleqto, hoo bulug dupum-dvrab pam vcwr gokam idaq maabv, nulv idaq baloqkam nulam bulug nyic lvgab nuul wtaq gvtayin.”

²⁷‍Ho Kora, Datan, hoo Abiramwg doogw ko hoqgv bulv wleq kunum. Hoo Datan la Abiram lvvgwb lengnv hoo bulug tombu viyapho bulug nywxw tulu lvgab, bulug ko tuup tulug lvgab, hoo bulug ko anyo bo tulu lvgab daqnum.

²⁸‍Hoo Mojes benum, “Ngam At Sw soq nyis tulu sam nyim dvb kanam panbo hvl nulv cengtayin, hoo soq tulu si ngoqg atwg hoqgv ma.

²⁹‍Soq nyi tulu si nyi sicwb bulv sim nyiloqkam, ho bulv nyia ko sinam hvb sim nyiloqkam, At Sw ngam kanam maapan.

³⁰‍Hvbmabde At Sw luusaqb nyitayin, hoo ked deelangv gamkoq layil bulam la bulug dupum-dvrab mwlwngam gvmlwq gvtayin, hoo bulv tordwb Sux-ywlw nyookub ipoqtayin, ho nulv cengtayin hoq nyi tuluhv At Swn haqpaqnum.”

³¹‍Hoo mwv hoq agam tulu ham benya kalam bulug dvqgw ked deelangv tvqnyi gob taqcnum.

³²‍Hoo swcwngv gamkoq kunv bulam la bulug imiq dvparam hoo Kora nyiilungam hoo bulug gumn-ran mwlwngam dvmeq kunum.

³³‍Ho bulv la bulug tumanam tulungv tordwb Sux-ywlw urab ipoqnum, hoo bulam swcwngv gomcub kunum, hoo bulv dookumko pengko hoqgv jimy-jemab niipaq kunum.

³⁴‍Hoo Israel nyiilungv bulv kejo ywwtwl sogoq kiirl bulv benum, “Hvb mabol Swcwngv ngulam dvmeq tai!”

³⁵‍Hoo At Sw hoqgv wmv haabnv sulum parl aky jidu bo 250 nyiam dvmeql guiyumnum.

³⁶‍Ho At Sw Mojesnvn agam goonv begamv,

³⁷‍Nyub Aaron gv ko tuup Eleajarnvn wm parnan loora xvwrbo tulungam naapaq tvk hvl beto. Ho wm tulu ham aado bvla mwrs-mwrtwr mwrpaq tvk hvl benum, hoggab bulv dvrwq pakun.

³⁸‍Bulv atwg swwgam jipaq sudwb nyic nyinbo tulug wm parnan loora tulu ham yugwngam tomlupnan dvb kvnyi lvgab jwwbar to, hoggab bulv ham At Swg agaho aky jinum, hoo hoq tuluhv dvrwqdvn. Soq tulu si Israelwg nyiilu gab mwwpanam gob nyitayin.”

³⁹‍Ho nyub Eleajar tama wm parnan loora tulungam naanum, hogloq ham wm parl aky jinum, bulv ham yugwngam tomlupnan dvb kvnyi lvgab jwwbar kunum,

⁴⁰‍ho Israel nyiilungam mwwpa mvdwb, ho Aaron gv hosiq maanbov At Sw gab sulum park ogumho hvvnwq maabv, hvbmab nyiloqkam Kora la mwwg ajin dvparam nyinam hvb nyitayin—At Sw Mojes lvgab mwam agam goonum.

⁴¹‍Hvbmabde aal loogwn so Israel nyiilug dvparv Mojes nvla Aaronnvn haqb nv ceekol begamv, “Nulv At Sw nyiilungam mengpaq paku.”

⁴²‍Hoo hwdlo nyi dvparv hookuml Mojes nvla Aaronnvn ceekol kvvrwq minsko tombu daiyab pwrnum. Hoo kaato, hoqham doomwqkv pulupnum, hoo At Swg yuunamv haanum.

⁴³‍Hoo Mojes la Aaron kvvrwq minsko tombu agaho haanum,

⁴⁴‍hoo At Sw Mojesnvn agam goonv begamv,

⁴⁵“Soq nyi tulug pengko soqgv aadob wleqto, ho ngo bulam nyiqyab-nyiqbio maatab dvmeq tayin.” Hoo bulug nyuqm mam bulv kedho pvxwnum.

⁴⁶‍Hoo Mojes Aaronnvn benum, “Noqg wm parnan loorangam naato, hoo yugw hoqgv wm lo hoqho vlwqto hoo sulum mam hoqho vlwqto hoo nyi dvpar dookub nyebia jaqb joogwn hoo bulug nyic kwly gab pwr jita, hoggab At Swg hoqgv hang lingtwrnamv lengn kuba; swlin-mominv nyirab paku.”

⁴⁷‍Ho Mojes benum hvb Aaron ham naalayil nyi dookumko pengkob xaranum. Hoo kaato, nyiilug pengko ho swlin-mominv nyirab robdu kunum. Hoo mwv sulum mam vlwqtvl nyiilu nyic kwly gab pwr jinum.

⁴⁸‍Hoo mwv sinbo gvla tornbo pengko ho daqnum, hoo swlin-mominv nyingin kunum.

⁴⁹‍Hoo Korag nyi tulu lvgab sin boam xipaqtvl, hoq swlin-mominho sin bov 14,700 kunum.

⁵⁰‍Hoo hwdlo swlin-mominv nyingin yukam, Aaron kvvrwq minsko tombu haagag Mojes dookub wkur kunum.