Read Nyishi XINAM 17 Bible Online

XINAM 17 - Nyishi bible

XINAM 17

¹At Sw Mojesnvn agam goonv begamv,

²“Israel nyiilungam agam beg dvl ab vxig nombu hoqgv beqnyia loq naato. Bulug ab tulug imiq dvpar hoqg peelo bo vx-cwr hoqgv beqnyia loq daag-daagwb bwa mvto, okum-apal camleq dvvnyi gob bwa mvto. Nyi vxig eminam mwwg beqnyiaho xiqlwqto,

³‍hoo Aaron gv eminam Lebig beqnyiaho xiqlwqto. Hoggab ab tulug nombu vxyho eminb beqnyia daag-daagwb dootayin.

⁴‍Ho hogloq ho nam ngo kvvrwq mins dvn, no hoq tulu ham kvvrwq minsko tombug pvvb uddum agaho pvvl aptayin.

⁵‍Hoo hiyv nyiam ngo xuqtayin hoqg beqnyiangv nwmw jurlin tayin. Ho Israel nyiilungv ngam la nam ceekol haqnam-panam mam ngo mutum taikun.”

⁶‍Mojes Israel nyiilungam agam goonum. Hoo bulug peelo bo nyiicwr-cwrxiv bulug ab tulug nombu hoqgv beqnyia daasaq twq jinum, camleq dvvnyi go beqnyiangv jikumnum. Hoo Aaron gv beqnyiangv bulug beqnyia pengko ho doonum.

⁷‍Hoo beqnyia tulungam Mojes pvvb uddum tombug At Swg agaho pvvnum.

⁸‍Aal loogwn so Mojes pvvb uddum tombu urab haanum, hoo kaato, Lebi nombug Aaron gv beqnyiangv nwmw jurlinum hoo nwmw jurlin bov opu puul hoo almond ningn bo aaxy pwg xeenum.

⁹‍Hoo Mojes At Sw aga hoqgv beqnyia mwlwngam Israel nyiilug mwlwg agaho joolin kunum. Hoo bulv kaanum, hoo nyiicwr-cwrxiv mwwg beqnyiangam naaknum.

¹⁰‍Hoo At Sw Mojesnvn benum, “Aaron gv beqnyiangam pvvb uddumg agaho pvvkurto, bidu-bel tama bo nyiilu gab kaacin mvdwb apto, ho no bulug haql-pal ngam ceekonam mam nyingin mvtku, hvbmab nyiloqkam bulv sitayin.”

¹¹‍Soq sib Mojes nyiknum; At Sw mwam gaml bekjaqb mwv nyiknum.

¹²‍Hoo Israel nyiilungv Mojesnvn benum, “Kaato, ngulv yuupaq paku, ngulv twryum paku, ngul mwlwngv twryum paku.

¹³‍Nyiicwr-cwrxiv hiyv ogum hvvnwq bov, hiyv At Swg xumk pirr ogumho hvvnwq bov sitayin. Ngul mwlwngv yuupaq taikun yv?”