Read Nyishi XINAM 18 Bible Online

XINAM 18 - Nyishi bible

XINAM 18

¹Ho At Sw Aaronnvn benum, “No la noqg ko tuup tulungv hoo noqg abwg imiq dvparv dvrwq namlo hoqg nyixiaq nyijongam baqdwb nyitayin, hoo no la noqg ko tuup tulungv noqg nyubwg nyixiaq nyijongam baqdwb nyitayin.

²‍Hoo noqg lvgab noqg vbw-bor tulungam kam, hoo Lebi nyob tulungam, hoo hwdlo no la noqg ko tuup tulungv pvvb uddum tombug agaho bon nyiyikam, noqg abwg imiq dvparam noqg lvgab bon nyiba mvto.

³‍Bulv nam la hoo tombu mwlwngam rvkil doog tayin, hvbmabde dvrwq namlog dupum-dvrab la yugw ogumho wnwq mvmabv, hvb nyib nyiloqkam no la bulv sitayin.

⁴‍Bulv noqg lvgab nyimin gvtayin hoo kvvrwq minsko tombungam la hoqg hog mwlw bonam rvkil doog tayin, hoo nyi asaqkam noqg ogumb hvvnwq mvmabv.

⁵‍Hoo nulv dvrwq namlongam la yugwngam rvkil doog tayin, ho Israel nyiilug pengko ho lokta hang lingtwrnam mam haam kumabv.

⁶‍Hoo kaato, noqg vbw-bor Lebi nyi tulungam ngo Israel nyiilug pengko hoqgv naapa kun. Kvvrwq minsko tombu ho bon nyim dvb At Swn jipaq kunamv, bulv noqgab lvqc cinamv.

⁷‍Hoo no la noqg ko tuup tulungv nyubwg pagoqkam la vj tortumko urag yugw hoqg nyis-mvsam rvkil doog tayin; hoo nulv bon nyitayin. Ngo nulam nyubwb swwm dvb lvqc cigyin, hoo nyi asaqkv yugwg dupum-dvrab ogumho haab nyiloqkam ham sim tayin.”

⁸‍Ho At Sw Aaronnvn agam goonum, “Kaato, ngam jikumnam tulu gab, Israel nyiilug garxaqnam dupum-dvrab pagoq gab ngo nulam hoocum mvdwb jigyin. Ngo hoq tulu ham noqg bulw gob jipa kun hoo noqg ko tuup tulungv ham kuiyum namgub nyidwb nyitayin.

⁹‍Hogloq ham wmho parma pan, hoq tuluhv noqgab mwlwngam dvrwq yaanbo gob dootayin: bulug lwxiam aky jinam tuluhv, bulug lwxiam dvs aky jinam tuluhv hoo bulug lwxiam nyic gab aky jinam tuluhv hoo bulug lwxiam nyixiaq gab ngam aky jinam tuluhv noqgab la noqg ko tuup tulu gab mwlwngam dvrwq yaan gob nyitayin.

¹⁰‍Hoqham no mwlwngam dvrwq yaanbo nyookho dvtayin. Nyega vxiv ham dvla tayin; hoqhv noqgab dvrwqdvn.

¹¹‍Soq tulu siikam noqgv: Israel nyiilug torlinam aky mwlwhv, bulug lvqc cikumnam akiv. Soq tulu sam ngo nam jipa kun, hoo noqg ko tuup tulu ngvla nyem ko tulungv noqg lvgab kuiyum namgub dvdwb nyitayin. Noqg namho dvrwqbo nyiicwr-cwrxiv sam dvla tayin.

¹²‍Mwlwngam alyanbo kutiam hoo mwlwngam alyanbo roo ala twwsam hoo am mam, aaxy xeeco boam hoggv bulv At Swn jitayin, ngo nam jitayin.

¹³‍Otuqcob bulug ked hoqgv aaxy lengcol niingco boam bulv At Swn bwa jinam hv noqgab dootayin. Noqg namho dvrwqbo mwlwngv dvla tayin.

¹⁴‍Israelwg uraho hog mwlw Pwnbon jinamv noqgv ku.

¹⁵‍Hoolu deedy nyi jaqkam ho maalo svdin jaqkam otuqcob ko bwwconam mam bulv At Swn jitayin, hoq tuluhv noqgab dootayin. Hvbmabde otuqcob ko bwwnam mam no pvlyw tayin, hoo dvrwq maanbo svding otuqcob ko bwwnam mam no pvlyw tayin.

¹⁶‍Hoo bulam pvlywnan (bulam pool bargwb akam yukam pvlyw tayin) koram rup sikil ang gob loornum, hoqhv dvrwq namlog sikil xicw jaqb xinum, hoqhv gera camnyinum.

¹⁷‍Hvbmabde otuqcob svv ko bwwnam ham, otuqcob sviya ko bwwnam ham, ho otuqcob sibin ko bwwnam ham, no pvlyw maabv; hoq tuluhv dvrwqdvn. Bulug hijum mam yugw ho pwqyaq dvb nyitayin hoo bulug oxam At Swn sungam bo dvs aky gob pardwb nyitayin.

¹⁸‍Hvbmabde bulug vdinv noqgv, hog copium mam torlinam aky gob hoo xvrbwq axarv noqgv ku.

¹⁹‍At Swn Israel nyiilug dvrwqbo aky jikumnam mwlw ham ngo nam jigyin, hoo noqg ko tuup tulungv la nyem ko tulungv noqg lvgab kuiyum namgub dvtayin. Hoqham At Swg agaho nam la noqg ko hosiq tulungam mvpia lama dvb nwrba xaqb pvvb mwr gvikun.”

²⁰‍Hoo At Sw Aaronnvn benum, “No bulug gvdaho otu nvvsiqram, ho nam bulug pengko hookam ked jidy ma. Israel nyiilug pengko ho, ngo noqg gvda ked gob hoo noqg otu nvvsiqnam hvb nyitayin.

²¹“Bulv kvvrwq minsko tombu ho bulug bon nyigam gab, Israel ho jibwqnam aky tulu ham, Lebi nyi tulungam ngo otu nvvsiq mvdwb jipa kun,

²²‍ho Israel nyiilungv kvvrwq minsko ogumho hvvnwq maabv, bulv hvvnwq baloqkam bulug nyic nyijongam baqtayin hoo sitayin.

²³‍Hvbmabde kvvrwq minsko tombug bon tulu ham Lebi nyi tulungv nyitayin, hoo bulug nyixiaqkam bulv baqtayin. Soq sam kuiyum namgub noqg hotam-hotam xaqb pvvb gob pvvtayin, hoo Israel nyiilug pengko hoqgv bulv ked otu nvvsiqram.

²⁴‍Hoggab Israel nyiilug At Sw gab jikuml jibwqnam akiam ngo Lebi nyi tulungam otu nvvsiq mvdwb jipa kun. Hoqgab ngo bulam bepa kun bulv Israel nyiilug pengko hoqgv otu nvvsiqram.”

²⁵‍Hoo At Sw Mojesnvn agam goonv begamv,

²⁶“Hoq aoho no Lebi nyi tulungam agam beto, ‘Hwdlo nulv Israelwg nyiilu hoqgv nulam ngoqg otu nvvsiq mvdwb jiknam jibwqnam akiam naaikam, hoq hoqgv nulv At Swn aky jito, jibwqnam aky hoqgv jibwql jilin to.

²⁷‍Hoo nulug aky jinam tulu ham nulug jurpy hoqgv am jinam hvb, hoo nulug roo ala mvlinko hoqgv bwwrdvb jinam hvb xitaq tayin.

²⁸‍Ho Israelwg nyiilu hoqgv nulug aky nvvrwqnam hoqgv nulv At Swn nulug jibwqnam akiam jikum tayin. Hoo hoq hoqgv nulv At Swn jil nyub Aaronnvn jikum tayin

²⁹‍Nulam lvqc cinam tulu hoqgv nulv At Swn jidy sanam mam jitayin; hoqg albo luucw-luut hoqgv jitayin.’

³⁰‍Hoqgab no bulam beto, ‘Hwdlo nulv hog ak jiyikam hoqg mwlwngam alyan boam jito, hoo hoqg jingongam Lebi nyi tulug jurpy hoqgv, hoo roo ala mvlin ko hoqgv mvlin pan hvb xitaq tayin.

³¹‍Hoo nulv la nulug imiq dvparv, nulv ham hoglo jaqkam dvla tayin, hoggab hoqhv nulv kvvrwq minsko tombu ho bon nyigam gab nulam lvqc ciknamv.

³²‍Hoo hwdlo nulv aljaqn boam jiyikam, hoqham nyigam gab nulv nyic laqm mam baqram. Hvbmabde Israel nyiilug dvrwqbo dupum-dvrab pam nulv kacdvb mvma bvka, hvbmab nyiloqkam nulv sitayin.’”