Read Nyishi XINAM 19 Bible Online

XINAM 19 - Nyishi bible

XINAM 19

¹At Sw Mojes nvla Aaronnvn agam goonv begamv,

²“Soq pvvb nyicw tulu sam At Sw gaml jipa kun: Israel nyiilungam beto un-tar gvma bo hoo nywywngam luuk tuka maanam lwwcw bo svv loq dorg boa mvto.

³‍Hoo nulv ham nyub Eleajarnvn jitayin, hoo ham svmcw lvvgwb boolin tayin hoo mwwg agaho patab tayin.

⁴‍Hoo nyub Eleajar hoqg hijum meeg naalayil mwwg lvqcwho hijum mam kvvrwq minsko tombu ho kvn go pwqyaqnum.

⁵‍Hoo svv ham mwwg kaagaho wm partayin. Hoqg vpinam, hoqg vdinam, hoo hoqg hijum mam, hoqg ee lvgab wm partayin.

⁶‍Hoo nyubv sidar wswngam hoo hissopam hoo lwwsa-lwwma bo tanam svv ham wm guduko ho hurlwq tayin.

⁷‍Ho nyubv mwwg vjam niixaq tayin hoo mwwg gv-ngam iss lvgab hurs tayin, hoo hoq kokwngam mwv svmcw urab haatayin. Hvbmabde nyubv ariyum namgub dvrwqmab dootayin.

⁸‍Ho svv ham wm parnbo ak hv mwwg vjam iss lvgab niixaq tayin hoo mwwg gv-ngam iss lvgab hurs tayin hoo ariyum namgub dvrwqmab dootayin.

⁹‍Hoo dvrwqbo nyi ak svv hoqg wm muiyam nookum layil ham svmcw lvvgwg dvrwqbo nyook ho yaqpwl aptayin. Hoo ham Israel nyiilug dvparv dvrwq maaikam iss lvgab darxaq naadwb apnum; hoqhv nyic akiv.

¹⁰‍Hoo svv hoqg wm muiyam riikum bo ak hv mwwg vjam niixaq tayin hoo ariyum namgub dvrwqmab dootayin. Hoo soq pvvb tulu sam Israelwg nyiilu ngvla bulug pengko ho nyoodo nyi doon bov kuiyum namgub nyitayin.

¹¹“Hiyv lajaqkam nyi sinbo svmangam idaqbov aal kvn gob dvrwqmab dootayin.

¹²‍Mwv atv atam iss lvgab aal loum mam la kvn deen aalam xeexaq sutayin, hoo dvrwq tayin. Hvbmabde mwv atv atam aal loum hoola kvn deen aalam xeexaq mabaloqkam, mwv dvrwqmab dootayin.

¹³‍Hiyv lajaqkam sinbo nyi svmangam idaq peel, hoo mwv atv atam xeexaq mabaloqkam, mwv At Swg xumk pirram kacdvb mvdwn, hoo Israel hoqgv hoq nyi ham mvpaq tayin; hoggab xeexaqnam issam mwwg aoho pwqyaq ma, mwv dvrwqmab dootayin. Mwwg dvrwq maanamv mwwg aoho hvraqb doodwn.

¹⁴“Tombu ho nyiingv siyi nyiloqkam soq pvvb tulu sam nyito: nyiicwr-cwrxiv tombu ho haanbov la nyiicwr-cwrxiv hiyv tombu ho doon bov aal kvn gob dvrwqmab dootayin.

¹⁵‍Hoo dupum-dvrab vx-cwrv kuqko tvl kuqtumnan dooma baloqkam hoqhv kac tvl dootayin.

¹⁶‍Hiyv lajaqkam nyoro maalo rongo ho lyoqr orioq lvgab nyi mengnam mam ho atv sidin sinbo svmangam, ho nyi alongam, ho nyubungam idaqbov, aal kvn gob dvrwqmab dootayin.

¹⁷‍Hoggab bulug dvrwq maanam mam mvxaq dvb nyic aky gab parnam muiyam naatayin, hoo dvrwqbo issam pwcwho toobw lwqtayin.

¹⁸‍Ho dvrwqbo nyi ak hv hissopam naalayil ham hoq iss ho xwqbam tvl tombungam la hoqg uraho doonbo dupum-dvrab mwlwngam hoo nyi doonbo mwlwngam hoo hiyv lajaqkam alongam, mengnam svmangam ho sidin sin boam ho nyubungam idaqbo tulu ham pwqyaq tayin.

¹⁹‍Hoo dvrwqbo nyi ak hv dvrwq maanbo ham aal loum hoola kvn deen aalam pwqyaq tayin. Ho kvn deen aalam mwv atv dvrwq taikun, hoo mwwg vjam mwv niixaq tayin hoo mwv atv iss lvgab gv hurstayin, hoo ariyum mam mwv dvrwq taikun.

²⁰“Nyi dvrwq maanbo nyiv mwv atv atam xeexaq mabaloqkam, mwv At Swg dvrwq namlongam kacdvb mvgam gab, hoq nyi ham dookumg pengko hoqgv mvpaq tayin. Hoggab mwwg aoho dvrwq mvdwb iss pwqnam ham pwqyaq maanam, mwv dvrwq maadwn.

²¹‍Hoo soq si bul gab nwrba xaqb pvvb gob nyitayin. Hiyv dvrwq mvdwb issam pwqyaqbo ak hv mwwg vjam niixaq tayin, hoo hiyv dvrwq mvdwb hwrxaqnan issam idaqbov ariyum namgub dvrwqmab dootayin.

²²‍Hoo dvrwq maanbo nyi akwg idaqnam hog mwlwngv dvrwq maatayin, hoo ham hiyv lajaqkam idaqbov ariyum namgub dvrwqmab dootayin.”