Read Nyishi XINAM 20 Bible Online

XINAM 20 - Nyishi bible

XINAM 20

¹Israel nyiilug dvparv otuq jaq poolho Jin deexa-raraho haaknum, hoo nyiilungv Kades ho doonum. Hoo Miriyam siknum hoo hoqho svma liiknum.

²‍Hoqho nyi dvpar gab iss doomanum. Hoo bulv atv-atv lvkin gob hookum nv Mojes nvla Aaronnvn ceekonum.

³‍Hoo nyiilungv Mojes lvgab yolu dunv hoo benum, “At Swg agaho ngulug vbw-bor tulu lvgab sinamv alyatba!

⁴‍Hoggub nulv soq deexa-rara so nyi dvparam At Swg dookum koob boa pakun, ho ngulam la ngulug svdinam sim dvb yv?

⁵‍Hoo hoggub nulv ngulam Ijipt gvda hoqgv boolin layil soq alman nyook so boolwq pakun? Soq nyook so am, ho taoq aaxy, ho roo aaxy, ho annar aaxy, hoo twws iss gokam dooma.”

⁶‍Ho Mojes la Aaron nyi tulu dook hoqgv kvvrwq minsko tombu haagab wnum hoo bulug dumpongam bulv pvxwnum. Hoo At Swg yuunamv bulam kaakinum,

⁷‍hoo At Sw Mojesnvn agam goonv begamv,

⁸“Beqnyiangam naato hoo nyi dvparam no la noqg vbw Aaronnvn bool wgto, hoo bulug vnyiq kaagaho wlw hoqgv issam lengm to. Ho no wlw hoqgv nyiilu gab la svdin gab iss twwsam jito.”

⁹‍Hoo mwv mwam gaml jinam hvb, Mojes At Swg agaho hoqgv beqnyiangam naanum.

¹⁰‍Ho Mojes la Aaron nyi dvparam wlw agaho lvkin gob bookumnum, hoo mwv bulam benum, “Tagabto sija, taleqbo nyi tulu nulv: ngulv nulgab soq wlw soqgv issam naalin laiyin dvi yv?”

¹¹‍Hoo Mojes mwwg alaqkam lwwrab banv hoo wlwngam lwnyi go jwwnum, hoo issiv naleqgo tolinum, hoo nyi dvpar rvla bulug tuun-mee tulungv twwnum.

¹²‍Hoo At Sw Mojes nvla Aaronnvn benum, “Nulv ngam mwwjw ma, hoo Israel nyiilug vnyiq kaagaho ngam dvrwq dvb nulv pvvma, hoqgab nulv soq nyi dvpar sam ngoqg bulam gvda jitanam ho nulv boolwq kuram.”

¹³‍Hoq issam Meriba hvl benum, hoggab hoqho Israel nyiilungv At Swg lvgab yolu doonum, hoo bulug lvgab mwv atv atam dvrwq dvb kaakinum.

¹⁴‍Mojes Kades hoqgv Idomg lvpw atam pui bilwql nyi kanamnum: “Noqg vbw-bor Israelv soq pui sam bilwql bedo: No ngulug hentwr-kaas vs-axaqnam mam cengpa ku:

¹⁵‍hoggub ngulug ab tulungv Ijiptho wnum, hoo ngulv Ijiptho oyu mood go dooknum. Hoo Ijipt nyi tulungv ngulam la ngulug ab tulungam nyijab-nyiyiql almab nyiknum.

¹⁶‍Hoo hwdlo ngulv At Swn xabl ator koikam, mwv ngulug xabnam mam tapanum hoo gumtwngam kanam tvl ngulam Ijipt gvda hoqgv boolinum. Hoo ngulv sija Kades si doodwn, noqg dwrbu-dwryag bopam bviywr si doodwn.

¹⁷‍Ngulam anya mwwpa gvdwl noqg gvdangam wpeq mvtbv. Ngulv noqg rongo ho roo boolu, ho sokum issam twwj ram. Ngulv Lvpw atwg lamta paadab wtayin. Ngulv noqg dwrbu-dwryangam wpeq maady deedib ngulv lvqbwq bvkam ho laqc bvkam pwrkar-pwrar jiram.”

¹⁸‍Hvbmabde Idomv mwam benum, “No wpeq maabv, wpeq baloqkam ngo nam lyoqr orioq lvgab ceeko tayin.”

¹⁹‍Hoo Israel nyiilungv mwam benum, “Ngulv lamta paadab wpeq twqtayin, hoo ngulv la ngoqg tuun-mee tulungv noqg issam twbnyiloqkam ngo ham kor jitayin. Ngulam lvpia arongam wpeq mvdwb jila bv, hoq lvvgho ngulv hog akkam nyiram.”

²⁰‍Hvbmabde mwv benum, “No wpeq maabv.” Hoo Idomv naleqgo atorbo sipai tulungam boolayil bulam ceeko taab lengnum.

²¹‍Soq sib Idomv mwwg dwrbu-dwryaho Israelam wpeq mvdwb jimanum, ho Israel nyiilungv asaq lamtab wkurl mwwg hoqgv wleqnum.

²²‍Hoo bulv Kades hoqgv Israel nyiilug dvpar mwlwngv Hor Puutuho haaknum.

²³‍Hoo Idom gvda vrrho, At Sw Hor Puutuho Mojes nvla Aaronnvn benum,

²⁴“Aaron gab mwwg nyiilungam lvkin gob hookum mvto, hoggab Israel nyiilungam ngoqg gvda jitanam ho mwv haalaram, hoggab no ngoqg gamlam Meribag iss ho taleq paku.

²⁵‍Aaron nvla mwwg ko tuup Eleajarnvn Hor Puutu aob booca to.

²⁶‍Hoo Aaron gv vjam pisuq gvdwl hoq tulu ham mwwg ko tuup Eleajarnvn pilwqto. Hoo Aaron gab mwwg nyiilungam hookum mvtayin hoo tolo mwv sitayin.”

²⁷‍Mojes At Swg gaml bekjaqb nyinum. Hoo bulv nyi dvparg vnyiq kaaga hoqgv Hor Puutub caanum.

²⁸‍Hoo Mojes Aaron gv vjam pisuqnum hoo hoq tulu ham mwwg ko tuup Eleajarnvn pilwqnum. Hoo Aaron hoq puutu aoho siknum. Ho Mojes la Eleajar puutu hoqgv ipoq kunum.

²⁹‍Hoo hwdlo Aaronnvn nyi dvparv kaapa kumayin, Israel nombungv Aaron gab aal cammum go xabl-riil doonum.