Read Nyishi XINAM 21 Bible Online

XINAM 21 - Nyishi bible

XINAM 21

¹Hwdlo Kanaan nyi tulug, Lvpw at Arad, Negebho doon bov Israel nyiilungam Atharim lamtab hoodunam mam tapanum, hoo mwv Israel nyiilungam ceekol nyob panum, hoo nyi tuugin nyumwb boonum.

²‍Israelv At Swn dingbnv hoo benum, “No mwwlwq baloqkam soq nyiilu sam ngoqg alaqso jitayin, ho ngo bulug bopam tulu sam twryum tayin.”

³‍Hoo At Sw Israel nyi tulug xabnam yalam tapanum ho Kanaan nyi tulungam bulam jinum, hoo bulv bulam la bulug bopam tulungam twryumnum. Ho hoqg nyookam Horma hvl benum.

⁴‍Hor Puutu hoqgv bulv Swlw Sa-svlo lamta daiyab Idom gvdangam warl wnum. Hoo nyiilungv lamtaho cwqla kumanum.

⁵‍Hoo nyiilungv Pwnboam la Mojesnvn ceekol agam goonum, “Hoggub nulv ngulam Ijipt gvda hoqgv deexa-rara so sim dvb boolinum? Hoggab soq so dvs dooma hoo iss dooma, hoo soq dooxa-xaaram bo dvsam ngulv dwnw kuma.”

⁶‍Ho At Sw tvb bortangam nyiilug pengko ho kanamnum, hoo bulv nyiilungam cennum, ho Israel nyiilungv naleqgo sinum.

⁷‍Hoo nyiilungv Mojes dookub haabnv benum, “Ngulv nyic nyipa ku, hoggab ngulv At Sw nvla nam ceekol agam goonum. Ngulug pengko soqgv tvb sam mvpaq mvdwb, At Swn swgw tvbv.” Ho Mojes nyiilu gab swgw jinum.

⁸‍Hoo At Sw Mojesnvn benum, “Bos kaapa dvb tvb borta loq ak mvto hoo ham daapo gol torcal apto, hoo hiyam jaqkam tvbv ceyikam mwv ham kaabaloqkam, hv swwtayin.”

⁹‍Ho Mojes tama tvb borta ak mvtwl hoo ham daapo aoho torcal apnum. Hoo hiyam jaqkam tvb cenam hv mwv tama tvbam kaabaloqkam swwtayin.

¹⁰‍Hoo Israel nyiilungv hoqgv wrab kunv Obotho svmcw doonum.

¹¹‍Hoo bulv Obot hoqgv wrab kunv dou-caga daiyag Moab taqcgonwg deexa-raraho Iye-abarimho svmcw doonum.

¹²‍Hoq hoqgv bulv wrab kunv hoo Jered Lywpa ho svmcw doonum.

¹³‍Hoo bulv hoq hoqgv wrab kunv Arnon pobu kvtin gonho svmcw mvl doonum. Hoo hoq deexa-rarahv Amor nyi tulug gvda vrr namgub wnum, Arnon pobu hv Moab gvla Amor nyi tulug gvda vrrho doonum.

¹⁴‍Hoqgab At Swg Nyob Panam Kitapho hvl bepanamv doodwn, “Huaheb Supa uraho, hoo Arnon lywpa ho doodwn,

¹⁵hoo hoqg lywpangv lywjo-lywyo nv Ar bopam namgub lywlin dvn, hoo hoqhv Moab vrr namgub lengdwn.”

¹⁶‍Hoo bulv hoq hoqgv Beerwb hvraq wdul doonum; ho hoq sokum ho At Sw Mojesnvn benum, “Nyiilungam lvkin gob bookumto, ho ngo bulam iss twws jitayin.”

¹⁷‍Ho Israel nyiilungv soq bemin sam benum: “Sokum ma! Iss subuqkam buqlinto, —Hoqham bemin to!—

¹⁸lvpw atwg ko tuup tulug sokum hwwnam, ho xinam nyiilug bulug xinam sabku ngvla bulug beqnyia lvgab dukoq kunum.” Hoo hoqg deexa-rara hoqgv bulv Mattanab wknum,

¹⁹‍hoo Mattana hoqgv Nahaliyel, hoo Nahaliyel hoqgv Bamot,

²⁰‍hoo Bamot hoqgv Moabg swsw-saangv lywpa dook Pisga puutu niqtuq hoqgv kaabol diixa-rarangam kaapanum.

²¹‍Ho Israel nyiilungv Amor nyi tulug lvpw at Sihonnvn pui bilwql nyi kanam tvl bemnum,

²²“Ngulam noqg gvdangam wpeq mvtbv. Ngulv nulug rongo ho roo boolu bvkam wkar-war jiram. Ngulv noqg sokum hoqgv kam iss twwj ram, noqg dwrbu-dwryangam ngulv Lvpw atwg Lamta paadab wl wpeq twqtayin.”

²³‍Hvbmabde Sihon Israel nyiilungam mwwg dwrbu-dwryab wpeq mvmanum. Mwwg nyiilungam mwv lvkin gob goqkum layil deexa-raraho Israelam ceeko taab wnum, hoo Jahajho haanv hoo Israelam ceekol nyob panum.

²⁴‍Hoo Israelv mwam lyoqr orioq lvgab nyob paiya nv mwwg gvdangam Arnon hoqgv Ammon nyi tulug gvda vrr Jabbok namgub naaknum, hoggab Ammon nyi tulungv gvdaho vrrho ator jaqnum.

²⁵‍Hoo Israel nyiilungv soq bopam tulu sam naaknum, hoo Israel nyiilungv Hesbon urag Amor nyi tulug bopam mam la hoqg nampam mwlwngam bulv naaknum.

²⁶‍Hoggab Hesbon hv Amor nyi tulug lvpw at Sihonwg bopam gob nyinum, otuqho mwv hoqham Moab lvpw atam nyob paiya layil mwwg gvda mwlwngam mwv Arnon pobu namgub naaknum.

²⁷‍Hoqgab bemin benbo tulungv soq sib bedo, “Hesbon lo hookumto, kuj ham ywrtuj; Sihonwg bopam mam lokta doom dvb mvtuj.

²⁸Hoggab Hesbon hoqgv wmv lengnum, Sihon bopam hoqgv moiliv bioqlinum. Hoqhv Moabg Ar nyookam guiyumnum. hoo Arnonwg aongam lyomeqnum.

²⁹Moaba! No hengka suto, Kemos nyiilunga, nulam mviya paku! Mwwg ko tuup tulungam mwv keleqdvb mvpa kun, hoo mwwg nyem ko tulungam, Amor tulug lvpw at, Sihon nyumwb boom pakun.

³⁰Ho ngulv bulam, Hesbon hoqgv Dibon namgub yuupaq dvb mvpa kun; hoo ngulv Nopa namgub gvdangam dooxa dvb mvpa kun; Medeba namgub wm mam tolwq pakun.”

³¹‍Ho Israel nyiilungv Amor nyi tulug gvdaho doonum.

³²‍Hoo Mojes Jajeram mvqky-maqlam mvm dvb nyi kanamnum, hoo bulv hoqho nampam tulungam naareqnum hoo Amor nyi tulu hoqho doon boam ruqlin xaanum.

³³‍Ho bulv tobkur kunv hoo Basan lamtab wknum. Hoo Basanwg lvpw at Og bulam ceekol taab lengnum, mwv la mwwg mwlw nyi tulungv Edrei ho nyob panum.

³⁴‍Hvbmabde At Sw Mojesnvn benum, “Mwam bos maabv, hoggab ngo mwam la mwwg nyi tulungam hoo mwwg gvdangam noqg alaqho jipa kun. Hoo Hesbon ho doonbo Amor nyi tulug lvpw at Sihonnvn mvnam hvb mwam mvtayin.”

³⁵‍Ho mwam, la mwwg ko tuup tulungam hoo mwwg nyi tulungam akkam swwl dooma daqdwb bulv nyob pal mengnum. Hoo mwwg gvdangam bulv gumn bwwknum.