Read Nyishi XINAM 22 Bible Online

XINAM 22 - Nyishi bible

XINAM 22

¹Ho Israel nyiilungv hoqgv wknv Moabg haapag Jordonam hvvc maatab Jeriko ho svmcw mvl doonum.

²‍Hoo Amor nyi tulungam Israel nyiilungv hoggub mvknum ham Jippor ko tuup Balak mwlwngam kaaknum.

³‍Hoo Moabv nyiilungam vc loodab bosnum, hoggab bulv mvqlwnum. Moabv Israel nyiilungam vc loodab bosnum.

⁴‍Hoo Moabv Midian nyi axa tulungam benum, “Svv hvvbv nwmw dvxinam hvb so nyi tulu si ngulug diis-paapam mwlwngam sija dvxin taiku.” Ho Jippor gv ko tuup Balak, hoq moodho Moabg lvpw at gob nyinum,

⁵‍Amau nyiilug gvdag pobu bviywrg, Petor nyookho doonbo Neorg ko tuup Balaamnvn, nyi kanam tvl pui bepa mvnum hoo mwam goqta hvl begamv, “Kaato, Ijipt hoqgv lengn bo nyiilungam. Bulv swcwg nyuqm mam pumlup paku, hoo bulv ngoqg taqcgon vv doodu do.

⁶‍Bulv ngoqgab vcjaqb ator do, hoqgab sija haato, soq nyiilu sam ngoqgab ding-joog dvl beeto. Ho lokam ngo bulam mviya kamyi nvpv hoo gvda hoqgv bulam ruqpaq tayin, hoggab ngo cengdo no hiyam lvqc gab ator kojnamv xinam gob swwdwn, hoo hiyam noqg beenamv hv beenam gob nyidwn.”

⁷‍Ho Moab nyi axa tulu ngvla Midian nyi axa tulungv bujongam joody sanam mam bulug alaqho bwwlayil wnum. Hoo bulv Balaam dookho haalayil Balak puiyam betamnum.

⁸‍Hoo mwv bulam benum, “Soi so dooto, hoo At Swg hog hvl agam gootayin hoqg gomcwram ngo nulam betam tayin.” Ho Moabg nyigbo tulungv Balaam lvgab doonum.

⁹‍Hoo Pwnbo Balaamnvn haanv benum, “Noqg lvgab doonbo nyi tulu si hiyv?”

¹⁰‍Hoo Balaam Pwnbon benum, “Moabg lvpw at, Jippor gv ko tuup Balak ngoqg dookub kanam nv begamv,

¹¹‘Kaato, Ijipt hoqgv lengn bo nyiilungv, hoo bulv swcwg nyuqm mam pumlup paku. Hoqgab sija mwwg dookub haal bulam dingl-jool beet bvk hvl bedo. Ho lokam mwv bulam ceekol nyob paiyal hoo bulam ruqpaq dvb hvdo.’”

¹²‍Pwnbo Balaamnvn benum, “No bulug lvgab wmin gvmabv. No nyiilungam beemabv, hoggab bulv xinam nyi ngvku.”

¹³‍Ho Balaam ar komc gorab layil Balakwg nyigbo tulungam benum, “Nulv nulug gvdab wkur nuku, hoggab At Sw ngam nulug lvgab wma bvk hvl bedo.”

¹⁴‍Ho Moabg nyigbo tulungv wknv Balaknvn benum, “Balaam ngulug lvgab haaram hvl bede.”

¹⁵‍Balak lokta nyigbo nyi tulungam, otuqg ham mvqlw yad bvla xibin yaanam nyi tulungam kanamnum.

¹⁶‍Hoo bulv Balaam dookho haanv hoo mwam benum, “Soq sib Jippor gv ko tuup Balak bedo: ‘No ngoqg dookub haadwb hog vs-axaq mwwtub saqc maabv,

¹⁷‍hoggab ngo nam hoggub nyijaqkam koi jaqb xitayin, hoo no hoggv betayin ham ngo nyitayin. Haag dvl soq nyiilu sam ngoqgab dingl-jool beetbv.’”

¹⁸‍Hvbmabde Balaam birwqnum hoo Balakwg nyera tulungam benum, “Balak ngam mwwg nam nvmpwho bwwr dvb rupam la hunam jisjaqkam, ngo ngoqg Pwnbo At Swg gaml jinam lvvgho ngo nyiwq-nyito dvb nyima do.

¹⁹‍Ho nulv kam soi anya mwwpa gvdvl doonu to, hoo ngam At Sw hoggv beta dvn ham ngo hvraqb cengka tayin.”

²⁰‍Hoo Pwnbov ai Balaam dookub haanum hoo mwam benum, “Soq nyi tulu si nam goqtab haad nyiloqkam no bulug lvgab gorabl wmin gvto; hvbmabde nam ngo hoggv betayin ham no nyitwqto.”

²¹‍Ho Balaam ar komc gorabnv mwwg svdam mam mwx-mvaq layil Moabg nyigbo nyi tulu lvgab wmin gvnum.

²²‍Hvbmabde mwwg wggam gab Pwnbo hang lengnum, hoo At Swg gumtwngv mwwg ceebio gob nyil lamtaho doqtumnum. Mwv svdam aoho wdul doonum, hoo mwwg nyera vnyi go mwwg lvgab wmin gvnum.

²³‍Hoo lamta paadaho At Swg gumtwngv lyoqr orioqkam mwwg alaqho bwwtwl daqdwb kaapanum. Hoo svdamv lamta paada hoqgv rongo lamta yaab tokurl wnum. Hoo Balaam svdam mam lamta paadab wkur mvdwb jwwnum.

²⁴‍Ho At Swg gumtwngv roo boolug lamta lyobu golo daqnum.

²⁵‍Hoo svdamv At Swg gumtwngam kaapanum, ho mwn taqg-loosaq bvliam tubnaq-tubraql wnv Balaamwg lvpiangam bvly ho rajabnum. Ho mwv lokta mwnwn jwwnum.

²⁶‍Ho At Swg gumtwngv wco layil pagoq goqcw ko golo doqtumnum, hoq pagoq hoqgv lvqbwq bvkam ho laqc bvkam tobkur taxeqko lamta asaq doomanum.

²⁷‍Hwdlo svdamv At Swg gumtwngam kaapa yin, mwn Balaamwg niikumho bumanum. Hoo Balaam hang lengrabnv mwv svdam mam mwwg beqnyia lvgab jwwnum.

²⁸‍Ho At Sw svdam mam agam goom dvb jinum hoo mwn Balaamnvn benum, “Hoggv ngo nam nyipa, no ngam soq luum paqta go jwwg yin?”

²⁹‍Hoo Balaam svdam mam birwqnum, “Hoggab no ngam pacab mvpa ku. Ngoqg alaq so lyoqr orioq doonyiloqkam, ngo nam mengp kunpv.”

³⁰‍Hoo svdamv Balaamnvn benum, “Ngo noqg svdam maaiyv, soolo namgub noqg swwca bumpwho no ngoqg aoso wma nvm yv? Soq nyinam sib ngo nam nyika namyv?” Hoo mwv benum, “Hvb nyika ma.”

³¹‍Ho At Sw Balaam vnyiqkam nyiqbiol At Swg gumtwngam mwwg alaqho lyoqr orioqkam puseqtvl lamtaho doqdunam mam kaapa mvnum. Hoo mwwg nyuqm mam mwv kedho pvxwnum.

³²‍Hoo At Swg gumtwngv mwam benum, “Hoggub no noqg svdam mam luum go jwwnum? Kaato, no ngoqg lamta hoqgv wxar ko-gab ngo nam ceeko taab lengnum.

³³‍Svdamv ngam kaapa peel hoo ngoqg aga hoqgv luum go asaq lamtab wnum. Mwn luum go ngam kaapa peel asaq lamtab wma nyiloqkam nam ngo mengp kunpv hoo mwn swwl dood nvpv.”

³⁴‍Ho Balaam At Swg gumtwngam benum, “Ngo nyic nyipa ku, hoggab no ngam ceekol lamtaho daqnam mam ngo cengk ma. Hoqgab sija, noqg vnyiq kaagaho alkuma nyiloqkam, ngo wkur deekun.”

³⁵‍Hoo At Swg gumtwngv Balaamnvn benum, “Nyi tulu lvgab wmin gvno, hvbmabde ngo nam betamnam gomcwr tulu aro ham beto.” Ho Balaam Balakwg nyigbo nyi tulu lvgab wmin gvnum.

³⁶‍Hwdlo Balaam haadwk hvl tapa yin Balak mwv mwam kvvrwqtab Moab bopamg Arnon pobug vrrko gvdab wrwqnum.

³⁷‍Hoo Balak Balaamnvn benum, “Ngo nam goqm dvb nyi kanam maan mviyv? Hoggub no ngoqg dookub haamanum? Ngo nam xila maanbo akv yv?”

³⁸‍Balaam Balaknvn benum, “Kaato, noqg dookub ngo haapa kun! Ngoqg huqlw hoqgv ngo atv hog agam goodwb ator dood yv? At Sw ngoqg agamlo hog nvk gomcwram vlwq jitayin, ham ngo hoggub nyijaqkam goodwb nyitayin.”

³⁹‍Ho Balaam Balak lvgab wmin gvnum, hoo bulv Kiriat-hujot ho haaknum.

⁴⁰‍Hoo Balak hvvbam la sviyangam pwr jinum, hoo Balaam nvla mwwg lvgab nyigbo nyi tulu gab kanam jinum.

⁴¹‍Hoo arho Balak Balaamnvn boolayil Bamot-baalwb caagnum, hoo hoq hoqgv mwv nyiilu meegwn kaapanum.