Read Nyishi XINAM 23 Bible Online

XINAM 23 - Nyishi bible

XINAM 23

¹Hoo Balaam Balaknvn benum, “Ngoqg gab yugw loq kvn go mvto, hoo hvvb loq kvn go hoo yaap tvmwr loq kvn go mwx-mvaq apto.”

²‍Balaamwg benam hvbjaq Balak nyinum. Hoo Balak la Balaam yugw gwwx cwrho hvvb dorg la yaap tvmwr dorg jinum.

³‍Hoo Balaam Balaknvn benum, “Noqg boyuqnam aky jik bviywrho daqto, hoo ngo wtayin. Lokam At Sw ngam haal kvvrwq tayin, hoo hoggv mwv ngam kaatam tayin ham ngo nam betam tayin.” Hoo mwv asarko puutu aob caonum,

⁴‍hoo Pwnbov Balaamnvn wrwqnum. Hoo Balaam mwam benum, “Ngo yugw kvn go mwx-mvaq paku hoo yugw gwwx cwrho ngo hvvb dorg la yaap tvmwr dorg aky jipa kun.”

⁵‍Hoo At Sw Balaamwg agam ho gomcwram jilwqtvl hoo benum, “Balak dookub wkur nuku, hoo soq sib no agam gootayin.”

⁶‍Hoo mwv mwwg dookub wkur kunum, hoo kaato, mwv la mwwg nyigbo nyiilungv mwwg boyuqnam aky jik bviywrho doqdul doonum.

⁷‍Hoo Balaam mwwg nyiqry kaanam mam betaml benum, “Ngam Aram hoqgv Balak, dou-caga daiyag puutu hoqgv Moabg lvpw atv boa paku: ‘Haato, ngoqgab Jakubnvn ding-jool beetbv, hoo haato, Israel nyiilungam gamt tolwqto!’

⁸Hiyam Pwnbog beemanam tulu ham ngo hoggub dingl-jool beela tayin? Hiyam At Sw gamt tomanam tulu ham, hoggub ngo gamt tola tayin?

⁹Hoggab wlw ao hoqgv ngo mwam kaadwn, yorn ao hoqgv mwam ngo kaadwn; kaato, nyiilungv vp-cwkwb doodo, gvdag nyob hoolu ho xitaq maap kun!

¹⁰Hiyv Jakubg diimwram xila dvn ho hoqg jeqpy deen gonkam hiyv xila dvn? Ngam jvqtw bo nyiib nyitwl sim tvbv, hoo ngoqg vtwr-anya ngam mwwg hvb nyim tvbv!”

¹¹‍Hoo Balak Balaamnvn benum, “Hoggv no ngam nyipa kun? Ngoqg ceebiongam dingl-jool beem dvb ngo nam boanum, hoo kaato, no hog akkam nyikma hvbmabde bulam ya lvqc cikub paku.”

¹²‍Hoo mwv birwqnv benum, “Ngoqg agam so At Sw hognvk gomcwram vlwq jitayin ham ngo agam gootwq kima dvn yv?”

¹³‍Hoo Balak mwam benum, “Anya mwwpa gvdwl ngoqg lvgab asaq nyookub haamin gvto, hoq hoqgv bulam kaapa tayin. No nyi meegwn kaapa twqtayin hoo nyi mwlwngam no kaapa ram. Ho bulam hoq hoqgv ngoqgab dingl-jool beetbv.”

¹⁴‍Hoo mwv mwam Pisga puutu aog, Jopimg rongob bool wgnum, hoo yugw kvn go mvnum hoo yugw gwwx ho hvvb dorg la yaap tvmwr dorg aky jinum.

¹⁵‍Balaam Balaknvn benum, “Noqg boyuqnam aky jik bviywrho daqya to, ho ngo tolo At Swn kvvrwq mins taden.”

¹⁶‍Hoo At Sw Balaamnvn wrwqnum hoo mwwg agamho gomcwram jilwq tvl hoo benum, “Balak dookub wkur gvdwl, soq sib no agam mam goota.”

¹⁷‍Hoo mwv mwwg dookub haaknum, hoo kaato, mwv la mwwg nyigbo nyiilungv mwwg lvgab boyuqnam aky jik bviywrho doqdul doonum. Hoo Balak mwam benum, “Hoggv At Sw agam goopa ku?”

¹⁸‍Hoo Balaam mwwg nyiqry kaanam mam betaml hoo benum, “Balak, Gorabto, hoo tato; Jippor gv ko tuupa, ngam ruucw kwrgabto:

¹⁹Pwnbov nyi ma, ho mwv vm mvvdwb, ho nyia ko tuup hvb nyitwl, ho mwv mwwg mwwjam kwly dvb. Mwv hoggv benum, hoo ham mwv nyiyum maadwn i?

²⁰Kaato, ngam lvqc cim dvb gaml jipa ku: mwv lvqc cipa ku, hoo ngo ham jikur lakram.

²¹Mwv Jakubg dvparho almab haata boam mvturl aplakma, ho Israel nyi tulug vs-axaqtanam mam kao cookma. Pwnbo At Sw bulug lvgab doodo, hoo bulug pengko ho lvpw at akv goqr rodo.

²²Pwnbov bulam Ijipt hoqgv boolinum hoo bul gab mwv talin vrrw hvb nyidwn.

²³Hoggab Jakubnvn ceeko dvb gwwn-nyiqry dooma, Israel nyiilungam ceekol sootu-xaaram mvnbo dooma; soq sib Jakub nvla Israelam sija betayin, ‘Pwnbov hog swrv nyipa kun!’

²⁴Kaato, nyiilungv! Sony nyot nyem ak hvb ator jaqb daqrab dvn hoo sony nyot akv hoggub atv juqrab sudwn hvb; hoq cex deenam ham cex maady deedib cexnam hijum mam twwma deedib bulv doonu maadwn.”

²⁵‍Hoo Balak Balaamnvn benum, “Bulam dingl-jool beekam maabv hoo bulam lvqc gokam cimabv.”

²⁶‍Hvbmabde Balaam Balaknvn birwql benum, “Nam ngo bema namyv, ‘At Sw hoggv ngam betwk hvtayin ham ngo bitwq tayin hvma namyv’?”

²⁷‍Hoo Balak Balaamnvn benum, “Soq haato, ngo nam asaq nyookub wgtayin. Lokam hoqho Pwnbo mwwlwq tvl no bulam ngoqgab dingl-jool hoqgv beedwb nyikam twqto.”

²⁸‍Ho Balak Balaamnvn Peor puutu aob boocanum, hoq hoqgv diixa-rarangam kaabol kaapanum.

²⁹‍Hoo Balaam Balaknvn benum, “Ngoqgab yugw loq kvn go mvto hoo hvvb loq dor kvn go hoo yaap tvmwr loq dor kvn go mwx-mvaqto.”

³⁰‍Hoo Balak Balaamwg benam jaq hvb nyiknum, hoo yugw gwwx ho hvvb dorg la yaap tvmwr dorg aky jiknum.