Read Nyishi XINAM 24 Bible Online

XINAM 24 - Nyishi bible

XINAM 24

¹Hwdlo At Sw Israel nyiilungam lvqc cidwb mwwlwqnam mam Balaam kaapa tvl, mwv asaq moodam yuma tuuka taab wnam hvb wmanum, hvbmabde mwwg nyuqmv deexa-rara daiyab tuugabl doonum.

²‍Hoo Balaam mwwg vnyiqkv Israel nyi tulug nyob-nyobub svmcw ho paal doonam mam piorabl kaapanum. Hoo Pwnbog Yalv mwwg aoho haanum,

³‍hoo mwwg nyiqry kaal betam mvdwb benam mam mwv benum, “Beyor gv ko tuup Balaam gamt tonamv, nyi akwg gamt tonamv hiyvg vnyiqkam mvkonum,

⁴Pwnbog gomcwram tato mwv gamt tonam, Mwlwngam koi yaanbo Pwnbog nyiqriam kaanamv, mwwg vnyiqho kaadar lala dvb haadwn:

⁵Jakuba, noqg tombungv, Israela, noqg svmcwngv hog hwdgo kangam do!

⁶Pvng svvnv bvly taqpwn hvb aaso kiyob svvnam hvb, pobu soiyoq ho boolu tulu hvb, At Sw alos tulungam liipa kun hvb, sidar svvn tulungv iss bviywrho doonbo hvb nyido.

⁷Mwwg uppum tulu hoqgv issiv tolin tayin, hoo mwwg mvmv iss mwlwho dootayin; mwwg lvpw atv Agagnvn koi yaatayin, hoo mwwg lvpw-hatiam yuutayin.

⁸Pwnbov mwam Ijipt hoqgv boolinum hoo mwwg gab mwv nyoro talin vrrw hvb nyidwn; mwwg ceebio nyob tulungam, mwv dvmeq tayin, hoo bulug alongam vmwq gob mvtayin hoo mwwg uppuq lvgab bulam vblwq tayin.

⁹Mwv tuuku-tuulanum, mwv sony nyot ak hvb hoo sony nyot nyem hvb gel karnum; hiyv mwam muu nyotayin? Hiyv nam lvqc cinbov hv xinam jaqkv, hoo nam beenbo akam beepa kun.”

¹⁰‍Hoo Balak Balaamnvn vc loodab hang lengnum, hoo mwwg alaqkam mwv nyumt kwrwqnum. Hoo Balak Balaamnvn benum, “Ngoqg ceebiongam beem dvb nam ngo goqnum, hoo kaato, no bul gab luum yaag lvqc cipa ku.

¹¹‍Hoqgab sija no noqg atwg nyookub ken ku. Ngo benum, ‘Jvqtw jaqb ngo nam xidwb mwwnum,’ hvbmabde At Sw ngam hoqg xidwb mwwnam mam nootul ap paku.”

¹²‍Hoo Balaam Balaknvn benum, “Noqg ngam pui bem dvb kanamnam nyi tulu ham ngo bemanam yv,

¹³‘Balak ngam nam namgub rupam la hunam jis jaqkam ngo At Swg gomcwr betwk hvnam arongam betayin hvnum, alboam nyis jaqkam ho almanam nyis jaqkam ngoqg mwwlwq ma. Hoggv At Sw bedwn, ngo ham betayin’?

¹⁴‍Hoo sija kaato, ngoqg nyiilu dookub ngo wde kun. Haato, kokw aalam, hoggv soq nyiilu si noqg nyiilu gab nyitayin, ngo nam cengm tayin.”

¹⁵‍Hoo mwwg nyiqry kaal agam betam tvk hvl benam mam mwv, benum, “Beyor gv ko tuup Balaamwg gamt tonam, nyi akwg gamt tonamv hiyvg vnyiqkam mvkonum,

¹⁶Pwnbog gamt tonam gomcwram hiyv tadwn, hoo Mwlwngam koi yaan bog cenglaqkam cengnbov, Mwlwngam koi yaanbo Pwnbog nyiqriam kaanamv, mwwg vnyiqho kaadar lala dvb haadwn:

¹⁷Ngo mwam kaanam, hvbmabde sija ma; ngo mwam kaapanam, hvbmabde ogum ma: Jakub hoqgv takarv lengtayin, hoo lvpw atwg beqnyiangv Israelwg hoqgv swwlin tayin; hoqhv Moabg tuqt talongam jwwdub tayin hoo Setwg ko tuup mwlwngam vmwq gob mvtayin.

¹⁸Idom mam mviya tayin; Seir samkam mwwg ceebio tulungv mviya tayin. Israelv atorjaqb nyidudo.

¹⁹Hoo Jakub hoqgv bulam caatam-caabaql mvtayin bopam tuluho swwyul doon boam twryum tayin!”

²⁰‍Ho mwv Amalek nyiam kaanum hoo mwwg nyiqry kaal betam mvdwb agam jinam mam benum, “Amalek si nyob tulu pengko hoqgv otuqjaqb atorbo nyobv, hvbmabde hoqg twrkiq-twrma de moodv hvvnwq paku.”

²¹‍Hoo mwv Kenait tulungam kaanum, hoo mwwg nyiqry kaal betam mvdwb agam jinam mam benum, Cwql swwnamv noqg doogwb nyidwn, hoo noqg osupam wlw aoho subl appan

²²Hvbsujaqkam, Kainnvn wm partayin hwdlo Assur nam nyumwb aadob bool wgtayin.”

²³‍Hoo mwv mwwg nyiqry kaal betam mvdwb agam jinam mam benum, “Oa, hiyv dootayin hwdlo Pwnbov soq sam nyiyi kun?

²⁴Hvbmabde iss jaajv Kittim hoqgv haatayin Assuram la Eberam hentwr-kaas dvb mvtayin; hoo mwam kam twrkiq-twrmab twryum tayin.”

²⁵‍Ho Balaam gorab kunv mwwg atwg nyookub wkur kunum. Hoo Balak kam mwwg lamtab wknum.