Read Nyishi XINAM 27 Bible Online

XINAM 27 - Nyishi bible

XINAM 27

¹Ho Josap gv ko tuup Manasse, ho Manasse hoqgv nyob, ho Makirg ko tuup, ho Gileadwg ko tuup, ho Heperwg ko tuup Jelopehad hoqgv lengn bo nyem ko tulug eminv: Mala, Noa, Hogla, Milka, hoo Tirja.

²‍Hoo bulv Mojes la nyub Eleajarwg agaho hoo nyi dvparg peelo bo tulug agaho, bulv kvvrwq minsko tombu haagaho daqtwl begamv,

³“Ngulug ab tulungv deexa-raraho sinkun. Mwv Korag ajin tulu lvgab At Swn ceekol nyimin gvmanum, hvbmabde mwwg atwg nyic gab sinum. Hoo mwv ko tuup doomanum.

⁴‍Hoqgab hoggub ngulug abwg nyobam mwv ko tuup doomak hvl mwwg nyob hoqgv naapaq tayin? Ngulug ab tulug vbw-bor tulug pengko hoqgv ngulam gumnam jit bvk hvl koonam.”

⁵‍Mojes bulug bvrwqkam At Swg agaho baqa jinum.

⁶‍Hoo At Sw Mojesnvn benum,

⁷“Jelopehadwg nyem ko tulungv kvtaq bedo. Bulug abwg vbw-bor tulug pengko hoqgv bulug ab tulug gumn otu nvvsiq deenam mam no bulam jito.

⁸‍Hoo no Israel nyiilungam agam goog dvl beto, ‘Nyi akv ko tuup doomab sibaloqkam, mwwg otu nvvsiq deenam mam no mwwg nyem koam jitayin.

⁹‍Hoo mwwg nyem ko dooma baloqkam no mwwg otungam mwwg vbw-boram jitayin.

¹⁰‍Hoo mwv vbw-bor dooma baloqkam, no mwwg otungam mwwg abwg vbw-bor tulungam jitayin.

¹¹‍Hoo mwwg abv vbw-bor dooma baloqkam, no mwwg otungam mwwg nyob imiq lwkw nyiam jitayin, hoo ham gumn nvvsiq tayin. Hoo soq gaml sam la pvvb sam Israel nyiilungv At Sw Mojesnvn gaml jinam hvb nyil dootayin.”

¹²‍At Sw Mojesnvn benum, “Soq Abarim puutu aob caoto hoo Israel nyiilungam ngoqg jiknam gvdangam kaaka to.

¹³‍Hwdlo no ham kaaxo kokwngam, noqg vbw Aaron gv nyinam hvbkalam, no kam noqg nyiilungam lvkin gob goqkum tayin,

¹⁴‍hoggab hwdlo nyi dvparv Jin deexa-raraho yolu doiyikho nulv ngoqg gomcwram bidu-bel tamab ngam ceekonum, bulam iss twwdwb mvlin jikwg vnyiq kaagaho ngam dvrwq bob pvvmanum.” (Soq tulu sam Jinwg deexa-rarag Kadeswg Meriba iss ho nyinum.)

¹⁵‍Mojes At Swn agam goonv begamv,

¹⁶“Nyi mwlwg swwgam jinbo Pwnbo, At Sw nyi loq ak nyi dvparam nyig mvdwb xuqlin to

¹⁷‍hiyv bulug otuqb wdy boloq hoo bulug agaho haady boloq, hiyv bulam leng deen boloq hoo bulam haag deen boloq, hoo At Swg nyi dvparam sviya pvtwho sviya rvky doomanam hvb nyim mvmabv.”

¹⁸‍Ho At Sw Mojesnvn benum, “Nunwg ko tuup Josuanvn naato, hiyv nyilaq-belaqnan ator Yalam doogdvn, hoo noqg alaqkv mwwg aoho idaqto.

¹⁹‍Nyub Eleajar gvla nyi dvparg agaho mwam daqm to, hoo bulug vnyiq kaagaho no mwam ator jigdvl kanam tuku.

²⁰‍Noqg gaml-ator meegwn mwam jitayin, ho Israel nyiilug dvpar mwlwngv mwam tvjw tayin.

²¹‍Hoo mwv nyub Eleajar agaho daqtayin, ho mwam Urim hoqg pw-ngam At Swg agaho hwwm tayin. Mwwg gomcwr ho bulv lvvgwb lengtayin, hoo mwwg gomcwr ho bulv urab haatayin, mwv la Israelwg nyiilu mwlw dvparv mwwg lvgab nyimin gvtayin.”

²²‍Hoo Mojes At Swg gaml bekjaqb nyiknum. Mwv Josuanvn naalayil nyub Eleajar gvla nyi mwlwg dvpar agaho daqmnum,

²³‍hoo mwv mwwg alaqkam mwwg aoho idaqtvl At Sw Mojes lvgab agam doonam hvb mwam ator jil kanam kunum.