Read Nyishi XINAM 29 Bible Online

XINAM 29 - Nyishi bible

XINAM 29

¹Pool kvnwg otuq aalam nulv dvrwqbo dookum mam dootayin. Nulv dooxa-daqya bo bon akkam nyimabv. Hoq aal hv nulgab tuuly miqd aalv,

²‍hoo nulv boyuqnam akiam At Swn sungam aldvb jitayin: svv hvvtw hoqgv hvvb dorg, yaap tvmwr dorg, vnyw nywg tvl un-tar gvma bo yaap kvn go jitayin;

³‍hvvb dor-dorho albo wtwngam la kuty mviyonam dvs aky gob ipa wyw hoqgv oum go, ho yaap tvmwr dor-dorho ipa wyw hoqgv vnyi go jitayin,

⁴‍hoo sviya kvnwg dor-dorho wtwngam wyw hoqgv ak jitayin.

⁵‍nulug nyic kwly gab pwram sibin bimp dorg jitayin.

⁶‍soq tulu sam lwxiam pool karlin yin boyuqnam akiam, hoo dvs akiam, twws akiam, At Swn sungam bo dvs aky gob jinam lvgab jitayin.

⁷“Pool kvnwg looyw deen aalam nulv dvrwqbo dookum mam dooto hoo nulv dvma-twwmab vrr rwl dooto. Nulv bonam nyimabv,

⁸‍hvbmabde nulv At Swn boyuqnam akiam sungam aldvb jitayin: svv hvvtw hoqgv hvvb dorg, yaap tvmwr dorg, vnyw nywg tvl un-tar gvma bo sviya nyega dor kvn go jitayin.

⁹‍Hoo albo wtwngam la kuty mviyonam dvs akiam hvvb dor-dorho wyw hoqgv oum ipa gogaqb, ho yaap tvmwr dor-dorho wyw hoqgv vnyi gogaqb jitayin,

¹⁰‍hoo wtw sarg-sargwb sviya dor kvnwg dor-doram jitayin:

¹¹‍nyic gab sibin bimp dorg pwr jito; soq lvgab nyic kwly gab pwr jinam mam, hoo lwxiam boyuqnam akiam, hoo dvs akiam, hoo twws akiam jito.

¹²“Pool kvnwg camleq loong aalam nulv dvrwqbo dookum mam dootayin. Nulv dooxa-daqya bo bonam nyimabv, hoo nulv At Sw gab aal kvn go durum dvl dootayin.

¹³‍Hoo svv hvvtw hoqgv hvvb camleq dorum go, yaap tvmwr dornyi go, vnyw nywgbo un-tar gvma bo sviya nyega camleq dorpy go, nulv boyuqnam akiam, hoo dvs akiam, At Swn sungam aldvb aky jitayin;

¹⁴‍hoo albo wtwngam la kuty mviyonam dvs akiam hvvb camleq dorumg dor-dorho wyw hoqgv oum ipa gogaqb, ho yaap tvmwr dor-dorho wyw hoqgv vnyi gogaqb jitayin,

¹⁵‍hoo wtw sarg-sargwb sviya camleq dorpig dor-doram jitayin;

¹⁶‍nyic gab sibin bimp dorg aky jito; soq lvgab lwxiam boyuqnam akiam, dvs akiam, hoo twws akiam jito.

¹⁷“Aal loonyi deenam svv hvvtw hoqgv hvvb camleq dornyi go, yaap tvmwr dornyi go, vnyw nywgbo un-tar gvma bo sviya ko nyega camleq dorpy go jitayin,

¹⁸‍dvs akiam la twws akiam hog hwdgo hvvb tulungam, yaap tvmwr tulungam, hoo sviya ko tulungam jiyikam jid sanam mam jidwb nyitayin;

¹⁹‍nyic gab sibin bimp dorg aky jito; soq lvgab lwxiam boyuqnam akiam, dvs akiam, hoo twws akiam jito.

²⁰“Aal loum deenam hvvb camleq dorkin go, yaap tvmwr dornyi go, vnyw nywgbo un-tar gvma bo sviya ko nyega camleq dorpy go jitayin,

²¹‍dvs akiam la twws akiam hog hwdgo hvvb tulungam, yaap tvmwr tulungam, hoo sviya ko tulungam jiyikam jid sanam mam jidwb nyitayin;

²²‍nyic gab sibin bimp dorg aky jito; soq lvgab lwxiam boyuqnam akiam, dvs akiam, hoo twws akiam jito.

²³“Aal loopy deenam hvvb doryw go, yaap tvmwr dornyi go, vnyw nywgbo un-tar gvma bo sviya ko nyega camleq dorpy go jitayin,

²⁴‍dvs akiam la twws akiam hog hwdgo hvvb tulungam, yaap tvmwr tulungam, hoo sviya ko tulungam jiyikam jid sanam mam jidwb nyitayin;

²⁵‍nyic gab sibin bimp dorg aky jito; soq lvgab lwxiam boyuqnam akiam, dvs akiam, hoo twws akiam jito.

²⁶“Aal loong deenam hvvb kiya go, yaap tvmwr dornyi go, vnyw nywgbo un-tar gvma bo sviya ko nyega camleq dorpy go jitayin,

²⁷‍dvs akiam la twws akiam hog hwdgo hvvb tulungam, yaap tvmwr tulungam, hoo sviya ko tulungam jiyikam jid sanam mam jidwb nyitayin;

²⁸‍nyic gab sibin bimp dorg aky jito; soq lvgab lwxiam boyuqnam akiam, dvs akiam, hoo twws akiam jito.

²⁹“Aal loox deenam hvvb piin go, yaap tvmwr dornyi go, vnyw nywgbo un-tar gvma bo sviya ko nyega camleq dorpy go jitayin,

³⁰‍dvs akiam la twws akiam hog hwdgo hvvb tulungam, yaap tvmwr tulungam, hoo sviya ko tulungam jiyikam jid sanam mam jidwb nyitayin;

³¹‍nyic gab sibin bimp dorg aky jito; soq lvgab lwxiam boyuqnam akiam, dvs akiam, hoo twws akiam jito.

³²“Aal kvn deenam hvvb kvn go, yaap tvmwr dornyi go, vnyw nywgbo un-tar gvma bo sviya ko nyega camleq dorpy go jitayin,

³³‍dvs akiam la twws akiam hog hwdgo hvvb tulungam, yaap tvmwr tulungam, hoo sviya ko tulungam jiyikam jid sanam mam jidwb nyitayin;

³⁴‍nyic gab sibin bimp dorg aky jito; soq lvgab lwxiam boyuqnam akiam, dvs akiam, hoo twws akiam jito.

³⁵“Aal piin deenam nulv piwr jwr-jwr dvb dookum loq ak dooto. Nulv dooxa-daqya bo bonam nyimabv,

³⁶‍hvbmabde hvvb dorg, yaap tvmwr dorg, vnyw nywgbo un-tar gvma bo sviya ko dor kvn go nulv boyuqnam akiam bvla dvs akiam At Swn sungam aldvb jitayin,

³⁷‍hoo dvs akiam la twws akiam hog hwdgo hvvb tulungam, yaap tvmwr tulungam, hoo sviya ko tulungam jiyikam jid sanam mam jidwb nyitayin;

³⁸‍nyic gab sibin bimp dorg aky jito; soq lvgab lwxiam boyuqnam akiam, dvs akiam, hoo twws akiam jito.

³⁹“Soq tulu sam nulv At Swn nulug sookuml sool durum dvdwb xuqlin kunam moodho jidwb nyitayin, soq lvg-lvgab nulug dingrnam akiam hoo mwwbwql aky jidwb hvnam mam, nulug boyuqnam akib, hoo nulug dvs akib, hoo nulug twws akib, hoo nulug swrso akib jito.”

⁴⁰‍Ho At Sw Mojesnvn gaml jik jaqb Mojes Israel nyiilungam hog mwlwngam betamnum.