Read Nyishi XINAM 30 Bible Online

XINAM 30 - Nyishi bible

XINAM 30

¹Mojes Israelwg nyiilug nyob tulu hoqg peelo bo nyi tulungam agam goonv begamv, “Soq sib At Sw gaml jipa kun.

²‍Nyi akv At Swn hog ak dingrwl dingpa kuloqkam, mwwg dingrnam mam mwv nyil wdwb nyidwn, mwwg gomcwr goonam mam pvvb juqbo maabv. Mwwg agam hoqgv hoggv mwv dingr pakun ham nyil wdwb nyidwn.

³“Hwdlo nyem akv mwnwg ab namho doodu tvl, At Swn hog ak dingrwl dingpa kuloqkam ham mwn nyil wdwb nyidwn,

⁴‍hoo mwnwg abv mwnwg dingrnam mam tapa tvl hog haqma baloqkam, mwnwg dingrnam hog mwlw ham mwn nyidwb nyitayin, hoo mwnwg dingrnam hv mwnwn ham nyim dvb roqtul aptayin.

⁵‍Hvbmabde mwnwg dingnam mam mwnwg abv tapa tvl, ham haql loomin gvma baloqkam, mwnwg dingnam hv mwnwg ma hoo hv mwnwn mvturl apram. Hoo At Sw mwnwn apaq jitayin, hoggab mwnwg abv mwnwn loomin gvma ko-gab.

⁶“Mwn nyega ak naak balo, Mwnwg dingrnam ho mwbwq maab mwnwg nvbcir hoqgv goolin paklo mwn ham nyidwb nyitayin,

⁷‍hoo mwnwg nyolv mwnwg dingrnam mam tapa tvl hog haqma baloqkam, mwnwg dingrnam hog mwlw ham mwn nyidwb nyitayin, hoo mwnwg dingrnam hv mwnwn ham nyim dvb roqtul aptayin.

⁸‍Hvbmabde mwnwg dingnam mam mwnwg nyolv tapa tvl, ham haql loomin gvma baloqkam, mwnwg dingnam hv mwnwg ma hoo hv mwnwn mvturl apram. Hoo At Sw mwnwn apaq jitayin.

⁹(Hvbmabde xwwmiv la tumin sunbo nyemv dingr baloqkam, hoqhv mwnwn hoggub nyijaqkam ham nyim dvb roqtul aptayin.)

¹⁰‍Hoo mwnwg nyol namho mwn dingr baloqkam hoo mwnwg dingrnam hv mwnwn ham nyim dvb roqtul aptayin,

¹¹‍hoo mwnwg nyolv mwnwg dingrnam mam tapa tvl hog mwnwn bema baloqkam, mwnwg dingrnam hog mwlw ham mwn nyidwb nyitayin, hoo mwnwg dingrnam hv mwnwn ham nyim dvb roqtul aptayin.

¹²‍Hvbmabde mwnwg dingnam mam mwnwg nyolv tapa tvl, ham haql loomin gvma baloqkam, mwnwg agam hoqgv dingnam hv mwn gab hog dookram. Hoggab mwnwg nyolv ham haqpaq ko-gab, hoo At Sw mwnwn apaq jitayin.

¹³‍Mwn atv hog nyidwb dingrnam dood nyiloqkam, mwnwg nyolv loomin gvd bvla haqpaq dvb atorv doodwn.

¹⁴‍Hvbmabde mwnwg nyolv mwnwn looxiam hog bema baloqkam, mwv mwnwg hog mwlw dingrnam tulu ham loomin gvdwn. Hoggab hwdlo mwv mwnwg dingnam mam tapa yik aalho mwnwn mwv hog haqmanum.

¹⁵‍Hvbmabde mwv tapa tvl hoq tulu ham kokwngam haqpaql loomin gvma baloqkam, ho mwnwg nyixiaq laqm mam mwv baqtayin.”

¹⁶‍Soq tulu si At Sw Mojesnvn gaml jinamv Nyega ngamla mwwg nywxwngam hoo abam la mwwg nyem koam hwdlo mwn nyijwr tvl mwnwg ab namho dootwl dingrnam pagoq tulungv.