Read Nyishi XINAM 31 Bible Online

XINAM 31 - Nyishi bible

XINAM 31

²“Israel nyi tulu Midian nyi tulungam kwly daqto. Hoq kokwngam noqg nyiilungam no goqkum to.”

³‍Ho Mojes nyiilungam agam goonv begamv, “Nulug pengko hoqgv nyob padwb nyi loq mwx-mvaqto, ho bulam Midian nyiilungam ceekol At Swg kwliam Midian aoho naamto.

⁴‍No Israel nyob vxy hoqgv nyob pam dvb lwwyw ak gogaqb kanam tayin.”

⁵‍Ho nyob vxy hoqgv nyi lwwyw gogaqb xuqlin kunum, ho nyob pady bov nyiv lwwyw camg la lwwyw vnyi gob nyinum.

⁶‍Hoo Mojes nyob panbo nyi tulu ham nyub Eleajarwg ko tuup Pinehasnvn bool wg mvnum, hoq lvgab dvrwq namlog dupum-dvrab pam hoo tuuly miqkin nanam mwwg alaqho jilwqnum.

⁷‍At Sw Mojesnvn gaml jiknam hvb, bulv Midian nyi tulug nyega mwlwngam twrkub mengknum.

⁸‍Bulv Midianwg lvpw at ang go mengnum, soq tulu sam bulv mengknamv: Ebi, Rekem, Jur, Hur, hoo Reba. Hoo bulv Beyor gv ko tuup Balaam nvkam lyoqr orioq lvgab mengnum.

⁹‍Hoo Israel nyiilungv Midian nyem tulungam la bulug ko anyongam nyumwb booknum, hoo bulv bulug svv hvvtwngam, bulug sviya pvtwngam, hoo bulug dupum-dvrab mwlwngam bulv hubyiql wgnum.

¹⁰‍Bulug bopam mwlwngam hoo bulug doogw ko svmcw mwlwngam bulv wm tolwql parxanum,

¹¹‍hoo nyi tulungam la svdin mwlwngam nyob pal naareq layil ho mwlwngam hubyiql bool wgnum.

¹²‍Ho bulv bulug nyumwb boonam mam la dupum-dvrab hoo tuun-meengam nvviyiql wgnam tulu ham Mojes gvla nyub Eleajar, hoo Israel nyiilug dvparg Moabg Jordon pobug Jeriko ho baqa kunum.

¹³‍Mojes la nyub Eleajar hoo nyi dvpar hoqg peelo bo tulungv bulam svmcw lvvgho kvvrwqtab lengnum.

¹⁴‍Hoo lwwywngam hoo lwwngam sipai saab wgbo tulungam, hoo hiyv nyob pape kul haakbo tulungam, Mojes hang lengnum.

¹⁵‍Mojes bulam benum, “Nulv nyem tulungam torl doom pan i?

¹⁶‍Kaato, Peorho Balaamwg bilwq ko-gab Israel nyiilungv At Swn ceekol nyic nyigam gab At Sw hoqgv swlin-mominv nyi dvparho haanum.

¹⁷‍Hoqgab sija nyega ko mwlw ham mengto, hoo nyem nyega doog kunam mwlw ham mengto.

¹⁸‍Hvbmabde nyem nyijwr nyega cengka maata boam nulgab pvvl ap suto.

¹⁹‍Svmcw lvvgho aal kvn gob dooto. Hiyv lajaqkam nyi mengn bov hoo nyi svmangam idaqbov, nulv atv la nyumwb boonam nyi tuluhv loum aalam la kvn aalho at-atv xeexaqto.

²⁰‍Nulv vjam mwlwngam, vpin luuxy hoqgv mvnam mam, sibin vm hoqgv mvnam bon nyinam mwlwngam, hoo svvda hoqgv hoolu luuxy mvnam mam paxy-xeexaq tayin.”

²¹‍Ho nyub Eleajar nyob patab wnbo nyi mwlwngam benum: “At Sw Mojesnvn soq pvvb tulu sam gaml tal nyim dvb gaml jinum:

²²‍hunam, rupam, tamangam, yoqdwram, sandingam, hoo pitolam arongam,

²³‍ho wmho jiqma bo tulu hog mwlwngam wm lvgab rwwyiql hoo ham dvrwq dvb mvto. Hvbmab nyiloqkam iss hoqgv kam dvrwq maanboam paxy-xeexaq tayin. Hoo hoggv xeq wm lvgab daqnyi maadwn, ham nulv iss lvgab hwrxaq tayin.

²⁴‍Nulv kvn deen aalam nulug vjam niixaq tayin, hoo nulv dvrwq taikun. Hoo kokwngam nulv svmcw urab haala taikun.”

²⁵‍At Sw Mojesnvn benum,

²⁶“Nyub Eleajar la ab tulug dvpar hoqg peelo bo tulungv nulv, naareq kunam nyiam la svdin tulu ham xikuml xika to,

²⁷‍hoo ham jvqnyi gob mvpin-mvra to, jaqgin hiyv nyob patab wnbo gab hoo jaqgin nyi dvpar tulu gab.

²⁸‍Hoo hiyv nyob patab wnbo tulug naady sanam hoqgv At Sw gab lwwng hoqgv ak-akwb nyiilug hvvbam, svdam mam hoo sviya tulungam aky jidwb nyitayin.

²⁹‍Hoqg jibwqnam hoqgv nyub Eleajarnvn kviyw swcwb mwrpin sugdvl At Swn aky jidub jito.

³⁰‍Hoo Israelwg nyiilu dvparam jibwq kunam hoqgv camng hoqgv ak-akwb nyiilug, hvvbam, svdam mam, hoo sviya tulungam, ho tuun-mee mwlw hoqgv jito, hoo hoq tulu ham Lebi nyi tulungam, hiyv At Swg xumk pirram rvkil doogbo tulungam jito.”

³¹‍Hoo Mojes la nyub Eleajar At Sw Mojesnvn gaml jinam hvb nyiknum.

³²‍Sipai tulug nyok hoqgv sviya naareql naanamv 675,000 kunum,

³³‍svvngv 72,000 kunum,

³⁴‍svdamv 61,000 kunum,

³⁵‍hoo nyijwr nyega cengka maata bo nyi mwlw pengko hoqgv 32,000 kunum.

³⁶‍Hoo nyob panbo sipai tulu gab sviyangam 337,500 kunum,

³⁷‍hoo At Swn sviya jiknamv 675 kunum.

³⁸‍Svv 36,000 hoqgv At Swn 72 gon jiknum.

³⁹‍Svdam 30,500 hoqgv At Swn 61 gon jiknum.

⁴⁰‍Nyi tulu 16,000 hoqgv At Sw gab 32 nyi gon jiknum.

⁴¹‍Hoo At Sw Mojesnvn gaml bekjaqb, Mojes nyub Eleajarnvn At Sw gab aky jinam tulu ham jiknum.

⁴²‍Mojes nyob pan boam sipai tulungam jibwqtvl, Papo gon Israel nyiilungam bulam jinum—

⁴³‍ho nyi tulu dvpar gab sviyangam 337,500 kunum,

⁴⁴‍ho svvngv 36,000 kunum,

⁴⁵‍hoo svdamv 30,500 kunum—

⁴⁶‍hoo nyiingv 16,000 kunum-

⁴⁷‍hoo Israelwg nyiilu dvparam jibwq kunam hoqgv camng hoqgv ak-akwb nyiingam la svdinam naalayil, hoo hoq tulu ham At Swg Mojesnvn gaml bekjaqb, Lebi nyi tulungam, hiyv At Swg xumk pirram rvkil doogbo tulungam jiknum.”

⁴⁸‍Ho lwwywngam nyigbo saab tulungv, lwwywngam sipai saab nyigbo tulungv, hoo lwwgam sipai saab nyigbo tulungv Mojes ogumb haanum

⁴⁹‍hoo Mojesnvn benum, “Noqg nyera tulungv ngulug uraho ngulv nyob patab wgnam nyiilungam xikanamv nyi akjijaqkam ngulug soqgv niima.

⁵⁰‍Hoo ngulv nyiicwr-cwrxiv hoggv kaapanum, At Sw gab akiam baqa pakun; hun dupum-dvrab pam, laqpo koojam hoo kooj gvnam mam, lvqcam, ruubinam, hoo tvswngam, ngulv atv At Swg agaho nyic kwly gab pwr jipa kun.”

⁵¹‍Hoo Mojes la nyub Eleajar bul galoqkv hunam la hoolu deedy jem-ter mvnam mam svgagvrwqnum.

⁵²‍Hoo lwwyw sipaiyam nyigbo tulu hoqgv hoo lwwg sipaiyam nyigbo tulu hoqgv, bulug At Swn hun jikum kunamv 16,750 sikil gob nyiknum.

⁵³(Sipai nyiicwr-cwrxiv mwwg atgab naareql kunamv.)

⁵⁴‍Hoo lwwyw sipaiyam nyigbo hoo lwwg sipaiyam nyigbo tulu hoqgv Mojes la nyub Eleajar hunam svgagvrwqnum, hoo At Swg agaho Israel nyiilungam mwwpa mvdwb, ham kvvrwq minsko tombu uraho bvqlwqnum.