Read Nyishi XINAM 32 Bible Online

XINAM 32 - Nyishi bible

XINAM 32

¹Reubenwg nyiilu gvla Gadwg nyiilungv naleqgo tuun-meengv sonum. Hoo bulv Jajer la Gilead gvdangam kaanum, hoo kaato, hoq nyookv tuun-mee nyook gob nyinum.

²‍Ho Gadwg nyiilu ngvla Reubenwg nyiilungv Mojes la nyub Eleajar hoo nyi dvparg peelo boam benum,

³“Atarot, Dibon, Jajer, Nimra, Hesbon, Eleale, Sebam, Nebo, hoo Beon,

⁴‍At Sw Israel nyi dvparg agaho jwwtab ko gvdangv, soq gvda si tuun-mee gvda gob nyinum, hoo noqg nyera tulungv tuun-meengv doodwn.”

⁵‍Hoo bulv benum, “Noqg vnyiqkv ngulam kvvlwq paloqkam, noqg nyera tulungam soq gvda sam gumn ak gob jitbv. Ngulam Jordon ram mvmabv.”

⁶‍Hvbmabde Mojes Gadwg nyiilungam la Reubenwg nyiilungam benum, “Nulv vbw-boram nyob patab wwm tvl nulv so nvmcw doobv?

⁷‍Hoggub nulv Israel nyiilungam At Sw bulam jitanam gvdaho haama taab hang hoxa dvb nyid-bedwn?

⁸‍Hwdlo ngo bulam Kades-barnea hoqgv gvdangam kaam yukho, nulug ab tulungv soq sam nyinum.

⁹‍Hwdlo bulv Eskol Lywpab caaiyikho hoo gvdangam kaapa tvl, bulv Israel nyiilungam At Swg gvda jitanam ho haama taab hang hoxa mvnum.

¹⁰‍Hoo hoq aalho At Sw hang lengnum, hoo mwv dingrwl begamv,

¹¹‘Jvqtw jaqb Ijipt hoqgv lengk bo vnyw camnyig akambo hoqgv naalayil hoq odum hoqgv ngo Abrahamnvn, Aisaknvn, hoo Jakubnvn gvda jitanvk hvl bel dingrnam ham kaapa kuram, hoggab bulv ngoqg bekjaqb wmin gvkma,

¹²‍hvbmabde Kenij nyi tulu hoqgv Jepunneg ko tuup Kaleb la Nunwg ko tuup Josua aro gvdaho hvvtwq tayin, hoggab bulv At Swg bekjaqb nyinum.’

¹³‍Hoo At Sw Israelwg aoho hang lengnum, hoqgab hwdlo At Swg vnyiq kaagaho almab nyinbo hotamv twryum maady deedib, mwv bulam vnyw campy go deexa-raraho gaqkarl yvmnum.

¹⁴‍Hoo kaato, nulug ab tulug nyitu-bitungam nulv nyirab dukyiq, nyic nyinbo nyiilu gob nyil At Swg Israelam ceekol hang lengnam mam koi yaiya mvdwb nyido!

¹⁵‍Hoggab nulv mwwg bekwb wma baloqkam, mwv bulam lokta soq deexa-rara so apaqtayin, hoo nulv soq nyiilu mwlwngam twryum tayin.”

¹⁶‍Ho bulv mwwg ogumb hvvnwq nv benum, “Ngulv ngulug tuun-mee gab luut loq nwqp tayin, hoo ngulug ko tulungam bopam gurum mam nwqp tayin,

¹⁷‍hvbmabde ngulv nwwxo-svtam mam naarab tayin, hwdlo ngulv bulam bulug gvda doota ko ho boolwq maady deedib, ngulv Israelwg nyiilu agaho nyob patab wdwb mwx-mvaqtvl doodwn. Hoo gvda soq doonbo nyi tulu hoqgv vs-axaq haam mvma dvb, ngulug ko tulungam gurum nwqtumko bopam uraho swrsob doom tayin.

¹⁸‍Israelwg nyiilu nyiicwr-cwrxiv bulug otu naady sanam mam naama deedib ngulv ngulug nammwb hookur kuram.

¹⁹‍Hoggab ngulv Jordon kvtin gon alo ngulug otungam naaram, hoggab ngulv Jordonwg dou-cagag soq daiya sam ngulug otu gob naapa kun.”

²⁰‍Ho Mojes bulam benum, “Nulv sam nyib nyiloqkam, At Swg agaho nulv nyob patab nwwxo-svtam mam naarab balokam,

²¹‍hoo hwdlo mwwg ceebiongam mwwg aga hoqgv ruqpaq maady deedib, At Swg agaho hoqgv nyob panbo nyi vxiv Jordon pobungam rabtayin

²²‍hoo gvdangam At Swg agaho naato; ho hoq kokwb nulv wkur tayin hoo At Sw gvla Israel nyi tulu hoqgv swrsob lengta yukun, hoo soq gvda sam At Sw agaho nulv gumn naatayin.

²³‍Hvbmabde nulv hvb nyima baloqkam, kaato, nulv At Swn ceekol nyic nyipa kun, hoo nulug nyicv nulam hoggub nyijaqkam meelin tayin.

²⁴‍Nulug ko tulu gab bopam mam gurum nwqtumto hoo nulug sviya tulungam luut nwql apto, hoo hoggv nulv dingr pan ham hvb nyito.”

²⁵‍Hoo Gadwg nyiilu ngvla Reubenwg nyiilungv Mojesnvn benum, “Noqg nyera tulungv ngulug bir atwg gaml jik jaqb nyitayin.

²⁶‍Ngulug ko tulungv, ngulug nywxw tulungv, ngulug tuun-mee tulungv, hoo ngulug svv tulungv Gilead bopam tulu so dooiya mvtayin,

²⁷‍hvbmabde nyob pady bo nyiicwr-cwrxiv, At Swg agaho nyob patab, noqg nyera tulungv ngoqg bir atwg gaml jik jaqb wrab tayin.”

²⁸‍Ho Mojes bulug pagoq gab nyub Eleajar nvla Nunwg ko tuup Josua hoo Israelwg nyiilug ab tulug nyob hoqg peelo bo mwlwngam gaml jinum.

²⁹‍Hoo Mojes bulam benum, “At Swg agaho daqnbo Gadwg nyiilu ngvla Reubenwg nyiilu hoqgv nyob patab nulug lvgab Jordon kvtinb ramin gvtayin hoo gvdangam nulam otu naam dvb nyob paiya jitayin, ho Gilead gvdangam bulam gumn naam dvb nulv jitayin.

³⁰‍Hvbmabde, bulv nulug lvgab nyob patab wmin gvma baloqkam, Kanaan gvdaho nulug pengko ho bulv gumnam naamin gvtayin.”

³¹‍Hoo Gadwg nyiilu ngvla Reubenwg nyiilungv birwqnum, “Hoggv At Sw noqg nyera tulungam bepa kun, ngulv ham nyitayin.

³²‍Ngulv At Swg agaho nyob panbo tulungv Kanaan gvda urab haatayin, hoo ngulug gumn otu naadynam mam dou-cagag Jordon kvtinho doom tayin.”

³³‍Hoo Gadwg nyiilu ngamla Reubenwg nyiilungam hoo Josap ko tuup Manasse nyob papo gon Amor nyi tulug lvpw at Sihonwg lvpw-hatiam hoo Basan lvpw at Ogwg lvpw-hatiam hoo hoqg bopam tulungam hoo bulug gvda dwrbu-dwrya mwlwngam Mojes bulam jiknum.

³⁴‍Hoo Gadwg nyiilungv Dibon, Atarot, Aroyer,

³⁵‍Atrot-sopan, Jajer, Jogbeha,

³⁶‍Bet-nimra hoo Bet-haran, bopam tulungam gurum nwqtuml, hoo sviya luut gob mvknum.

³⁷‍Hoo Reubenwg nyiilungv Hesbon, Eleale, Kiriataim,

³⁸‍Nebo, hoo Baal-meon (bulug eminv kwly kunum), hoo Sibma bopam tulungam gurum nwqtum kunum. Hoo bulug bopam mvnam tulug eminam bulug eminho mindar kunum.

³⁹‍Hoo Manasseg ko tuup Makir Gilead namgub wl hoo ham naareq kunum, hoo hoqg gvdaho doonbo Amor nyiilungam ruqpaq lengnum.

⁴⁰‍Hoo Mojes Manasseg ko tuup Makirnvn Gilead gvdangam jinum, hoo mwv hoqho nvmcw mvl dooknum.

⁴¹‍Hoo Manasseg ko tuup Jair wnv ho nampam naareq kunum, hoo hoq nampam tulu ham Habbot-Jair hvl emin goqknum.

⁴²‍Hoo Noba, Kenatwb wnv hoqg nampam tulu ngam naareq kunum, hoo ham mwwg atwg eminho, Noba hvl goqnum.