Read Nyishi XINAM 34 Bible Online

XINAM 34 - Nyishi bible

XINAM 34

¹At Sw Mojesnvn agam goonv begamv,

²“Israel nyiilungam bulam gaml jil beto, hwdlo nulv Kanaan gvdaho haaikun (soq gvda tulu sam nulam otu bwwm dvb jitayin, ho Kanaan gvda vrram soq sib mwbwql ap pakun),

³‍nulug nyooko daiyag vrrv Jin deexa-rara hoqgv Idom namgub, hoo nyooko daiyag Al Sa-svlo hoqgv dou-caga namgub dootayin.

⁴‍Hoo nulug nyooko daiyangv Jin nyookam wleq layil, Akrabbim nagub caatayin, hoo hoqg nyooko hoqg lywtwrv Kades-barnea namgub dootayin. Ho hoqhv Hajar-addar, hoo Ajmon toggoq wpeqko namgub dootayin.

⁵‍Hoo Ajmon vrr hoqgv naarab layil Ijipt kutwq namgub, hoo hoqg lywtwrv sa-svlo namgub dootayin.

⁶“Ho dou-haagag vrram, nulv Koibo Sa-svlongam la hoqg soiyoq kam naatayin. Soq si nulug dou-haaga daiyag vrrwb nyitayin.

⁷“Soq si nulug nyoodum daiyag gvda vrrwb nyitayin: Koibo Sa-svlo hoqgv Hor Puutu namgub vrr rwr tayin.

⁸‍Hor Puutu hoqgv Lebo-hamat namgub nulv vrr tayin, hoo Jedad vrr namgub doolin tayin.

⁹‍Ho gvda vrrv Jipron namgub lywlin tayin, hoo hoqg lywtwrv Hajar-enan namgub doolin tayin. Soq sib nulug nyoodum daiyag gvda vrrv dootayin.

¹⁰“Nulv dou-caga daiyag gvda vrram Hajar-enan hoqgv Sepam namgub nvvr tayin.

¹¹‍Hoo gvda vrram Sepam hoqgv dou-cagag Ainwg Ribla namgub vrr rwlto. Hoo dou-caga daiyag vrnam mam Cinneret Sa-svlo namgub vrr rwlto.

¹²‍Hoo Jordon namgub vrr rwlto, hoo hoqham Al Sa-svlo namgub lywlin tayin. Nulug gvdangam soq sib taqg-loosaqb vrr rwiywq tayin.”

¹³‍Israel nyiilungam Mojes gaml jil begamv, “At Swg gaml jik jaqb nyob kiya leq papo nyob tulungv, soq gvda sam nulv tak cingl otub nvvsiq tayin.

¹⁴‍Hoggab Reubenwg ab dvpar nyob nyiilu ngvla Gadwg ab dvpar nyiilungv hoo Manasseg nyob papo gon bulv otungam nvvsiq pakun.

¹⁵‍Nyob vnyi gola papo gon dou-caga Jordon pobu bviywr Jeriko ho otungam nvvsiq pakun.”

¹⁶‍At Sw Mojesnvn agam goonv begamv,

¹⁷“Soq nyi tulu emin si nulam gvdangam otu nvvsiq mvdwb horpin-hora jitayin: nyub Eleajar la Nunwg ko tuup Josua.

¹⁸‍Nulv nyob vx-cwr hoqgv gvdangam horpin-horal otu nvvsiq mvdwb peelo bo ak-akwb naatayin.

¹⁹‍Hoq nyi tulug eminv: Juda nyob hoqgv Jepunne ko tuup Kaleb.

²⁰‍Simeon gv nyob nyiilu hoqgv Ammihud gv ko tuup Semuyel.

²¹‍Benjamin gv nyob hoqgv Kislon gv ko tuup Elidad.

²²‍Peelo bo Dan gv nyob nyiilu hoqgv Jogli gv ko tuup Bukki.

²³‍Josap gv nyob nyiilu hoqgv: Peelo bo Manasse gv nyob hoqgv Epod gv ko tuup Hanniyel.

²⁴‍Peelo bo Iprayim gv nyob nyiilu hoqgv Siptan gv ko tuup Kemuyel.

²⁵‍Peelo bo Jebulun gv nyob nyiilu hoqgv Parnak gv ko tuup Elijapan.

²⁶‍Peelo bo Issakar gv nyob nyiilu hoqgv Ajjan gv ko tuup Paltiyel.

²⁷‍Hoo Peelo bo Aser gv nyob nyiilu hoqgv Selomi gv ko tuup Ahihud.

²⁸‍Peelo bo Naptali gv nyob nyiilu hoqgv Ammihud gv ko tuup Pedahel.

²⁹‍At Sw Israel nyiilungam Kanaan gvdangam otu nvvsiq mvtanam mam, soq nyiilu sam horpin-hora mvdwb gaml jinum.”