Read Nyishi XINAM 35 Bible Online

XINAM 35 - Nyishi bible

XINAM 35

¹At Sw Mojesnvn Moab lywpag Jordon pobu bviywrg Jeriko ho agam goonv begamv,

²“Israel nyiilungam gaml jil beto bulug otu nvvsiqnam hoqgv Lebi nyi tulungam bulam bopam doogw koob jito. Hoo Lebi nyi tulug bopam taqg-loosaq ho tuun-mee dukumko nwmw doonbo gvdangam nulv bulam jito.

³‍Ho bopam tulu ham bulam doogw koob jito, hoo bulug nwmw doonbo gvda ham bulug svv tulu gab hoo tuun-mee tulu gab hoo bulug svdin tulu gab doom dvb jito.

⁴‍Lebi nyi tulu gab bopamg nwmw doonbo gvdangam jitayin, bopamg bvly hoqgv taqg-loosaq mwlwngv lwwyw kiubit gob nyitayin.

⁵‍Hoo nulv bopam lvvgam xikatayin, dou-caga daiyab lwwyw camnyi kiubit go, hoo nyooko daiyab lwwyw camnyi kiubit go, hoo dou-haaga daiyab lwwyw camnyi kiubit go, hoo nyoodum daiyab lwwyw camnyi kiubit go, bopamv lvpa jaqho dootayin. Soq nwmw doonbo bopam tulu si bul gab dootayin.

⁶“Nulv Lebi nyi tulungam kigwl cwwgwko bopam ax go jitayin, hoqho nyi mingdum dvb mengma bo nyiingv kigwl cwwgw tayin, hoo hoq tulu lvgab nulv campy leq vnyi go bulam bopam mam vbw jitayin.

⁷‍Lebi nyi tulungam nulv nwmw doonbo bopam campy leq piin gob bulam jitayin.

⁸‍Hoo bopam tulu ham Israel nyiilug gumn naaknam hoqgv nulv jitayin, nyob twwtbo hoqgv mvqlw kalam go naatayin, hoo nyob anyo bo hoqgv anyo kalam go naatayin; nyiicwr-cwrxig otu nvvsiqnam hoqgv Lebi nyi tulungam bopam mam jitayin.”

⁹‍Hoo At Sw Mojesnvn agam goonv begamv,

¹⁰“Israel nyiilungam agam goog dvl hoo bulam beto, hwdlo nulv Jordonam rabla yukul Kanaan gvda urab haaikun,

¹¹‍ho nulv kigwl cwwgwko bopam tulungam nulgab xuqlin tayin, ho nyi mingdum dvb mengma bo nyiingv hoqho kigw tayin.

¹²‍Nulug nyi mengnam imiq lwkw nyiv nam minglwq tak hoqgv nulv bopam tuluho kilwql kigwl dootayin, ho hwdlo nyi dvparv pw-hwwbwq maady deedib nyi mengn bo hv sidwb nyiram.

¹³‍Hoo nulv bopam ax go kigwl cwwgwko bopam mam jitayin.

¹⁴‍Nulv Jordon kvtinho bopam oum go jitayin, hoo bopam kigwl cwwgwko oum gon Kanaan gvdaho jitayin.

¹⁵‍Soq bopam ax sam Israelwg nyiilu gab, hoo nyiin tulu gab hoo nyoodo nyi tulu gab, ho hiyv lajaqkam nyiam mingdum dvb mengn bo nyi tulungv soq bopam so kigwl cwwgw tayin.

¹⁶“Hvbmabde mwv yoqdwr lvgab nyiingam jwwnam hv sibnyiloqkam, mwv nyi mengn bov. Nyi mengn bov sidwb nyitayin.

¹⁷‍Hoo mwv wlw lvgab nyiingam tubnam hv sibnyiloqkam, mwv nyi mengn bov. Nyi mengn bov sidwb nyitayin.

¹⁸‍Ho mwv svvda hoqgv nyiingam jwwnam hv sibnyiloqkam, mwv nyi mengn bov. Nyi mengn bov sidwb nyitayin.

¹⁹‍Nyi mengnam imiq lwkw nyiv mengn boam minglwq tayin; hwdlo mwv mwam kaapa yin, mwv mwam sidwb mengtayin.

²⁰‍Hoo mwv mwam ceebio baql tooiyal tuutab-tuurabl mvnam hoqgv mwv sibnyiloqkam,

²¹‍ho hang baql mwwg alaq lvgab mwam nwqtab ko-gab, mwv sibnyiloqkam, hiyv mwam nwqtab bo ak hv sidwb nyitayin. Mwv nyi mengn bov. Hwdlo mwv mwam kaapa yin nyi mengnam imiq lwkw nyiv mengn boam minglwq tayin.

²²“Hvbmabde mwv mwam ceebio baqmab, ho tooiyal mudum dvb mvmab haqma pa galo tuutab baloqkam

²³‍ho mwv mwam ceebio baqma hoo mwam mudum dvb mvma, hvbmabde mwam kaapa maab wlw duqlwl duqdaqnam hoqgv mwv sibnyiloqkam,

²⁴‍ho nyi dvparv nyi mengbo ham la hoo minglwq tanbo nyiam soq pvvb tulu lvgab pw-hwwtayin.

²⁵‍Hoo cengmab nyi mengn bo ham nyi dvparv minglwq tanbo hoqgv ywwlin tayin, hoo nyi dvparv mwam mwwg kigwl cwwgwko bopamb kem tayin, hoo mwam dvrwqbo kuty lvgab neenbo nyub butv sima deedib mwv hoqho dootayin.

²⁶‍Hvbmabde nyi mengn bo hv mwv mood ximab mwwg kigwl cwwgwko bopam hoqgv lvvgwb lengb nyiloqkam,

²⁷‍hoo nyi mengnam imiq lwkw nyiv mwam mwwg kigwl cwwgwko bopam lvvgho kaapa baloqkam, minglwq deenbo nyi hv mwam minglwq kuba loqkam, mwv mwwg ywlw gorgiam baqta kuma.

²⁸‍Hoggab mwv mwwg kigwl cwwgwko bopamho nyub butv sima deedib mwv doodwb nyitayin, hvbmabde nyub butv sik baloqkam nyi mengn bo hv mwwg gvdab wkurl mwwg gumnam naata yukun.

²⁹‍Hoo soq gaml jinam sam la pvvb tulu sam nulam la nulug hotam-hotam xaqb dook gvdaho nyil swwtayin.

³⁰“Nyi ak nyi mengb nyiloqkam, hvvky kaagabo doob nyiloqkam, mengn bo ham sidwb mvtayin. Hvbmabde kaanbo nyi akin go hvvky jigam gab nyiingam sidwb mengnyi ram.

³¹‍Hoq aoho, nulv nyi mengn bo swwgam pvlyw maabv, hiyv sidwb nyixiaq pan, ham mwam sidwb mvtayin.

³²‍Hoo hiyv mwwg kigwl cwwgwko bopamho kilwql doopel, nyub butv sima taab mwv soor jil mwwg dook gvda hookur dukub soor jinam mam nulv loorwq maabv.

³³‍Nulug gvda dookam nulv kacdvb mvmabv, hoggab hijumv gvdangam kacdvb mvdwn, hoo gvdaho nyi meng gam gab nyic kwly gab pwr jila maadwn, hvbmabde hoq mengn bo ak ham minglwq twqdwb nyidkun.

³⁴‍Nulug gvda dookam nulv kacdvb mvmabv, hoq pengko ho ngo dooba dvn, hoggab ngo At Sw, Israelwg nyiilug pengko ho dooba dvn.”