Read Nyishi XINAM 36 Bible Online

XINAM 36 - Nyishi bible

XINAM 36

¹Josapg nyiilug ko tuup Manasseg ko tuup hosiq Makirg ko tuup Gilead mwwg abwg imiq dvpar hoqg peelo bob nyitwl Mojes gvla Israelwg nyiilug bulug ab dvpar hoqg peelo bo nyi tulug agaho ogumb hvvnwq banv agam goonum.

²‍Bulv benum, “At Sw ngoqg bir atwn gvdangam Israel nyiilungam tak cingkal otu naamto hvl gaml jinum, hoo At Sw ngoqg bir atwg ngulug vbw-bor Jelopehadwg mwwg nyem ko tulungam otungam jitwk hvl gaml jinum.

³‍Hvbmabde bulv Israelwg nyiilug asaq nyob ho nyem wk baloqkam bulug ab tulug otungam mwnwg nyem wk nyob tuluho hoqg otungam vbw jita yukun. Ho hoqg tak cinglinam otu ham nul galoqkv naalin taikun.

⁴‍Hoo hwdlo Israel nyiilu gab jublingv haaikukam, bulug otungam bulug nyem wk nyob ho vbw jita yukun, hoo bulug otungam bulug ab tulug otu hoqgv naapaq taikun.”

⁵‍Hoo At Swg gomcwr bek jaqb Mojes Israel nyiilungam gaml jil begamv, “Josapg nyob nyiilug benam si kvtaqdo.

⁶‍Soq sib At Sw Jelopehadwg nyem ko tulug pagoqkam gaml jil benum, ‘Bulam bulug al yinpa hvl mwwnam nyega lvgab nyem wwm to, bulug ab tulug nyob hoolu pengko aro ho bulv nyem wtayin.

⁷‍Israelwg nyiilug otungam nyob akwn hoqgv akwnb otu jisiq nyoram, hoggab Israelwg nyiilug nyiicwr-cwrxig otungv mwwg ab tulug nyob otu gob dooky tayin.

⁸‍Hoo nyem kov hiyv Israelwg nyiilug nyob hoqgv otu nvvsiqdvn, hv mwnwg ab nyob hoolu ho nyem wdwb nyitayin, ho Israelwg nyiilug nyiicwr-cwrxiv mwwg abwg gumnam bwwsiq tayin.

⁹‍Ho nyob akwn hoqg otungam nyob akwnho nvvsiq nyoram, hoggab Israelwg nyiilug nyiicwr-cwrxiv mwwg atwg otungam bwwl doog tayin.’”

¹⁰‍At Sw Mojesnvn gaml jik jaqb Jelopehadwg nyem kongv nyiknum,

¹¹‍hoggab Mala, Tirja, Hogla, Milka, hoo Noa Jelopehadwg nyem ko tulungv bulug abwg vbw-bor tuluho nyem wknum.

¹²‍Bulv Josap gv ko tuup Manasseg nyob nyiilu dvparho nyem wknum, hoo bulug ab tulug nyob hoqg otungv bulug lvgab biimab doonum.

¹³‍Soq gaml samla pvvb tulu sam At Sw Mojes lvgab Israel nyiilungam Moab lywpag Jordonwg Jeriko ho gaml jiknum.