Read Nyishi XINAM 4 Bible Online

XINAM 4 - Nyishi bible

XINAM 4

¹At Sw Mojes nvla Aaronnvn agam goonv begamv,

²“Lebig ko tuup Kohat gv ko tuup tulungam bulug ab imiq dvparam la nyobam emin xika to,

³‍vnyw cammum akambo hoqgv naarab layil vnyw camng namgub, hiyv mwlwngv kvvrwq minsko tombu ho bonam nyitab haala yidwn.

⁴‍Soq si Kohat ko tuup tulug kvvrwq minsko tombu ho bon nyisv: hv mwlwngam dvrwq yaanbo dupum-dvrab pv.

⁵‍Hwdlo svmcwngam saiyaq yukam Aaron la mwwg ko tuup tulungv pvvb uddum urab haatayin hoo tortumnan vj tulungam naapoq layil pvvb uddum mam hoqg lvgab puucw tayin.

⁶‍Ho bulv sibin vpinam hoqg aob tomlup tayin hoo hoqg aoho vj yaj boam tomlup tayin, hoo lyvxar tulungam xwrlwq tayin.

⁷‍Hoo tebol aoho lwxiam dooky bo wtwngam vj yajbo tomlup tayin hoo hoq aoho hukungam, sulum parnan dupum-dvpar pam, pukaqkam, hoo twwnan pvtaqkam; lwxiam kaapa dvb doonbo wtwngam pvvtayin.

⁸‍Ho vj lwwcw cwwmo-cwwlo boam hoq tulu aoho bulv tomlup tayin hoo ham sibin vpin lvgab tomlup tayin, hoo hoqho lyvxaram xwrlwq tayin.

⁹‍Hoo lemp twgwngam, lemp tulungam, sobku tulungam, huku tulungam hoo kuty bwwl hornan tulungam, bulv vj yajbo lvgab puucw tayin.

¹⁰‍Hoo bulv hoqg hog mwlw dupum-dvrab pam sibin vpin lvgab puucw tvl hoo ham joonnan paaxa ho vlwqnum.

¹¹‍Hoo hun yugwngam vj yajbo lvgab puucw tayin hoo ham sibin vpin lvgab tomlup tayin, hoo ham lyvxar tulungam xwrlwq tayin.

¹²‍Hoo bulv dvrwq namlo ho nyin-mvnam hog mwlw dupum-dvrab pam vj yajbo lvgab puucw tayin hoo hoq tulu ham sibin vpin lvgab tomlup tayin hoo hoq tulu ham joonnan paaxa ho vlwq tayin.

¹³‍Hoo bulv yugwg muiyam lwwsa-lwwma bo vjho puucw tayin.

¹⁴‍Hoo bulv yugw hoqg dupum-dvrab nyin-mvnnan hog mwlwngam vlwq tayin, hoqg loorangam, xwqgab nanam, tuqxaq nanam, hoo pukaqkam, hoo yugwg nyinan dupum-dvrab mwlwngam vlwq tayin; hoo bulv hoq tulu ham sibin vpin lvgab tomlup tayin, hoo hoqho lyvxar tulungam xwrlwq tayin.

¹⁵‍Hoo hwdlo Aaron la mwwg ko tuup tulungv dvrwq namlog dupum-dvrab pam la hoqg nyin-mvn nanam mwlwngam puucw cwnyia tvl svmcw hoqgv wrab taikam, hoq kokwb Kohat ko tuup tulungv hoq tulu ham jootab haatayin, hvbmabde bulv dvrwqbo dupum-dvrab pam idaqram, idaq baloqkam bulv sitayin. Soq dupum-dvrab sam Kohat gv ko tuup tulungv kvvrwq minsko tombu hoqgv jool wgtayin.

¹⁶“Hoo nyub Aaron gv ko tuup Eleajar xumk pirr lemp gab kutiam, sungam bo sulum parsam, lwxiam dvs aky jinam mam, hoo neexaqnan kutiam hoo dvrwq namlo ho hog mwlwngam doon boam hoo hoqg dupum-dvrab tulungam kaal nyig bob nyitayin.”

¹⁷‍At Sw Mojes nvla Aaronnvn agam goonv begamv,

¹⁸“Kohat nyob nyiilungam Lebi nyi tulug pengko hoqgv twrm mvmabv,

¹⁹‍hvbmabde bulam hingkib betam to, ho bulv swwl dootayi hoo siram hwdlo bulv mwlwngam dvrwq yaanbo dupum-dvrab ogumho hvvnwq yin: Aaron la mwwg ko tuup tulungv urab haatayin hoo bulam nyiicwr-cwrxiam at atwg bon nyidy sanam mam la joos-baqsam xuqlin jidwn,

²⁰‍hvbmabde bulv vcwr gokam urab haal dvrwqbo dupum-dvrab pam kaadwb nyiram, bulv hvb nyib nyiloqkam sitayin.”

²¹‍At Sw Mojesnvn agam goonv begamv,

²²“Gerson ko tuup tulu ngamkam, bulug abwg nombungam hoo bulug nyobam xika to.

²³‍Vnyw cammum hoqgv vnyw camng namgub akamboam, hiyv kvvrwq minsko tombu ho haal bon nyila tayin ham no bulam xeqg dvl xika to.

²⁴‍Soq bon tulu sam Gersonwg nyob nyiilungv bon nyil hoo vgwngam svka minstayin:

²⁵‍bulv xumk pirr tortumnan vj tulungam hoo kvvrwq minsko tombu tortumnan vj tulu ham hoo hoqg aoho sibin vpin tomlupnam tulu ham hoo kvvrwq minsko tombu haagag tortumnan vj tulu ham baqtayin

²⁶‍hoo baagwg haqpnan tulu ham hoo haagag toggoqg tortumnan vj tulu ham hoo xumk pirram la yugwngam toryiqnan vj tulu ham, hoo hoq oso tulu ham hoo hoqg nyin-mvnnan tulu ham baqtayin. Hoo bulv hoq hvkwg bonam bulv nyitayin.

²⁷‍Gersonwg ko tuup tulug hog mwlw bonam Aaron la mwwg ko tuup tulungv gaml jil nyim tayin, hoo bulug hog mwlw baqdy-nyidy sanam mam bulv nyig tayin. Hoo nulv bulug baqs-bonam bilwq tvl bulam baqm tayin.

²⁸‍Soq si Gersonwg ko tuup nyob tulug kvvrwq minsko tombu ho bon nyidy sanamv, hoo bulam nyub Aaron gv ko tuup Itamarwg uraho kaal bon nyig mvtayin.

²⁹“Merarig ko tuup tulungam no bulug ab imiq hoqgv nyob hoolungam xika tayin.

³⁰‍Vnyw cammum hoqgv vnyw camng namgub akamboam, hiyv kvvrwq minsko tombu ho haal bon nyila tayin ham no bulam xeqg dvl xika to.

³¹‍Hoo soq si hoggv bulam bilwq tvl nyidy sanamv, bulv soq tulu sam kvvrwq minsko tombu ho bon nyitayin: xumk pirrwg ywrnan tulu ham, hoqg xaapo tulungam, hoqg swwrw tulungam, hoo hoqg doopy tulu ham,

³²‍hoo baag hoqg swwrw tulu lvgab hoqg doopy tulu ham, hoqg tooky tulu ham, hoo oso tulu ham hoo hoqg hog mwlw nyin-mvnnan ham baqtayin. Hoo nulv bulug baqdy sanam tulu ham emin xeqlin tvl bulam baqm to.

³³‍Soq si Merarig ko tuup nyob tulug kvvrwq minsko tombu ho bon nyidy sanamv, bulam nyub Aaron gv ko tuup Itamar uraho bonam kaal nyig tayin.”

³⁴‍Hoo Mojes la Aaron, Kohat ko tuup nyob tulug bulug ab dvpar hoqg peelo bo tulungam xiqxul xeqlinum,

³⁵‍vnyw cammum hoqgv vnyw camng namgub akamboam, hiyv kvvrwq minsko tombu ho haal bon nyila tayin ham no bulam xeqg dvl xika to;

³⁶‍hoo hoqg nyobam xilin kunamv 2,750 kunum.

³⁷‍Hiyam kvvrwq minsko tombu ho bon nyim dvb, At Sw Mojesnvn gaml bekjaqb, Mojes la Aaron soq sib Kohat nyi tulug nyobam xeqlin kunum.

³⁸‍Soq tulu si Gersonwg ko tuupv, bulug nyobv hoo bulug ab tulug nombungam xeqlin kunamv,

³⁹‍vnyw cammum hoqgv vnyw camng namgub akamboam, hiyv kvvrwq minsko tombu ho haal bon nyila tayin ham no bulam xeqg dvl xika to—

⁴⁰‍ho bulug nyobam la bulug ab imiq dvparam xeqlin kunamv 2,630 kunum.

⁴¹‍Hiyam kvvrwq minsko tombu ho bon nyim dvb, At Sw Mojesnvn gaml bekjaqb, Mojes la Aaron soq sib Gersonwg ko tuup tulug nyobam xeqlin kunum.

⁴²‍Soq tulu si Merarig ko tuupv, bulug nyobv hoo bulug ab tulug nombungam xeqlin kunamv,

⁴³‍vnyw cammum hoqgv vnyw camng namgub akamboam, hiyv kvvrwq minsko tombu ho haal bon nyila tayin ham xeqg dvl xika to—

⁴⁴‍ho bulug nyobam xeqlin kunamv 3,200 kunum.

⁴⁵‍At Sw Mojesnvn gaml bekjaqb, Mojes la Aaron soq sib Merarig ko tuup nyobam xeqlin kunum.

⁴⁶‍Lebi nyi tulug eminam, Mojes la Aaron hoo Israelwg peelo bo tulungv bulug nyobam la bulug ab imiq dvparam emin xeqlin kunum,

⁴⁷‍vnyw cammum hoqgv vnyw camng namgub akamboam, hiyv kvvrwq minsko tombu ho haal bon nyidwn hoo bulug baqs tulu ham baqdwb ham xeqlinl xikanum,

⁴⁸‍hoq emin xeqlin kunamv 8,580 kunum.

⁴⁹‍At Sw Mojes lvgab gaml jinam hvb bulv nyiicwr-cwrxiam at-atwg bon nyidy sanam mam hoo baqdy sanam mam emin xeqlin jinum. At Sw Mojesnvn gaml jinam hvb mwv bulam emin xeqlin kunum.