Read Nyishi XINAM 5 Bible Online

XINAM 5 - Nyishi bible

XINAM 5

¹At Sw Mojesnvn agam goonv begamv,

²“Tviyiq nyinbo nyi vxiam ho doola biqlinbo tulungam hoo hiyv xeq svma lvgab dooba-daqba bo mwlwngam svmcw ura hoqgv lvvgwb roolin mvdwb Israel nyiilungam gaml jito.

³‍Ho bulug pengko ho ngoqg doogw koam, bulv svmcwngam kacdvb mvm mvma dvb, nulv nyem jaqkam nyega jaqkam bulam svmcw lvvgwb roolin xaato.”

⁴‍Hoo Israel nyiilungv hvb nyinum, hoo bulam svmcw lvvgwb rooxa kunum; At Sw Mojesnvn hoggub benum, hvb Israel nyiilungv nyiknum.

⁵‍Hoo At Sw Mojesnvn agam goonv begamv,

⁶“Israel nyiilungam beto, hwdlo nyega jaqkam ho nyem jaqkam nyic nyil ho nyiilungv At Swn mwwjwnam mam mvpia peekul, hoo nyi ak hv mwwg nyimuram mwwdar baloqkam,

⁷‍mwwg nyic nyinam mam mwv xaqpurl xaqtam tayin. Hoo hiyam mwv nyimur kunum hoq nyi ak ham mwwg nyimur kunam mam mwv jopwb ang yaago vbw tvl kwly jitayin.

⁸‍Hvbmabde nyimur nyinam nyi akv la mwwg imiq nyiv dook maabalo nyimur nyigo gab kwly jinam ham nyub gab At Swn jitayin, hoq aoho yaap dorg nyic kwly gab pwr jinam mam jitayin hoo nyic kwly gab pwram mwwgab jitayin.

⁹‍Hoo Israel nyiilug hoolu luucw-luut dvrwq boam nyubam lvqc cinamv, mwwgab dootayin.

¹⁰‍Nyiicwr-cwrxiv mwwg dvrwq lvqcam aptayin: hiyv lajaqkam hoggv nyubam jitayin hv mwwgab dootayin.”

¹¹‍Hoo At Sw Mojesnvn agam goonv begamv,

¹²“Israel nyiilungam beto, nyi akwg nywxwngv gvqmwl hoo mwwg mwwjwngam mvpia baloqkam,

¹³‍ho nyega ak mwnwn nywxw bwwb loqkam, hoo hoqham mwnwg nyol vnyiq kaaga hoqgv kvs baloqkam, hoo mwnwg atam kacdvb nyinam ham yeqlin mabaloqkam, hoo mwnwg nyinam mam hvvky kaanbo dooma baloqkam, hoo mwnwg bwwxil nyidu dvb nootu maba lo,

¹⁴‍hoo mwn at-atam kacdvb nyima sujaqkam, nyol aoho kaaneqnam yalv haab nyiloqkam hoo mwnwg kacdvb nyinam mwwg nywxwngam mwv kaaneq baloqkam, ho maalo mwwg aoho kaaneqnam yalv haab nyiloqkam hoo mwwg nywxwngam kaaneq baloqkam,

¹⁵‍ho nyega akv mwwg nywxwngam nyub dookub boatayin hoo mwn gab pwr haanbo ipa wyw hoqgv tanyeq wtw sarg bwwtaq haatayin. Mwv hoqham kuty toolwqmab hoo sungam bo gokam vlwqmab hoggab hoqhv kaaneqnam dvs akiv, ho mwwpanam dvs akiv, nyimurnam mam mwwpal bwanamv.

¹⁶“Hoo nyubv mwnwn ogumb boonwql hoo At Swg agaho daqm tayin.

¹⁷‍Hoo nyubv dvrwqbo issam deekam pwcw gol naatayin hoo xumk pirrwg doopy hoqgv diimwr meeg naarabl hoo ham iss urab vlwq tayin.

¹⁸‍Hoo nyubv nyem mam At Swg agaho daqm tayin hoo nyem dum mam toosuq tayin hoo mwnwg alaqho mwwpanam dvs akiam gvqlwq tayin, hoqhv kaaneqnam dvs akiv. Hoo nyubv mwwg alaqho beenam mam baqa bo kacaqbo issam jitayin.

¹⁹‍Ho nyubv mwnwn hvl dingl bem tayin, ‘nyega asaqkv noqg lvgab yuma nyiloqkam, hoo no noqg nyolwg gaml-ator uraho dootwl dvrwq maanam nyima nyiloqkam, soq beenam mam baqa bo kacaqbo iss soqgv no svswq nuka.

²⁰‍Hvbmabde noqg nyolwg gaml-ator uraho dootwl no bwwxin pakloqkam, hoo no atv kacdvb nyip kuloqkam, hoo noqg nyol lvvg ho no asaq nyegangam bwwp kuloqkam,

²¹‍ho (nyubv nyem mam soq sib bel dingm tayin) ‘At Swg beenamv nam haanka hoo noqg nyiilug pengko ho ding tayin At Sw noqg xarpongam yaapaq mvnka hoo noqg gv-ngam goobum-gooiyiq nvka.

²²‍Soq beenam mam baqa bo iss sam noqg twwnan pukaqb wpeq nvka hoo noqg mambam goom nvka hoo noqg xarpongv yaapaq nvka.’ Hoo nyem akv betayin, ‘Hvb nyimto, Hvb nyimto.’

²³“Ho nyubv soq beenam tulu sam kitap golo xeqtayin hoo ham kacaqbo iss lvgab hwrxaq tayin.

²⁴‍Hoo mwv beenam mam baqa bo kacaqbo iss sam nyem akam twwm tayin, hoo beenam mam baqa bo kacaqbo iss sam mwn twwlwq kalam mwnwg kepongv vc loodab dwqrab tayin.

²⁵‍Hoo nyubv kaaneqnam akiam mwnwg alaqho gvbwnam ham naatayin hoo At Swg agaho torlinam akib jitayin hoo ham yugw ho bwatayin.

²⁶‍Hoo nyubv alaq yumgub dvs akiam mwwpanam aky gob naatayin, hoo ham yugw ho partayin, hoo kokwngam nyem ak ham iss sam twwm tayin.

²⁷‍Hoo hwdlo mwv iss sam mwnwn twwm yin, mwn atv kacdvb nyis pakloqkam hoo mwnwg nyol mwwjwngam mvpia pakloqkam, beenam mam baqa bo issiv mwnwg urab haatayin hoo vcjaqb dwqrab tayin, hoo mwnwg mambv gootayin, hoo mwnwg xarpongv yaapaq tayin, hoo nyem ak hv mwnwg nyiilu pengko ho beenam gob nyita yukun.

²⁸‍Hvbmabde nyem akv mwn atv kacdvb nyimab dvrwq baloqkam mwnwn hoqg nyiram ho mwn svswq tayin hoo mwn ko gvrab tayin.

²⁹“Soq si kaaneqnam pvvb akv, hwdlo nywxw akv mwnwg nyolwg gaml-ator uraho dootwl gvqmwl mwn atv kacdvb nyim nyiloqkam,

³⁰‍ho hwdlo kaaneqnam yalv nyega akwg aoho haaikam hoo mwwg nywxwngam mwv kaaneq yin soq pvvb tulu sam nyidwb nyitayin. Ho mwv nyem ak ham At Swg agaho daqm tayin, hoo nyubv mwn gab soq pvvb tulu sam nyil wtayin.

³¹‍Nyegangv nyimurnam hoqgv svswq tayin, hvbmabde nyem ak hv mwnwg nyimur nyijongam baqtayin.”