Read Nyishi XINAM 6 Bible Online

XINAM 6 - Nyishi bible

XINAM 6

¹Hoo At Sw Mojesnvn agam goonv begamv,

²“Israel nyiilungam agam goog dvl hoo bulam beto, hwdlo nyega jaqkam ho nyem jaqkam bulug luusaq jaqb swwdwb dingnam mam dingyikam, Najirait akwb swwdwb dingnam, At Swn atv-atam jipaq vrr rwtayin,

³‍mwv atv-atam opo hoqgv aado tayin. Mwv twwxum boam vcwr gokam idaqram hoo roo ala hoqg mvnam ham ho roo aaxiam leelaq bvkam ho sengd bvkam dvla ram.

⁴‍Mwwg Najirait akwb swwnam bumpwho mwv roo boolu hoqg lengn boam aaxiam kam ho maalo kuxuqngam kam dvmabv.

⁵“Mwwg Najirait akwb swwnam bumpwho, mwwg dumpo ho yoqciq tvdaql reqmabv. Hwdlo mwv At Swn jipaqtvl vrr rwl swwnamv nyiyum maady deedib, mwv dvrwq tayin. Mwwg dum mam mwv aaso dvb swwm tayin.

⁶“At Swn mwwg jipaqtvl vrr rwl swwnam bumpwho mwv svma ogumho wnwqmab vrr tayin.

⁷‍Mwwg ab-ann gab kam, vbw-bor ho any-bwrm gab kam, mwv atv dvrwq maadwb mvram, hoggab mwv Pwnbon jipaq kunamv mwwg dumpo dum hv doodwn.

⁸‍Mwwg Najirait akwb swwnam bumpwho mwv At Sw gab dvrwqdvn.

⁹“Hoo haqma pa golo mwwg bviywrho nyiv sibaloqkam mwwg jipaqkunam dumpo dum mam kacdvb mvdwn, ho mwwg dvrwqb vrr rwd aalam mwwg dum mam mwv reqpaq tayin; kvn deen aalam mwv ham reqpaq tayin.

¹⁰‍Piin deen aalam mwv akambo pukum dornyi go ho maalo anyo pukum dornyi go kvvrwq minsko tombu haagaho nyubam bwa jitayin,

¹¹‍hoo nyubv dorgwn ham nyic aky gab jitayin hoo dorgwn ham boyuqnam akib jitayin, hoo mwv svmangam idaql nyic nyigam gab, mwwg nyic kwly gab pwram jitayin. Hoo mwwg dumpongam hoq aal darangam mwv garxaq tayin

¹²‍hoo mwv atv At Swn mwwg Najirait akwb swwdwb birnam mam lokta jitayin hoo vnyw nywgbo yaap dorg nyixiaqnam aky gab boa jitayin. Hvbmabde otuqho mwwg Najirait akwb swwknam tulu ham xipa kuram, hoggab mwwg Najirait akwb swwnam mam kacdvb mvknum.

¹³“Hoo soq si Najirait akwb swwdwb nyinam pvvbv, hwdlo mwwg jipaqtvl vrr rwl swwnam mam nyiyum kuba lo: mwam kvvrwq minsko tombu haagaho boatayin,

¹⁴‍hoo mwwg lvqcam mwv At Swn bwa jitayin, un-tar gvma bo vnyw nywgbo yaapam boyuqnam aky gab hoo un-tar gvma bo vnyw nywgbo sviya nyem dorg nyic aky gab, hoo un-tar gvma bo yaap dorg swrso aky gab jitayin,

¹⁵‍hoo opap kiilwq maanam wtw lo huc cig, kuty lvgab wtw cwwnam loq, hoo kuty neetwl opap kiilwq maab wtw kabnam loq, hoo bulug dvs akiam hoo bulug twws akiam baqa jitayin.

¹⁶‍Hoo nyubv hoq tulu ham At Sw agaho bwa tayin hoo mwwg nyic akiam la mwwg boyuqnam akiam jitayin,

¹⁷‍hoo mwv yaapam swrso pwr akiam opap kiilwq maanam wtw huc lvgab At Swn jitayin. Nyubv hoqg dvs akiam la hoqg twws akiam jitayin.

¹⁸‍Hoo Najirait akwb swwdwb nyinbo nyi akv mwwg garxaqnam dumpo dum mam kvvrwq minsko tombu haagaho reqpaq tayin hoo mwwg garxaqnam dumpo dum mam naatayin hoo ham swrso akiam pwram jinam hvb wm uraho vlwq tayin.

¹⁹‍Hoo nyubv yaap hoqg xwwnunam vlw gon, hoo opap kiilwq maanam wtw cwwnam taqg huc hoqgv naalin tayin hoo opap kiilwq maab wtw kabnam taqg naalayil, hoo mwwg garxaqnam dumpo dum mam mwv reqxo kokwngam, hoq tulu ham Najirait akwb swwdwb nyinbo nyi akwg alaqho gvqlwq jitayin,

²⁰‍hoo nyubv hoq tulu ham torlinam aky gob At Swg agaho jitayin. Hoq tuluhv nyub gab dvrwqbo bulwngv, copium lvgab xarpongam lvkin gob lvqcnum. Hoo hoq kokwb Najirait akwb swwdwb nyinbo nyi hv roo alangam twwxiq tayin.

²¹“Soq si Najirait akwb swwdwb nyinam pvvbv. Hvbmabde mwwg Najirait akwb swwn aoho At Swn jidwb dingr baloqkam, mwwg dingr ko lvgab mwv Najirait akwb swwn aky aoho vbw tvl jitayin.”

²²‍At Sw Mojesnvn agam goonv begamv,

²³“Aaron nvla mwwg ko tuup tulungam agam goog dvl beto, ho nulv Israel nyiilungam lvqc citayin: nulv bulam betayin,

²⁴At Sw nam lvqc cil hoo nam pvvg nvka;

²⁵At Sw mwwg nyuqm hoopu-haabiangam noqg aoho kaakinl hoo nam anya gvnka;

²⁶At Sw mwwg mwwswnamv noqg aoho doon ka hoo swrso malongam nam jignvka.

²⁷“Hoggab bulv ngoqg eminam naal Israel nyiilug aoho bebaloqkam, hoo ngo bulam lvqc citayin.”