Read Nyishi XINAM 8 Bible Online

XINAM 8 - Nyishi bible

XINAM 8

¹At Sw Mojesnvn agam goonv begamv,

²“Aaronnvn agam goog dvl hoo mwam beto, hwdlo no lemp tulu ham apyin, lemp kvn go lemp tvgwnan agaho huto huutayin.”

³‍Hoo At Sw Mojesnvn gaml bekjaqb, Aaron hvb nyinum: mwv lemp tvgwnan agaho lemp tulungam tvpnum.

⁴‍Hoo soq si lemp tvtamnan tulu ham hunam kvnyi jwwl bonam nyinum. Hoqg lwkw hoqgv niqtuq namgub kvnyi jwwl mvknum; At Sw Mojesnvn kaakinam hvb mwv lemp tvgwnanam mvknum.

⁵‍Hoo At Sw Mojesnvn agam goonv begamv,

⁶“Israel nyiilug pengko hoqgv Lebi nyi tulungam naag dvl bulam hwrxaqto.

⁷‍No bulam hwrxaq dvb nyiyi kam soq tulu sam nyitayin: bulug aoho xeexaqnan issam pwqyaqto, hoo bulug gv dorpwngam yoqciq lvgab reqxaqto, hoo bulug vj tulungam niixaqto hoo bulam atam hurs mvto.

⁸‍Ho bulam svv hvvtw hoqgv hvvb dorg hoo albo wtw lvgab kuty mviyonam mam dvs aky gob naato, hoo svv hvvtw hoqgv no hvvb dorsaq loq dorg nyic aky gab naatayin.

⁹‍Hoo no Lebi nyi tulungam kvvrwq minsko tombu agaho boa tayin hoo Israel nyiilug dvpar mwlwngam hookum mvto.

¹⁰‍Hwdlo no Lebi nyi tulungam At Swg agaho boa yin, Israel nyiilungv bulug alaqkam Lebi nyi tulug aoho idaqtayin,

¹¹‍hoo Aaron Lebi nyi tulungam At Swg agaho Israel nyiilug hoqgv torlinam aky gob jitayin, ho bulv At Swg bonam nyitayin.

¹²‍Ho Lebi nyi tulungv bulug alaqkam hvvb dumpo ho idaqtayin, hoo no dorgwn ham nyic aky gab jitayin hoo dorgwn ham boyuqnam aky gob At Swn Lebi nyi tulug nyic kwly gab pwr jitayin.

¹³‍Hoo no Lebi nyi tulungam Aaron gvla mwwg ko tuup tulug agaho daqm tayin, hoo bulam torlinam aky gob At Swn jitayin.

¹⁴“Ho no Lebi nyi tulungam Israel nyiilug pengko hoqgv vpwb mvpinto, hoo Lebi nyi tulungv ngoqgab dootayin.

¹⁵‍Hoo hoq kokwngam Lebi nyi tulungv kvvrwq minsko tombub bon nyitab wtayin, hwdlo no bulam hwrxaqyin hoo bulam torlinam aky hvb jito,

¹⁶‍Hoggab Israel nyiilug pengko hoqgv bulam jopwb ngam jitku. Israel nyi tulug otuqcob ko bwwnam kwlib ngo bulam atv ngoqgab naapa kun.

¹⁷‍Hoggab Israel nyiilug pengko hoqg otuqcob ko bwwnam nyi ge hoo svdin ge hoq tuluhv ngoqgv. Hwdlo aalho ngo Ijipt gvda hoqgv bulug otuqcob ko bwwnam mam mengpaq yukho, ngo bulam ngoqgab ngo atv garxaq pakun,

¹⁸‍hoo Israel nyiilug pengko hoqg otuqcob ko bwwnam kwlib ngo Lebi nyi tulungam naapa kun.

¹⁹‍Hoo Israel nyiilug pengko hoqgv ngo Aaron nvla mwwg ko tuup tulungam Lebi nyi tulungam lvqc cinam hvb cipa kun, Israel nyiilu gab kvvrwq minsko tombu ho bon nyim dvb hoo Israel nyi tulug nyic kwly gab pwr jim dvb, ho hwdlo Israel nyiilungv dvrwq namlo ogumho hvvnwq yukam Israel nyiilug pengko ho swlin-mominv haakram.”

²⁰‍Soq sib Mojes la Aaron hoo Israel nyi tulug dvpar mwlwngv bulv Lebi nyi tulungam darxaq kunum. At Sw Mojesnvn gaml bekjaqb Israel nyiilungv Lebi nyi tulungam hvb nyiknum.

²¹‍Hoo Lebi nyi tulungv bulv atv atwg nyicam xeexaq sunum hoo bulug vj tulungam niixaqnum, hoo At Swg agaho Aaron bulam torlinam aky hvb jiknum, hoo Aaron bulam dvrwq mvdwb bulug nyic kwly gab pwr jinum.

²²‍Hoo hoq kokwb Lebi nyi tulungv kvvrwq minsko tombu ho bulug bonam, Aaron la mwwg ko tuup tulug agaho nyitab wknum; At Sw Mojesnvn Lebi nyi tulungam gaml jinam hvb bulv bulam nyiknum.

²³‍Hoo At Sw Mojesnvn agam goonv begamv,

²⁴“Soq tulu sam Lebi nyi tulungam nyimto: vnyw camnyi leq nywng hoqgv hoo ham akam yaan boam kvvrwq minsko tombu ho bulam bon nyitab haamto.

²⁵‍Hoo vnyw camng leq nywng gob akam yukun bulam bon nyitab haam kumabv hoo bulam bon nyim kumabv.

²⁶‍Bulug vbw-bor tulungam kvvrwq minsko tombu ho rvkil svka tayin, hvbmabde bulv bon nyikram. Soq sib no Lebi nyi tulungam bulug bon nyis tulungam hingkib betaml bilwqtvl bon nyimto.”