Read Nyishi XINAM 9 Bible Online

XINAM 9 - Nyishi bible

XINAM 9

¹Hoo Ijipt gvda hoqgv lengxo kokwg vnyw nywnyig otuq pool ho, At Sw Mojesnvn Sinai deexa-raraho agam goonv begamv,

²“Israel nyiilungam Dvtv Durum dvnam ham xilin kunam moodam kvxaqmab nyimto.

³‍Soq poolwg aal camleq loopy aalwg ariyum hoqgv nulv hoq xuqlin kunam moodam kvxaqmab nyitayin; hoqg gaml benam mwlwngam hvb hoo hoqg pvvb benam mwlwngam hvb nulv nyidwb nyitayin.”

⁴‍Ho Dvtv Durum dvnam ham bulam nyim dvb Mojes Israel nyiilungam betamnum.

⁵‍Hoo bulv Dvtv Durum dvnam ham otuq poolwg camleq loopy aalwg ariyum hoqgv Sinai deexa-raraho At Sw Mojesnvn gaml bekjaqb, Israel nyiilungv nyiknum.

⁶‍Hoo nyi tuugin svmangam idaq ko-gab bulv dvrwqmab doonum, ho bulv hoqg aalho Dvtv Durum dvnam ham nyila kumanum, hoo bulv Mojes la Aaron gv agaho hoq aalho haanum.

⁷‍Hoo soq nyi tulu si mwam benum, “Ngulv svmangam idaq ko-gab dvrwq kuma. Hoqgab hoggub soq xuqlin kunam mood so ngulv Israel nyiilug pengko hoqgv At Swn aky bwa jima nyita yukun?”

⁸‍Hoo Mojes bulam benum, “Miceqgo kaaya to, At Sw nulug soq pagoq sam hog hvl bed nyibadwq ham taka coot nvpv.”

⁹‍At Sw Mojesnvn agam goonv begamv,

¹⁰“Israel nyiilungam agam goog dvl beto, hiyv lajaqkam nulug pengko ho hoo nulug hotam tulungv svmangam idaql dvrwq kuma nyiloqkam, hvbmabde oyu go nyiody boop kuloqkam, mwv At Swg Dvtv Durum dvnam ham hvraqb nyidwb nyitayin.

¹¹‍Pool bvrnyi deenwg camleq loopy aalwg ariyum hoqgv bulv ham nyirab tayin. Bulv opap kiilwq maanam wtw lvgab kacaqbo oo-wjam dvtayin

¹²‍Bulv ar namgub hog akkam doom mvmabv, hoqg alo tulungam kam mwtwr maabv; Dvtv Durum dvnam gaml jinam mwlw hvb bulv nyidwb nyitayin.

¹³‍Hvbmabde hiyv lajaqkam dvrwq supa hvbmab nyiody boomab dvtv Durum dvnam ham nyima baloqkam, hoq nyi ham mwwg nyiilu hoqgv mvpaqtayin hoggab mwv At Swg xipwl apko moodho aky jikma; hoq nyi ak hv mwwg nyic nyijongam baqtayin.

¹⁴‍Hoo nulug pengko ho nyoodo nyiv At Swg Dvtv Durum dvnam ham nyid nyiloqkam, Dvtv Durum dvnam pvvb mwlw ham mwam nyigdvl nyimto. Nulv nyoodo nyi gab la nyiidu nyi gab pvvb akinam nyin tayin.”

¹⁵‍Xumk pirram mvrab yuk aalho, kvvrwq minsko tombug, xumk pirram doomwqkv pulupnum. Hoo hoq ariyum hoqgv ar namgub xumk pirram doomwqkv wm huunam hvb huul doognum.

¹⁶‍Ho hoqhvb lwxiam nyil doonum: aalam doomwqkv pulupnum hoo aiyam wmmwb huul doognum.

¹⁷‍Hoo hwdlo jaqkam doomwqkv tombu hoqgv hwrab yin, hoq kokwb Israel nyiilungv wrabnum, hoo hog loq nyookho doomwqkv hwrnunum, hoqho Israel nyiilungv svmcw mvl doonum.

¹⁸‍At Swg gaml jikwb Israel nyiilungv wrabnum, hoo At Swg gaml jikwb bulv svmcwngam mvl doonum. Doomwqkv hog hwdgo xumk pirr aoho dootayin, bulv hwdkalam go hoqho svmcwngam doonum.

¹⁹‍Xumk pirr aoho oyu aal go doomwqkv doody deedib Israel nyiilungv At Swg benam mam tal doonum hoo bulv wrab maab doonum.

²⁰‍Lok-lokob doomwqkv xumk pirho anyo aal gob doonum, hoo At Swg gaml jikwb bulv svmcw ho doonum; ho At Swg gaml jikwb bulv wrabnum.

²¹‍Hoo lok-lokob doomwqkv ariyum hoqgv ar namgub dootwqnum. Hoo hwdlo aram doomwqkv hwrab kalam bulv kam wrabnum, ho lok-lokob doomwqkv aal loog la ai yubgub dootwqnum, ho hwdlo doomwqkv hwrab kalam bulv kam wrabnum.

²²‍Hoqhv aal loonyi jaqkam, ho pool barg jaqkam, ho oyu mood jaqkam, doomwqkv xumk pirho doody deedib Israel nyiilungv svmcw ho doodunum hoo bulv wrab maanum, hvbmabde hwdlo hoqhv hwrab yin bulv kam wrabnum.

²³‍At Swg gaml jikwb bulv svmcw doonum, hoo At Swg gaml jikwb bulv wrabnum. At Sw Mojesnvn gaml jinam hvb, bulv At Swg benam hog mwlwngam tal nyinum.