Read Nyishi MAIKA 2 Bible Online

MAIKA 2 - Nyishi bible

MAIKA 2

¹Hiyv nyic-nyiya nyidwb mwwdwn hoo bulug kartam tuluho alman bonam nyidwn mwwdwqkam haamto! Hwdlo arkomc yukam, bulv ham nyidwn, hoggab soq si bulug alaqg atorv.

²Bulv rongongam kaabil hoo hoq tulu ham naareq dvn, hoo nam tulungam kam naareql wgdvn; bulv nyi ak la mwwg dvparam, nyi akam la mwwg gumn tulungam nyijab-nyiyiq dvn.

³Hoqgab soq sib At Sw bedo: kaato, soqg imiq dvpar gab ngo ceekol ciqcaq-bviyaqkam nyim dvb mwwdwn, nulv ham nulug lwwpo hoqgv mvpaq nyoram, hoo nulv larl wl yvnyi ram, hoggab hoq mood hv ciqcaq-bviyaq mood akub nyitayin.

⁴Hoq aalam bulv nam ceekol mwwnyirnam beminam betayin hoo kacaq-bviyaq dvb mootayin, hoo begamv, “Ngulam vc-loodab mucu-mviya paku; mwv ngoqg nyi tulug naady sanam mam kwly paku; hoggab mwv soq sam ngoqg soqgv mvpaq pan! Mwwjwngam haqpaq boam mwv ngulug rongo tulungam jipaq paku.”

⁵Hoqgab At Swg dookumko ho tak kaadwb nulv akjijaqkam dooram.

⁶“Tomswr maabv—hvbsujaqkam bulv tomswr do- soq pagoq sam akam tomswr hima; modu minsmaanv ngulam mviya kuram.”

⁷Soq sam bebyv, Jakubg dvpara? At Sw cwql swwma pak nvi yv? Soq tulu si mwwg bon nyinam mvi yv? Hiyv jvqtwb wdwn mwwg gab ngoqg tomswrnam tulungv albo maai yv?

⁸Hvbmabde nyinyiaq jaqb ngoqg nyiilungv ceebiob daqrab paku; nyob padwb mwwmab hiyv mwwjwl wpeq boam nulv xinam kamtam twqjor paku.

⁹Ngoqg nyi tulu nyem mam bulug kangam bo nam tulu hoqgv nulv ruqlin xaapa ku; bulug swwca bo ko tulu hoqgv nulv ngoqg yuunam mam nwrba gob naapaq paku.

¹⁰Gorabto hoo wno, hoggab soq si doonu ko nyookma, hoggab vc-loodab yuupaqnam lvgab kac-tanyiaqkv sam twrm paku.

¹¹Nyi ak wlayil hoo asaram gool hoo vm mvvl begamv, “Ngo nulam opongam la aljaqnbo twwnam mam tomswr tayin,” mwv soq nyi tulu sam tomswrbo gob nyidwn!

¹²Jakub pa, ngo hoggub nyijaqkam nul mwlwngam dookum mvtayin; ngo boumnam Israelam bookum tayin; ngo bulam sviya acam hvb lvkin gob mvtayin, sviya acamv ww hwwtaqho dunam hvb nyiitw mvqlwngv tosup-taiyab dvb dudwn.

¹³Hiyv sulu ungngam mvko dvn hv bulug otuqb wtayin; bulv mvpia layil hoo toggoqb wpeq dvn, lvvgwb hoqgv lengdvn. Bulug lvpw atv bulug otuqb wdwn, At Sw bulug otuqho doodwn.