Read Nyishi MAIKA 3 Bible Online

MAIKA 3 - Nyishi bible

MAIKA 3

¹Hoo ngo benum: Tagabto, Jakubg dvpar hoq nyiit at nulv hoo Israelwg dvparam pvvb bwwl doogbo tulu! Nulv jvqtwngam cengdwb nyima dvn yv?-

²Nulv alboam oyum dvn hoo alman boam aby dvn, ngoqg nyi tulug vpinam diipaq dvn hoo bulug aiyaqkam alo hoqgv peexa dvn,

³hiyv ngoqg nyi tulug aiyaqkam dvdwn, hoo bulug vpinam bulug hoqgv diibin xaadwn, hoo bulug alongam vmwq yumgub mvdwn hoo pwcw ho vdin twqmwql twqlwqnam hvb twqdwn, aiyaqkam pwcw cwwro ho twqlwqnam hvb.

⁴Ho bulv At Swn sogoql betayin, hvbsujaqkam mwv bulam birwqram; mwv hoq moodam mwwg nyuqm mam bulug hoqgv kvs tayin, hoggab bulug bon nyinam tulungv bulam almadwb nyip paku.

⁵Soq sib At Sw bedo nyiqry benbo tulug pagoqkam hiyv ngoqg nyiilungam booxarl wdwn, hwdlo bulv hog dvs ak dooikam “Swrsongv” hvl bedwn, hvbmabde bulug agam ho hog dvs jima yukam, mwam ceekol nyob padwb bibwq dvn.

⁶Hoqgab soq si nulam hog kaapa maadwb, ai kan gob nyitayin, hoo nulam kan twdwq tan, hog kaapa kuram. Nyiqry benbo tulungam doonyiv haaleq tayin, hoo aalv bul gab kaaya pogub nyitayin;

⁷nyiqry kaanbo tulungv hvnyw tayin, hoo nyiqry tak kaanbo tulungv hvnyw moolw tan; bulv mwlwngv bulug agam mam momtum tayin, hoggab Pwnbo hoqgv hog birwq kuma.

⁸Hvbmabde ngoqgab nyiloqkam, At Swg yal lvgab, ngo atorv bwwrnum, hoo jvqtw la ator lvgab bwwrnum, Jakub mwwg nyixaqnam mam hoo Israel mwwg nyicnam mam bibwqdo.

⁹Soq sam tato, Jakubg dvpar hoqg nyiit at nulv hoo Israelwg dvparam pvvb bwwl doogbo tulu, hiyv jvqtwngam naaxa dvn hoo dinda bo mwlwngam tuugw-baago dvb mvdwn,

¹⁰hoq nyi tuluhv Jaiyonam hijum lvgab hoo Jerusalem mam nyimur lvgab pwdwn.

¹¹Hoqg nyiit atv kam naadwb pvvb mvdwn; hoqg nyub tulungv bulw naadwb tomswr dvn; hoqg nyiqry benbo tulungv twngk gab nyiqry kaadwn; hvbsujaqkam bulv At Swg aoho hiigw tvl hoo bedo; “At Sw ngulug pengko so dook maad nvi yv? Ngulug aoso ciqcaq-bviyaqkv haakram.”

¹²Hoqgab nulgab Jaiyonam rongo hvb tuqtayin: Jerusalemv yuupaq kunboam pookumnam gob nyitayin, hoo puutug nammam svvnv doqyub tayin.