Read Nyishi MAIKA 4 Bible Online

MAIKA 4 - Nyishi bible

MAIKA 4

¹Kokw aalam soq si haal wpeq tayin At Swg puutug nammam puutu mwlwngam ao yaadwb mvtayin, hoo hoqham yorn tulug aoho daqca mvtayin; hoo nyiilungv hoqb daayob soolwq tayin,

²hoo naleqgo nyob asaqkv haatayin hoo betayin: “Haato, kuj ngulv At Swg puutub caanuj, Jakubg Pwnbo nammwb, ho mwv mwwg lamta tulungam ngulam tomswr yinpv hoo mwwg lamtab ngulv wla yinpv.” Hoggab Jaiyon soqgv pvvbv lengtayin, hoo Jerusalem hoqgv At Swg gomcwrv lengtayin.

³Mwv nyiilu mvqlwko pengko ho pw-hwwtayin, hoo atorbo gvda gab goqta dvb pvvb mvtayin; hoo bulug lyoqr orioqkam bulv rongo tuqn tayin, hoo bulug nwwxongam nwmw haqxaqnanwb mvtayin; gvda akwnv gvda akwn lyoqr orioq lvgab ceeko ram, bulv nyob padwb mwx-mvaq kuram;

⁴hvbmabde bulv nyi vxig roo ann la mwwg taoq svvn niikumho dootayin, hoo bulam hiyv kam bos dvb mvram, hoggab nyiit At Swg agam hoqgv sam goopa kun.

⁵Hoggab nyiilu mwlwngv at atwg ui eminwb wdo, hvbmabde ngulv ngulug Pwnbo At Swg eminwb nwrba cwtam hoqgv nwrba gob wtayin.

⁶Hoq aalam, At Sw bibwqdo, ngo lukum boam bookum tayin hoo hiyam aadob ruqpaq pakun; hoo hiyam ngo duqtwr duqm dvb mvpa kun ham lvkin gob bookum tayin;

⁷hoo ngo lukum boam boumnam akwb mvtayin, hoo hiyam haqpaq kunum, ham atorbo nyob gob mvtayin; hoo At Sw Jaiyon puutu lo bulam soq mood soqgv nwrba cwtam hoqgv nwrba gob pvvb bwwl doog tayin.

⁸Hoo nulv, soja lo dootwl sviya rvky boa, Jaiyon yornwg nyem ko tulunga, nulam soq si haatayin, otuqg nyinin-nyiya bov haatayin, Jerusalemwg nyem ko gab lvpw atv haatayin.

⁹Nulv sija hoggab sogoq cwrcwr dvn? Nulug ho lvpw atv dooma yv? Nulam tomswr-hony bo tulungv nyiin kun yv, dvnv cinc cinamv nyiinam hvb nulug vcnamv cingngin pak yv?

¹⁰Dvnv cinc cinam hvb, gvngv tuuku baalal vcil hoo sigin dvn yv, Jaiyonwg nyem ko tulunga, hoggab sija nulv bopam soqgv lvvgwb wtayin hoo bvbinko nyook ho dootayin; nulv Bebilonwb wtayin. Olo nulam ywwlin tayin; olo At Sw nulug ceebio alaq hoqgv nulam pvlyw tayin.

¹¹Sija naleqgo nyob asaqkv nulam ceekol hookum duku, begamv, “Mwnwn kac mvmto, hoo kuj Jaiyon aoho ngulug vnyiqkv tuugab tuj.”

¹²Hvbmabde At Swg mwwnam mam bulv cengma; mwwg nyidwb mwonam mam bulv cenglaq ma, ho jurpy deela ho piil boqkum namhvb mwv bulam lvkin gob boqkum pakun.

¹³Gorabto hoo jaaxaq to, Jaiyonwg nyem ko tulunga, hoggab nulug tuuliam ngo dvvcwb mvtayin, hoo nulug luxuqkam ngo tamab mvtayin; nulv naleqgo nyiilungam vmwq yumgub jwwtayin; hoo bulug niqtuq lengnam mam At Swn xumn tayin, bulug nyetam gvda gvtwg nyiit At Sw gab.