Read Nyishi MAIKA 7 Bible Online

MAIKA 7 - Nyishi bible

MAIKA 7

¹Ngo mwwdwq dvn! Hoggab dwr pool aaxiam nookum namhvb ngo nyipa kun, hwdlo roo aaxiam nookum yin; opium akkam dvdwb dookma, ngoqg swwca lo mwwbinam taoq aaxy niingco bo dookma.

²Swcw soqgv lootw bov yuupaq paku, hoo nyia ko pengko lo jvqtw bo akkam dooma; bul mwlwngv ywlw twwdwb tooiyal kaaya yaado, hoo vxy-cirv asaqkam wswq lvgab nootu dvb mwwdwn.

³Bulug alaqkv hoggv almadwn, ham aljaqb nyidwb nyidwn; lvpw atwg nyega kov la hvvky tulungv kam kodwn, hoo koibo nyiingv mwwg hanglo almab mwwbinam mam goolin dvn; hoqgab bulv lvkin gob ham hamyo-hamco dvn.

⁴Mwlwngam alyanbov iky ningc hvb nyidwn, mwlwngam jvqtw yaan bov taa potumnam hvb nyidwn. Nulam rvky bo nyi tulug aalv, nulam laqm-baqm deenamv haapa ku; sija bulv mwwdar-saqpar kuma.

⁵Door-doopw akam mwwjw kuma; ajin akam svqtin kuma; nulug agam mam rvkil doogto hiyv mwnwg laqpo ho gel kardwn;

⁶hoggab ko tuup tulungv abam modu maab nyido, nyem kov mwnwg annam ceekol daqrab do, nyeexwngv mwnwg aiyam ceeko do; nyega akwg ceebiongv mwwg atwg dvpar hoqg nyega tulungam.

⁷Hvbmabde ngoqgab nyiloqkam, ngo At Swn tuugab tayin; ngam ywwlin bo ngoqg Pwnboam kaaya tayin; ngoqg Pwnbov ngam tapa tayin.

⁸Ngoqg ao lo hemp pomabv, ngoqg ceebionga; hwdlo ngo geql yin, ngo daqrab tayin; hwdlo kan twdwq ho dooiyin, At Sw ngoqg hutob nyitayin.

⁹Ngoqg nyimur gab At Swg hang lengnam mam ngo cwql swwtayin hoggab mwam ngo ceekol nyic nyipa kun, hwdlo mwv ngoqg pagoq gab hemp maad deedib hoo ngoqgab pw-hwwl ham nyima deedib. Mwv ngam huto ho boolin tayin; ngo mwwg nyedarko aoho tuugab tayin.

¹⁰Ho ngoqg ceebiongv kaatayin, hoo mwnwn hvnywngv pulup tayin hiyv ngam benum, “Hog lo yu nulug Pwnbo At Sw?” Ngoqg vnyiqkv mwnwg aoho tuugab tayin; sija mwnwn riqjab tayin lamta tulu ho vly katrangam riqjab namhvb.

¹¹Aal loog nulug bvly tulungam nwqm dvb jinam! Hoq aalam nyook vrr rwnam mam vigo nao tayin.

¹²Assiriya hoqgv la Ijipt bopam tulu hoqgv hoq aalam bulv nulug dookub haatayin, Ijipt hoqgv pobu tulu nagub, sa-svlo hoqgv sa-svlo gonwb hoo puutu tuugwn hoqgv puutu tuugub.

¹³Hvbmabde hoqho doonbo tulu gab hoo bulug bon nyinam niqtuq gab, swcwngv vp-cwkw tayin

¹⁴Nulug beqnyia lvgab nulug nyiilungam, nulug otu nvvsiqnam sibin-svv tulungam roocumto, hiyv boolu mvkwg gvda nyoro pengko ho vp-cwkwb doodwn; kolwg mood hvb bulam Basan la Gilead ho nwmw dvmto.

¹⁵Ijipt gvda hoqgv hwdlo nulv agab lengdwk aal tulu hvb, ngo bulam swrdorxeq pagoqkam kaakin tayin.

¹⁶Nyob tulungv sam kaapa tayin hoo bulug atornam mam hog kumanyi hvl hvnyw tayin; bulv bulug agam mam momtum tvl dootayin; bulug nyurungv ruutar tayin;

¹⁷bulv tvb hvb diimwram yaql dvtayin, swcw so ngamkar yvnbo tulu hvb nyitayin; bulug atorbo cwwgw nan hoqgv bulv tvmdwrl lengtayin; ngulug Pwnbo At Swn bulv vcjaqb bos sokum tayin, hoo bulv nam bos sotayin.

¹⁸Hiyvg Pwnbo akv noqg hvb nyidwn, nyimuram apaq jidwn hoo mwwg otu nvvsiql boumnam tulug nyixaqkam korbol wleq dvn? Mwwg haaxaqnam mam mwv nwrba gob pvvl doog maadwn, hoggab tumanam abyho mwv hemp dvn.

¹⁹Mwv lokta ngulug aoso hang biitayin; ngulug nyimur mwlwngam mwwg lvpia ura lo samtin tayin. Nulug nyic mwlwngam sa-svlo ura jaqb hurlwq tayin.

²⁰Ngulug ab tulungam kolwg mood hoqgv noqg dingr kunam hvb, Jakubnvn noqg dengkynam mam hoo Abrahamnvn tumab abynam mam kaakin tayin.