Read Nyishi NAXUM 1 Bible Online

NAXUM 1 - Nyishi bible

NAXUM 1

¹Nenibi pagoq gab gamt tonam. Elkoswg Naxumg nyiqry kaanam kitap.

²At Sw kaaneq bvla ree daqnbo Pwnbov; At Sw ree daql hoo hang lingtwr-twrya dvn; At Sw ree daqdwn mwwg ceebio tulug aoho hoo mwwg ceebio tulungam hang lengtwr twrya gab pvvg dvn.

³At Sw haaxaq xaqla maadwn hoo huqlw ho ator dvn, hoo At Sw hoggub nyijaqkam nyimuram apaqram. Mwwg lamtangv cwkeq-lemeq dooi bvla nyodo taangv, hoo doomwqkv mwwg lvpiag diimwrv.

⁴Mwv sa-svlongam yolu ruql ham pwtw dvb mvdwn; mwv pobu mwlwngam pwtw dvb xoom dvn; Basan la Karmelv sengnum; swiywq nyam-nyambo Lebanonv sengnum:

⁵Puutu mwlwngv mwwg agaho hwqnum; yorn mwlwngv jiqnum; swcwngv mwwg agaho hoi-hocanam, gvda gvtv la hoqho doonbo tulungv.

⁶Hiyv mwwg hang lengnam agaho daqnyi tayin? Hiyv mwwg haaxaqnam ogho cwqnyi tayin? Mwwg hang lingtwrnamv wm hvb toolin dvn, hoo mwv wlw tulungam vmwq-yumgub mwmwqnum.

⁷At Sw aldvn, vs-axaq aalam cwwgw nanv; mwv cengdwn hiyv mwam cwwgwdvn.

⁸Hvbmabde diidwr iss vcjaqb tonam lvgab mwv ceebio tulungam twrkiq-twrmal twryum tayin, hoo mwwg ceebio tulungam kan twdwq ura nagub ruqmin gvtayin.

⁹No hoggv At Swn ceeko dvb mwwsil mwwdwn? Mwv twrkiq-twrmal twryum tayin; vs-axaqkv lwnyi dvb daqrab kuram.

¹⁰Hoggab bulam taa-haataqho hoqtu pan hvb nyipa ku, bulv twwlayil twwxum bo hvb nyinam; bulv pwtw rwrw bo svvda-teriam gupw maab gunam hvb nyinam.

¹¹Nulug hoqgv niqtuq dooma dvb tomswr-hony bov At Swn mwwsil almab ceekol nyidwb mwwnbo, ak haanum.

¹²Soq si At Swg benamv, “Bulv ator xeqxeq bvla mvqlw sujaqkam, bulam pageq lotwl hoo wleq tayin. Ngo nam dwqtwr dwqm sujaqkam, ngo nam dwqtwr lokkam dwqm kuram.

¹³Hoo sija ngo mwwg luukam noqg hoqgv tupaq jitayin hoo nam tuml ap nanv cwrsaq-bvraq taikun.”

¹⁴At Sw noqg pagoq gab gaml jip pakun: “Noqg eminam lokam muiyu-mvca kuram; noqg nammwg svvda taqnam guss samla dvvcw guss pwnbo tulungam ngo papaq tayin. Ngo noqg nyubungam mvtayin, hoggab no alma.”

¹⁵Kaato, gvda puutug aoho, mwwg tugu puiyam baqa bo lvpiangam, hiyv swrsongam pui dugaq dvn! Judanga, noqg durum mam pvvl apto; noqg dingrnam mam niqtuq lengm to, hoggab nywywngam niqtuq dooma bov noqg dookub wpeq kuram; mwam twrb looda twrm pakun.