Read Nyishi NAXUM 2 Bible Online

NAXUM 2 - Nyishi bible

NAXUM 2

¹Cirsaq-bvraq twqb mvnbo tulungv nam ceeko dvb haapa ku. Nyiingv sulu mwrpa; lamtangam kaaka to; nyob padwb svtam-soruq pa; noqg huqlw mwlwngam nookumto.

²Hoggab At Sw Israelwg yuunam hvb Jakubg yuunam mam jikur do; hoggab naalil naareqbo tulungv bulam naalil naareq paku hoo bulug haqb tulungam yuupaq mvpa kun.

³Mwwg atorbo nyi tulug svtamv lwwcw do; mwwg nyemaq tulungam lwwcw kurumbo vjam koom pakun. Mwv bulam bookum de aalho ceriot tulungv dvvcw kwlwq-kvlaqbo lvgab haanam; saipres nwwxo tulungv nit kusuqnam.

⁴Ceriot tulungv xarya pacanv lyobu mwlwho xarpeqnam; bulv cuukiq-bvvrw mwlwho nyebia jaqb juqkur-juqxynam; bulv mur hvb huunam; bulv wm bioqnam hvb xarnam.

⁵Mwv mwwg saab tulungam mwwpanam; bulv wdu yikho bulv dwqtupnam, bulv ciqcib nyebia jaqb haanam; naareqnam sojangam mvrabnam.

⁶Pobu toggoq tulungam kuqkonam; lvpw namlongv jiqpaqnum;

⁷hoq nyem tulungam twqbin kunv, mwnwn leeg nukun, mwnwg paqn tulungv nyix-riidu do, yobur ringnam hvb ringdu do hoo bulug swqbwngam kwdin do.

⁸Nenibi si iss sviyin ak hvb nyidwn hoqg issiv topaq dvn. “Doqnu to! Doqnu to!” hvl bulv sogoqnam, hvbmabde hiyv kam tobkur kuma.

⁹Rupam naalil naareqnam, hunam naalil naareqnam! Uddum mam naanya maanam ho hog mwlwg xinam gumnam naanya maanam.

¹⁰Vp cwkw do! Mwwgw doomab hoo yuupaqnam! Hangv jiqnum hoo lwbwngv tvmdwrnam; hwwpo mwlwngv torum-taxnam; nyuqm mwlwngv mooma-sasanam!

¹¹Sony nyot tulug lwwpwqkv hoglo, sony nyot ko tulungam hook nyookv hoglo, sony nyot nyem la nyega gv hogloq wnkun, mwwg ko tulungv hogloq wnkun, akkam nyik sumbo dookma?

¹²Sony nyotv mwwg ko tulu gab naleqgo pumwql ap jinum hoo mwwg sony nyot nyem gab soogam gamjnam; mwwg lwwpwq tuluho mwwg nyora gaqnamv bwwrtvl doomnum hoo mwwg lwwpwq tuluho vdin pumwqnamv doonam.

¹³‍Kaato, ngo nam ceeko dvn, nyiit At Sw bibwqdo, hoo noqg ceriot tulungam ngo wmho parxia tayin, hoo lyoqr orioqkv noqg sony nyot nyopa tulungam duiyum tayin. Swcw soqg noqg nyora gaqnam mam ngo mvpaq tayin, hoo noqg hvvky tulug yal dunam mam lokkam tapa kuram.