Read Nyishi HABAKKUK 1 Bible Online

HABAKKUK 1 - Nyishi bible

HABAKKUK 1

¹Gamt tonam mam nyiqry benbo Habakkuk kaapanum.

²At Swa, hog hwd oyu go ngo svka gab xabtayin, hoo no tapa kuram yv? Ho nam “Yolu dul!” xabt yv hoo no ywwlin ramyv?

³No hoggub ngam nyixaqnam mam kaam dvb mvpa kun, hoo no hoggub nyimuram kvvmw dvn? Twrmnam mvla kwr-kornamv ngoqg aga si doodo; jwwnam mvla loomin sumanamv koi yaiya do.

⁴Hoqgab pvvbv ywwriq deeku, hoo jvqtwngv nywywngam lengkma. Hoggab nyicv jvqtwngam hwwiyum paku; ho jvqtw lengnam mam muk-mviya paku.

⁵“Nyob nyi tulu pengko lo tuugabl, hoo kaato; mwwc lama dvb nyinam mam hoo lomkaq-saqto. Hoggab ngo nulug aal so bonam ak nyidu dvn ho nam betam sujaqkam no mwwjw ram.

⁶Hoggab kaato, kacaq bvla nyebia jaqb nyinbo nyob, Bebilon nyiilungam ngo mvqlw lwwrab mvtayin, hiyv swcw nvg ywwtwr namgob wtayin, ho hogloqhv bulug atwg doogw maasu ham bulv naareq tayin.

⁷Bulv kwiywq twqb la bos jaq dvb nyido; bulug jvqtwngv la xinamv bulug atwg otuqb wdo.

⁸Bulug svpur tulungv hogga takaram nyebia yaadwn, ariyumg svcangam bos yaadwb nyidwn; bulug svpuram wgbo tulungv larl wgdo. bulug svpuram wgbo tulungv aado hoqgv haadwn; bulv xookam cinnam hvb cilwql mviyaqdo.

⁹Bul mwlwngv yolu swcin mvtab haadwn, bul mwlwg nyuqmv otuqb pwrdo. Bulv xuqx hvb nyuum mam bookuml appa.

¹⁰Lvpw at tulungam bulv benyi-beya do, hoo pvvb bwwl doogbo tulungam bulv nyirj do. Bulv gurum vxiam nyirj do, hoggab bulv swcwngam paal aptvl hoo ham naagdo.

¹¹Nyimurbo nyiilungv, bulug pwnbov bulug atwg atorv, bulv dooi hvb nuul wggwl doodo!”

¹²No kuiyum hoqgv maaiyv, ngoqg Pwnbo At Swa, ngoqg Dvrwqbo Aka? Ngulv siram. At Swa, no bulam hvvky akwb xuqbwq pakun, hoo no Lwwn atv, bulam benyi-beya dvb mvl ap pan yv.

¹³Alman boam kaan mamlin sam nulug vnyiqkam dvrwq kwrwqb pvvto hoo nyixaqkam kaanyi ram, hoggub no nyepinbo tulungam kvvmw dvn hoo hoggab cooikab doodwn hwdlo nyic bov mwam dvrwq yaanbo nyiingam dvmeq yukam?

¹⁴No nyia ko tulungam sa-svlog ngui hvb mvp pan, ngaml wnbo tulungam pvvb bwwl doogbo doomanam hvb.

¹⁵Mwv vkar lvgab bul mwlwngam naalin pan; mwv mwwg wswq lvgab bulam agwb naalin pan; mwv mwwg seel wgnam wswq uraho bulam nookum pan; ho mwv hwnyir-hvmar hoo mwwngam do.

¹⁶Hoqgab mwv mwwg wswqkam pwr jidwn hoo mwwg seel wgnam wswqkam aky jidwn; Hoggab bulug hoqgv mwv swwngam jaqb swwl doodwn, hoo mwwg dvsv naleqdo.

¹⁷Hoqgab mwwg wswqkam mwv asarb pvvyin dviyv hoo aya mwwpa maab nwrba gob nyob nyiilungam mingdu tai nvi yv?